Kutendelela kudi kuambuluisha ku tshinyi?

BANTU ba bungi batu badiambila ne: “Si ndi anu mua kuikala muntu muimpe nansha meme tshiyi ntendelela!” Mu amue matunga, bantu bavule ba kueyemena batu basue malu malulame ne bena mutshima wa luse kabatu basue kabidi kutendelela to. Tshilejilu, ku Mputu wa kudi dîba dibuelela, anu bantu bakese patupu ke batu baya mu nzambi misangu yonso nansha mutu bavule ba kuoku aku bamba mudibu bitabuje Nzambi. * Nansha mu Amerike wa kuinshi, anu bena Katolike 15 anyi too ne ku 20 pa lukama ke batu ne tshibidilu tshia kuya mu misa.

Pamuapa wewe pebe utu wela meji anu bu bakuabu ba bungi ne: kutendelela kakuena kuambuluisha muntu bua kuikala ne nsombelu muimpe nansha. Kadi bumue ukadiku anu mumvue kabidi ne: bidimu bia bungi kumpala bantu bavule mu matunga makuabu bavua batendelela bikole kupita mudibu batendelela lelu. Bua tshinyi kutendelela kakutshiena kabidi kusankisha bantu miaba mikuabu ya bungi? Muntu udi mua kuikala muntu muimpe padiye kayi utendelela anyi? Kudiku ntendelelu udi mua kukuambuluisha anyi?

Tshidi ba bungi babengele kutendelela

Kukadi bidimu bivule bivua bantu ba bungi bavua badiamba muvuabu bena Kristo bitaba ne: bidi bikengela kutumikila Nzambi. Bavua baya mu masangisha bua kulengelela Nzambi ku butuangaji bua muakuidi kampanda uvua ubenzela mikiya kansanga anyi ku bulombodi bua muambi kampanda. Bushuwa, ba bungi bavua bamanye lubombo luvua mu bitendelelu. Malu akenza bitendelelu mu bikondo bia mvita avua mamanyike bimpe kudi bantu, nansha buenzavi bua malu a bundu bua bamue balombodi. Kadi bantu ba bungi bavua bela meji ne: tshitendelelu tshiotshi katshivua tshibi to, bavua babi mbantu. Bakuabu bavua banangamu malu a ne: Nzambi mmutubuluile bualu, a bilele bia kabukulu, ne misambu; bamue mene bavua badifila bikole mu ntendelelu bua ditshina dia tshibawu tshia mu inferno wa kapia ka kashidi, dilongesha didi kadiyi nansha mu Mukanda wa Nzambi. Pashishe, malu a bungi akalua kushintulula bantu meji avuabu nawu bua dibuela dia mu bitendelelu.

Dilongesha dia se: bionso bidiku lelu eu mbidimenene diakatangalaka bikole. Bamue bakabanga kuitaba bashindika ne: bionso bidi ne muoyo lelu mbidiluile ku mpukampuka, Nzambi ki mmubifuke to. Bitendelelu bivule biakapangila mua kuleja bantu malu avua mua kubajadikila ne: Nzambi ke udi Mpokolo wa muoyo. (Musambu 36:9) Kabidi, bu mukavua bantu benda bapatula mamanya mapiamapia, benza bia dikema mu mianda ya luondapu, ya diambulangana mu tudiendelandela ne ya dimanyishangana ngumu ku tudiomba anyi ku nshinga, biakafikisha bantu ku diela meji ne: mamanya a bantu adi mua kujikija ntatu ya mishindu yonso. Kabidi, bakavua bela meji ne: bamanyi ba malu a mu nsombelu wa bantu ne a bikadilu biabu bavua bafila mibelu mimpe kupita ivua bitendelelu bifila. Kadi bitendelelu biakapangila bua kuleja bantu malu avua mua kubajadikila patoke ne: kutumikila kua mikenji ya Nzambi kudi kupetesha muntu nsombelu mutambe buimpe.​—Yakobo 1:25.

Bua kujikija tshilumbu etshi, bitendelelu bivule biakashintulula malongesha abi. Balombodi ne bambi ba mu bitendelelu bakalekela kulongesha ne: Nzambi udi ulomba bantu bua kumutumikilabu. Kadi bia bungi biakabanga kulongesha ne: muntu yonso udi ne bua kudisunguila tshidiye mumone tshimpe ne tshidiye mumone tshibi. Bua kumona  mua kukoka bantu ba bungi, bamue balombodi ba bitendelelu bakabanga kuamba ne: Nzambi udi ukuitaba anu muudi amu, nansha wewe muikale ne nsombelu kayi. Dilongesha dia mushindu eu didi dituvuluija tshikavua Bible mumanyishe ne: “Tshikondo netshifike, tshiabenga bantu kuteleja badi balongesha malu malelela. Nebakebe amu tshidibu bajinga bobu. Nebadisangishile balongeshi bavule badi babalongesha amu bidibu basue kuteleja.”​—2 Timote 4:3, MMV.

Kadi malongesha aa kaakakoka bantu to, akabanyemesha. Muntu yonso wakabanga kudiebeja ne: ‘Bikala bitendelelu bielesha bukole budi nabu Nzambi mpata bua kufuka bintu, bielesha ne meji ende a kutuelela mikenji mpata, pangaya mu tshitanda nebingambuluishe ku tshinyi? Tshindi mua kuditatshishila bua kulongesha bana banyi malu a Nzambi muaba au ntshinyi?’ Bantu bakavua babange kudienzeja bua kuikala ne ngikadilu mimpe bakatuadija kumona kutendelela bu bualu buvua kabuyi ne dikuatshisha. Bakumbuka mu bitendelelu, bualu kutendelela kakutshivua kabidi ne mushinga kudibu. Ntshinyi tshivua tshinyange bualu buvua buimpe bulue bualu bubi nunku? Bible udi utupesha diumvuija ditudi katuyi mua kuela mpata.

Bakadifila mu bitendelelu bua kukumbaja majinga abu mabi

Mupostolo Paulo wakadimuija bena Kristo ba kumpala ne: bamue bantu bavua mua kubuela mu Buena Kristo bua kukumbajabu majinga abu mabi. Wakamba ne: ‘Nkashama idi ne luonji neyilue munkatshi muenu, neyone tshisumbu tshia mikoko; bantu nebabike munkatshi muenu mene, bambila bantu malu adi kaayi malelela bua kukokabu bayidi kunyima kuabu.’ (Bienzedi 20:29, 30) Umue wa ku bantu bakamba ‘malu avua kaayi malelela’ uvua Augustin, mumanyi wa malongesha a tshitendelelu tshia bena Katolike ka bena Lomo. Yezu uvua mulongeshe bayidi bende mua kuelesha bantu meji ne malu a mu Mukanda wa Nzambi bua bafike ku dikudimuna mutshima. Kadi Augustin yeye wakakonyangaja mêyi a Yezu adi mu Luka 14:23 (MMM) a ne: “Ubueje bantu ku bukole,” uumvuija ne: mbimpe kuenzeja bantu ku bukole bua kukudimunabu mutshima. (Matayo 28:19, 20; Bienzedi 28:23, 24) Tshivua Augustin wipatshila mu tshitendelelu mbua kumonaye bua kukokesha natshi bantu.

Satana udi muanjelu mutomboke ke udi usaka bantu bua kunyanga tshitendelelu ne kuenda natshi mushinga. Wakasaka balombodi ba bitendelelu ba mu matuku a bayidi ba kumpala ba Yezu bua kunyangabu bisumbu bia bena Kristo. Bible udi wamba bantu abu ne: ‘Bantu aba nunku badi bapostolo badingi, bena mudimu ba mashimi, badi badiandamuna bu bapostolo ba Kristo. Ki mbualu bua kukema nansha; bualu bua Satana mene udi udiandamuna bu muanjelu wa munya. Nunku ki mbualu bua kuanyina bikala bakuatshishi bende badiandamuna bu bakuatshishi ba malu makane’ to.​—2 Kolinto 11:13-15.

Satana utshidi anu ukuata mudimu ne bitendelelu bidi bidiamba mudibi bia bena Kristo, bidiamba mudibi bipeteshangana bikadilu bimpe ne bilongesha bulelela, anu bua kufikisha bantu ku ditumikila majinga ende yeye pamutu pa kutumikilabu mikenji ya Nzambi. (Luka 4:5-7) Pamuapa ukadi mumonaku mudi balombodi ba bitendelelu bia bungi lelu eu badifile mu bitendelelu anu bua kudibandishabu ne mêna a mianzu minene ne bua kupetelamu mfranga kudi bena kuitabuja. Mbulamatadi payi mmiangate anu bitendelelu kabidi bua kusaka bantu bua kudifilabu mu mvita.

Bantu ba bungi ki mbamanye ne: Diabolo udi ukuata mudimu bikole ne bitendelelu to. Pamuapa wewe udi mua kuela meji ne: anu batendeledi bakese bena malu makole ke badi bakuatshila Satana mudimu. Kadi bilondeshile Bible, ‘yeye udi muinyikibue ne: Diabolo ne Satana, udi mudingi wa ba pa buloba bonso.’ Bible udi wamba kabidi ne: ‘Ba pa  buloba bonso badi balala mu [bukokeshi bua mubi].’ (Buakabuluibua 12:9; 1 Yone 5:19) Mmunyi mudi Nzambi umona bitendelelu bidibu bakuata nabi mudimu kudi balombodi ba muomu ne ba tshididi badi bipatshila anu bua kukoka bantu bua babalonde?

“Bidi bindengelela ku tshinyi?”

Bikala bikadilu bia mu bimue bitendelelu bidi bidibikila bu bia bena Kristo bikunyingalaja, umanye ne: bidi binyingalaja kabidi Nzambi Wa-Bukole-Buonso bikole menemene. Bitendelelu bia bena Kristo ba ku dîna bidi biamba mudibi bidie tshipungidi ne Nzambi; Isalele wa kale uvua pende wamba bualu bua muomumue. Kadi bitendelelu ebi ki mbishale bilamate Nzambi to, anu muakabenga Isalele kumulamata. Mêyi avua Yehowa uleja nawu bubi bua bena Isalele adi kabidi akumbanyina muomumue bitendelelu bidi bidibikila bu bia bena Kristo lelu. Yehowa wakamba ne: ‘Kabena bateleja miaku yanyi; badi bapetula mikenji yanyi. Musenga wa kamonya wa ku Sheba udi undengelela ku tshinyi? Milambu yenu kayena insankisha.’ (Yelemiya 6:19, 20, MMM) Nzambi kavua muitabe bena lubombo abu bua kumutendelela to. Mikiya yabu ne masambila avuabu benza kavua ubimona bua bualu to. Wakambila bena Isalele ne: ‘Mutshima wanyi udi ukina masangisha enu ne matuku enu masungula bua kudiamu biakudia bia disanka; adi anemesha mutshima wanyi bujitu, ne kutuala kuawu kudi kuntonda. Nunku, panuolola bianza bienu kundi, nensokoke mêsu anyi kunudi; e, panuantendelela ne mitendelelu ya bungi mene, tshiena nnumvuila.’​—Yeshaya 1:14, 15.

Bibilu bidi bitendelelu bivuije bu bia bena Kristo pabi bikale bibilu bivuabu benzela nzambi ya dishima ku ntuadijilu kuabi bidi mua kusankisha Yehowa anyi? Utu uteleja masambila a balombodi ba bitendelelu badi banyanga malongesha a Kristo anyi? Nzambi udiku wanyisha tshitendelelu tshionso tshidi tshibenga kutumikila mikenji yende anyi? Wikale mumanye ne: udi unyingalela bitendelelu bua bilele bidi bienzekamu lelu eu anu muvuaye unyingalela kabidi bena Isalele ba kale bua milambu yabu yakambaye bualu buayi ne: “Bidi bindengelela ku tshinyi?”

Nansha nanku, Yehowa udi wanyisha bikole menemene padibu bamutendelela kudi bantu badi basue malu malelela. Nzambi udi usanka padi bantu bamuleja dianyisha diabu bua bintu bionso bidiye ubapesha. (Malaki 3:16, 17) Nanku udi mua kuikala muntu muimpe paudi kuyi utendelela anyi? Muntu udi kayi wenzela baledi bende bualu nansha bumue, udi mua kudiamba mudiye muntu muimpe bantu kumuitaba anyi? Nansha kakese! Nunku, bikala muntu kayi wenzela Nzambi bualu nansha bumue, udi mua kuikala muntu muimpe anyi? Mbiumvuike bimpe ne: tudi ne bua kudifila bikole kudi Nzambi mulelela udi mutupeshe muoyo utudi nawu eu. Mu tshiena-bualu tshidi tshilonda netumone mudi ntendelelu mulelela utumbisha Nzambi ne utuambuluisha kabidi tuetu bine.

[Mêyi adi kuinshi]

[Tshimfuanyi mu dibeji 4]

Bitendelelu mbilejaku bantu malu adi mua kubajadikila ne: Nzambi ke wakafuka bintu bionso anyi?

[Tshimfuanyi mu mabeji 4, 5]

Malu a nunku mmakumbanyine muena mudimu wa Nzambi anyi?

[Tshimfuanyi mu dibeji 5]

Mmunyi mudi Nzambi umona bibilu bia nunku?

[Mêyi a dianyisha]

Foto wa AP/​Georgy Abdaladze