“Anu bua muana mukuabu wa bidimu tshitema”

MISANGU yonso ivua Bantemu ba Yehowa baya kayisha mamu mukuabu ku Sud kua ditunga dia Pologne, diende Wiesława, uvua ubela anu tuasakidila ne bukalanga buonso, ubenga bua kuyikila nabu. Kadi dituku dikuabu, muana mukuabu wa bidimu tshitema, diende Samuel, ne mamuende kufikabu kua Wiesława. Bua dituku adi, Wiesława wakitaba bua kuteleja bivuabu bamuambila, kuangataye ne tshibejibeji tshivua tshiakula bua mparadizu pa buloba.

Bu muvua Tshivulukilu tshia lufu lua Yezu (anyi Didia dia Mukalenge) pabuipi, Samuel wakajinga bua kubikila Wiesława bua kuluaye kubuelamu. Ke Samuel ne mamuende kupinganyinabu kabidi mamu au musangu mukuabu bua kumushila kabeji ka dibikila. Pakamona mamu au muvua Samuel muvuale bimpe, wakabalomba bua kuindilabu kakese, yeye kupingana mu nzubu e kuvuala pende bilamba bimpe. Pakapinganaye ku tshibi, bakayikila ne Samuel, kuitabaye bua kuya mu Tshivulukilu e kukonka kabidi ne: “Ndi mua kulua ne banyanyi anyi meme nkayanyi?” Ke yeye muine kuamba kabidi ne: “Nansha bayanyi yeye kayi mulue, meme nendue. Nendue anu buebe wewe Samuel.” Bua kusankishaye Samuel, wakaya anu muvuaye muamba amu.

Pavuabu bateleja muyuki wa Tshivulukilu, Samuel uvua musombe ku luseke lua Wiesława umuleja muaba uvua mvese ivuabu bafila mu Bible. Biobi kukemesha Wiesława bikole be! Tshivulukilu atshi tshiakamusankisha bikole, wakanyisha muvuabu bumvuija malu male mu mêyi adi muntu mua kumvua bipepele. Bualu bukuabu buvua bumulenge mmushindu muimpe uvuabu bamuakidile kudi bana betu bena mu tshisumbu atshi. Kubangila anu dituku adi too ne lelu Wiesława wakabanga kuanyisha malu a Nzambi bikole ne kutuadija kubuela mu bisangilu bionso bia Bantemu ba Yehowa. Matuku adi panshi aa uvua muambe ne: “Ntu ngumvua bundu bua mushindu umvua mbenga bua kuyikila nenu panuvua nulua kuanyi. Ndi nnujadikila ne: mvua mufike ku ditaba bua kuyikila nenu anu bua muana mukuabu wa bidimu tshitema, anu bua Samuel.”

Bana ba bungi badi Bantemu ba Yehowa lelu eu badi batumbisha Nzambi padibu bayisha ne mukana muabu ne padibu ne bukalanga ne bikadilu bimpe mu bantu anu bu Samuel wa mu Pologne. Wewe muikale muana, udi pebe mua kuambuluisha bamue bantu bena malu mimpe bua kunangabu malu a Nzambi.