Nkonko ya babadi

Panyima pa diteta dia ndekelu dienzeka ku ndekelu kua Bidimu Tshinunu, bantu nebikaleku kabidi mua kuenza mpekatu ne kufua anyi?

Kudi mvese ibidi mu mukanda wa Buakabuluibua idi ituambuluisha bua kuandamuna ku lukonko elu: ‘Bakela lufu ne Muaba wa Bafue mu dijiba dia kapia. Elu ndufu luibidi, dijiba dia kapia mene.’ (Buakabuluibua 20:14) ‘Yeye neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’​—Buakabuluibua 21:4.

Tangila mudi malu aa alondangana. Badi bela “lufu ne Muaba wa Bafue” mu dijiba dia kapia pikalabu bamane kulumbuluisha bantu bilondeshile “malu akadi mafunda mu mukanda,” anyi malu onso adi Yehowa ulomba bantu bua bakumbaje mu bidimu tshinunu. Mu bantu aba nemuikale bantu bapanda ku Armagedone, aba babishibua ku lufu ne aba bonso bikala baledibue kunyima kua Armagedone. (Buakabuluibua 20:12, 13) Mupostolo Yone udi ufunda tshikena-kumona tshikuabu, tshidi mu Buakabuluibua nshapita wa 21, tshiakumbana mu Bukokeshi bua Bidimu Tshinunu bua Kristo Yezu. Kadi tshikena-kumona etshi tshidi ne bua kukumbana ku ndekelu kua Dituku dia Dilumbuluisha dia bidimu tshinunu. Mu tshikondo atshi ke muikala Yehowa ne bantu mu ngumvuilu wa tshishiki, kakutshiyi dijinga dia bakuidi ne Yezu mumane kupingajila Tatuende Bukalenge. Mu ngumvuilu wa mu tshimfuanyi, Yehowa neikale ne ‘bantu bende’ buludiludi ne bua kashidi. Dilaya dia ne: “Lufu kaluena luikalaku kabidi” nedikumbane menemene pikala bantu ne bua kulua bapuangane, bamane kupeta masanka onso adi afumina ku mulambu wa Kristo.​—Buakabuluibua 21:3, 4.

Nunku, lufu ludibu bakuila mu mvese itudi batele kulu eku ndua mu Adama, luikala mulambu wa Kristo ne bua kujikija. (Lomo 5:12-21) Pikalabu bamane kumusha lufu ludi bantu bapiane kudi muntu wa kumpala alu, bantu nebalue anu muvua Adama pakafukibuaye. Adama uvua muntu mupuangane, kadi kabivua biumvuija ne: kavua mua kufua nansha. Yehowa wakakandika Adama bua kadi “mamuma a mutshi wa lungenyi lua kujingulula malu mimpe ne malu mabi,” kumuambilaye ne: “Mu dituku diudi wadia wewe neufue bulelela.” (Genese 2:17) Elu luvua lufu luvua lufumina ku mpekatu muenza ku bukole. Kunyima kua diteta dia ndekelu dienzeka ku ndekelu kua Bukokeshi bua Bidimu Tshinunu, bantu nebikale amu ne budikadidi bua kudisunguila malu. (Buakabuluibua 20:7-10) Nebikale anu ne mushindu wa kusungula tshidi muoyo wabu musue: kuitaba anyi kubenga bua kukuatshila Yehowa mudimu. Nunku katuena mua kuamba ne: muntu nansha umue kakuela Nzambi nyima bu muakenza Adama nansha.

Ntshinyi tshiafikila muntu wasungula bua kutombokela Nzambi kunyima kua diteta dia ndekelu, pikala lufu ne Muaba wa Bafue kabitshiyiku? Tshikondo atshi, lufu lua mu Adama kaluakuikalaku kabidi. Ne Muaba wa Bafue (lukita ludi bantu bonso badi ne ditekemena dia kubishibua baya) kawakuikalaku kabidi. Nansha nanku, Yehowa udi anu mua kubutula mu dijiba dia kapia muntu yonso udi umutombokela, kakutshiyi ditekemena dia muntu au kubishibuaye kabidi. Lufu ludi muntu au ufua neluikale bu elu luakafua Adama ne Eva, kadi ki ndufu ludi bantu bapiane kudi Adama to.

Kadi, kakuena tshidi mua kutufikisha ku diela meji ne: bualu bua mushindu eu budi mua kuenzeka kabidi. Bantu bapita mu diteta dia ndekelu nebikale bashilangane ne Adama mu bualu bumue bua mushinga mukole. Nebikale batetshibue mu ngumvuilu wa tshishiki. Tudi mua kuikala ne dieyemena mu mushindu wikala diteta dia ndekelu adi ne bua kuenzeka bimpe menemene bualu Yehowa mmumanye mua kukonkonona muntu yonso munda ne panyima. Tudi mua kushala bashindike ne: diteta dia ndekelu adi kadiakushiya muntu nansha umue udi mufuane kuenza mudimu bibi ne budikadidi buende bua kudisunguila malu to. Ke bua tshinyi, nansha mudiku mushindu wa bantu bapita mu diteta dia ndekelu kutombokela Nzambi ne yeye kubabutula diakamue, mbikole bua tuetu kuamba ne: bualu bua mushindu eu mbufuanyike kuenzeka kabidi.

[Tshimfuanyi mu dibeji 31]

Kunyima kua diteta dia ndekelu, mmu ngumvuilu kayi muikala bantu bafuanangane ne Adama?