Ntendelelu udi ne dikuatshisha kuudi

MUSANGU kampanda mufundi wa Misambu Asafa wakamba ne: ‘Bidi bimpe bua meme kusemena pabuipi ne Nzambi.’ Pende musangu kampanda kumpala ukavua wela meji bua kubangaye kuidikija bantu bavua kabatshiyi bualu ne Nzambi bavua basue kuikala ne nsombelu wa didienzela malu kabayi ne udi ubalumbuluisha. Kadi dia ka mpindieu Asafa kulua kuelululaye meji bua masanka avuaye upeta pavuaye mu malanda mimpe ne Nzambi, ke yeye kumona ne: kuikala pabuipi ne Nzambi kuvua kuimpe. (Musambu 73:2, 3, 12, 28) Ntendelelu mulelela udiku ne dikuatshisha kuudi lelu eu anyi? Mmunyi mudiye mua kukuambuluisha?

Kutendelela Nzambi mulelela kudi kukuambuluisha bua kulekela ngikadilu wa dijinga kudisankisha anu wewe nkayebe. Pa kumona anu mushindu mene udibu batufuke kudi “Nzambi wa dinanga,” bulelela bantu badi bakeba anu masanka abu bobu nkayabu kabena mua kupeta disanka dilelela to. (2 Kolinto 13:11) Yezu wakalongesha bulelela menemene bua tshitu muntu menemene pakambaye ne: ‘Kupa kudi kutamba kuangata kusankisha muntu.’ (Bienzedi 20:35) Ke bualu kayi tutu tumvua disanka bua kuenzela balunda betu ne bena mu dîku dietu malu mimpe. Kadi disanka ditambe bunene tudi tudipeta patudi tuenzela Nzambi malu mimpe. Yeye ke utudi ne bua kutamba kunanga kupita muntu mukuabu yonso. Bantu miliyo ne miliyo ba mishindu kabukabu mbalue kujingulula ne: kutendelela Nzambi ne kuenza malu adiye utulomba kudi kupetesha bantu disanka bikole.​—1 Yone 5:3.

Udi ukuambuluisha bua kudimona ne mushinga

Ntendelelu mulelela udi kabidi ne dikuatshisha kuudi bualu udi ukuambuluisha bua kumona mushinga uudi nawu paudi ne muoyo. Se tutu tumvua disanka misangu mivule patudi tujingulula ne: tudi benze bualu bua mushinga mukole, ki mmuomu anyi? Bantu bavule batu baditekele bipatshila kampanda mu nsombelu, pamuapa bidi bitangila dîku diabu, balunda babu, midimu idibu benza anyi bualu bukuabu budi bubenza disanka. Bu mutu malu a mu mpukampuka atutulukila bonso, bipatshila ebi bitu misangu mivule bipangila bua kubapetesha disanka. (Muambi 9:11) Kadi ntendelelu mulelela udi mua kukuambuluisha bua kuikala ne malu a mushinga mukole audi ne bua kuipatshila, atungunuka ne kukupetesha disanka nansha padi malu makuabu a mu nsombelu akuela mâyi ku makasa.

Ntendelelu mulelela udi ulomba bua kumanya Yehowa ne kumuenzela anu yeye mudimu kashidi. Bantu badi mu ntendelelu eu badi balua balunda ba Nzambi. (Muambi 12:13; Yone 4:23; Yakobo 4:8) Imue misangu bidi mua kukukolela bua kuela meji ne: wewe eu pebe ufike ku dimanya Nzambi bimpe menemene, ulua too ne mulunda wende! Kadi wewe muelangane meji bua malu akadiye muenzele bantu ne bua bintu bidiye mufuke, udi mua kufika ku dijingulula bumuntu buende mpala ne nyima. (Lomo 1:20) Kabidi, wewe ubala Dîyi dia Nzambi, udi mua kumanya kabidi tshitudi bikadile pa buloba apa, tshidi Nzambi mulekele makenga, mushindu waajikijaye ne pamuapa bualu buatamba kukusankisha ku onso mbua se: neumanye tshiebe tshiudi mua kuenza tshidi ne dikuatshisha mu malu adi Nzambi wenda wenza mpindieu. (Yeshaya 43:10; 1 Kolinto 3:9) Dijingulula dia malu aa didi mua kukusaka kabidi ku dianyisha muoyo uudi nawu.

Udi ukuvuija muntu muimpe

Ntendelelu mulelela mmuimpe bualu udi ukuambuluisha bua kulua muntu wa nsongo. Paudi ulonda ntendelelu mulelela, udi upeta ngikadilu yakufikisha ku disomba bimpe ne bantu bakuabu. Dîba adi ngikadilu ya Nzambi ne ya Muanende neikulongeshe mua kuikala ne bulelela mu malu onso, kuikala ne dîyi dimpe kudi bakuabu ne kuikala muntu wa kueyemena. (Efeso 4:20–5:5) Wewe mumanye Nzambi bimpe menemene mufike too ne ku dimunanga, udi ubanga kumvua muoyo ukusaka anu bua kumuidikija. Bible udi wamba ne: ‘Nuidikije kuenza mudi Nzambi wenza, bu bana bende bananga. Nuende bienu mu [dinanga].’​—Efeso 5:1, 2.

Kabienaku mua kukusankisha bua kuikala munkatshi mua bantu badi bidikija dinanga dia Nzambi anyi? Diakalenga, ntendelelu wa Nzambi mulelela ki ntshitendelelu tshia muntu nkaya to. Nntendelelu  udi ukutuangaja ne bantu bakuabu badi banange malu adi makane, malu mimpe. Bushuwa, udi pamuapa mua kumvua lungenyi lua kuikala kubuela mu tshitendelelu kampanda tshilongolola bimpe alu lukutonda. Kadi anu mutukavua bamone mu tshiena-bualu tshishale, lutatu ludi nalu bitendelelu bivule ki ndua mudibu kabayi babilongolole to, kadi ndua mudibu kabayi babilongolole bimpe ne bua malu adi kaayi makane adibu bipatshilamu. Bitendelelu bia bungi bia nunku bitu ne abi malu makuabu adibi bipatshila adi kaayi a Nzambi. Yehowa Nzambi mmudilongoluele yeye nkayende bantu bende bua tshipatshila kampanda tshia mushinga mukole. Bible udi wamba ne: “Nzambi kena wa malu mabuelakane, kadi udi Nzambi wa ditalala.” (1 Kolinto 14:33) Udi mua kufika ku dimona pebe anu bu bantu bakuabu ba bungi ne: kudisanga mu tshisumbu tshia bena Kristo tshidi Nzambi mulongolole bimpe kudi kulengeja mushindu webe wa kumona malu.

Udi ukupetesha mushindu wa kutekemena malu mimpe

Mifundu Minsantu idi ileja ne: Nzambi udi ulongolola batendeledi balelela bua kushalabu ne muoyo palua nshikidilu wa malu a tshikondo etshi ne kupianabu buloba bupiabupia ‘muikala buakane.’ (2 Petelo 3:13; Buakabuluibua 7:9-17) Nanku ntendelelu muimpe udi ukukuatshisha ngudi ukupetesha mushindu wa kutekemena malu malenga adi mua kukupetesha disanka. Bamue badi batekemena ne: koku kuikale mbulamatadi idi kayiyi itenkakana, malu a mpetu mikale mashindame ne muntu yonso muikale ne makanda a mubidi makumbane ne bamufuta makuta ende a pansio bimpe, nebikale ne nsombelu muimpe. Kadi bintu ebi anyi nansha mene bivule bia kudibi kabitu anu bifikisha bantu ku ditekemena nsombelu muimpe matuku atshilualua to. Kadi mupostolo Paulo yeye wakafunda ne: “Tuakutekemena Nzambi udi ne muoyo.”​—1 Timote 4:10.

Nunku wewe mukebe bimpe menemene, neupete batendeledi balelela. Lelu udi bantu ba bungi batapulukangane eu, batu bamanyina Bantemu ba Yehowa ku dinanga diabu ne buobumue buabu. Mbantu ba mu matunga pabuipi ne onso ne bibidilu bia mishindu yonso, kadi mushindu udibu banangangane ne udibu banange Yehowa Nzambi wabu mmubasange bonso mu buobumue. (Yone 13:35) Badi bakubikila bua ulue pebe kudimuena wewe nkayebe masanka adibu bapete. Bulelela Asafa uvua muambilamu pakafundaye ne: ‘Bidi bimpe bua meme kusemena pabuipi ne Nzambi.’​—Musambu 73:28.

[Tshimfuanyi mu dibeji 7]

Udi anu mua kulua mulunda wa Nzambi