Udi muvuluke anyi?

Dibala dia nimero ya ndekelu ya Tshibumba tshia Nsentedi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

• Bilondeshile tshikavua Musambu wa 72:12 mumanyishe, mmushindu kayi wikala Yezu ne bua ‘kupandisha muntu mupele’?

Mu bukokeshi buende, nekuikale buakane bua bantu bonso, ne kakuakuikala kabidi dikosa dia mishiku. Mvita ke idi ikebesha bupele, kadi Kristo neafile ditalala dikumbane. Udi umvuila bantu luse ne neabasangishe bonso mu buobumue, neenze bua biakudia bikale bia bungi pa buloba. (Musambu 72:4-16)​—1/5, dibeji 7.

• Mmunyi mutudi tuetu bena Kristo mua kuleja ne: tudi ‘tuakula ne dikima’? (1 Timote 3:13; Filemona 8; Ebelu 4:16)

Tudi tuleja ne: tudi ne dikima patudi tuyisha bantu bakuabu ne lukunukunu, patudi tulongesha ne tufila mibelu mimpe ne lukasa, ne patudi tuleja Nzambi malu etu onso mu disambila, bashindike ne: yeye udi ututeleja ne utuandamuna.​—15/5, dibeji 14-16.

• Mu Mikenji ya Mose, bua tshinyi bimue bintu bitu bienzeka ku mubidi wa muntu bivua bimuvuija ‘ne bukoya’?

Mikenji ivua yakula bua bukoya ivua itangila diela dia bilumi panshi, dimona katshietshi ne dilela muana, ivua yambuluisha bua kuikala ne bukole bua mubidi ne bikadilu bimpe. Ivua ileja kabidi mudi mashi mikale a tshijila, ne mudibi bikengela kubuikidila bantu mibi yabu.​—1/6, dibeji 31

• Bikala muntu musue kupeta disanka, bua tshinyi mbimpe akonkonone mukanda wa Misambu?

Bafundi ba Misambu bavua bamanye ne: disanka didi difumina ku malanda mimpe adi muntu nawu ne Nzambi. (Musambu 112:1) Bakaleja ne: kakuena malanda adi muntu mua kudia, anyi bintu anyi mudimu udi mua kumutuadila disanka dipite didi difumina ku dikala umue wa ku “bantu badi ne Yehowa, Nzambi wabo.” (Musambu wa 144:15)​—15/6, dibeji 12

• Mmalanda kayi a pa buawu avua Yehowa mudie ne bena Isalele ba kale?

Mu 1513 kumpala kua bikondo bietu ebi, Yehowa wakabikila bena Isalele bua kuikala nabu mu malanda mapiamapia anyi kudia nabu tshipungidi. (Ekesode 19:5, 6; 24:7) Pashishe, bena Isalele bavua baledibua, bavua baledibua mu tshisamba tshisungula kudi Nzambi. Nansha nanku, muntu yonso uvua ne bua kudiangatshila dipangadika dia kusadila Nzambi.​—1/7, dibeji 21-2.

• Bua tshinyi tudi ne bua kuenza malu onso ‘katuyi tunungana’? (Filipoi 2:14, MMM)

Mu Bible mudi bilejilu bia bungi bidi bileja muvua manunganyi mafikishe basadidi ba Nzambi ku bipeta bibi. Lelu eu tudi ne bua kuelela meji bimpe menemene pa bipeta bibi bidi mua kufumina ku bualu ebu. Bantu bapange bupuangane badi anu ne tshilele tshia kunungana, ne tudi ne bua kutabalela bimanyinu bionso bia manunganyi ne kubiepuka.​—15/7, dibeji 16-17.

• Mmunyi mutudi bamanye ne: meji adibu batele mu Nsumuinu 8:22-31 ki mmeji mena dîna nansha?

Meji aa ‘akafukibua’ kumpala kua midimu yonso ya Yehowa. Nzambi ukavua anu kuoku kuonso aku ne ukavua ne meji; meji ende kaavua mafukibue nansha. Meji adi mu Nsumuinu 8:22-31 avua pabuipi ne Nzambi bu ‘muena mudimu wende.’ Nunku meji aa ntshifukibua tshia mu nyuma tshiakalua Yezu, eu wakenza mudimu pamue ne Nzambi bua kufuka bintu bionso. (Kolosai 1:17; Buakabuluibua 3:14)​—1/8, dibeji 31.