“Mona mundi munange mikenji yebe!”

MUSAMBU WA 119 udi uleja muvua muufundi udiumvua bua dîyi dia Nzambi difundisha ku nyuma wende. Udi wimba ne: ‘Ngakulama dîyi diebe mu mutshima wanyi.’ ‘Nendisankishe mu mikenji yebe mifunda.’ ‘Muoyo wanyi udi mupandike bua dijinga dindi nadi ku kulumbulula kuebe kuakane misangu yonso.’ ‘Mêyi ebe awakammanyisha adi disanka dianyi.’ ‘Ngakujinga malu awakunsunguila bua meme kuenza.’ ‘Nendisankishe mu mikenji yebe, indi nnanga.’ “Nengelangane meji a mikenji yebe mifunda.” ‘Mona mundi munange mikenji yebe! Ndi ngelangana meji bualu buayi dinda too ne ku dilolo.’​—Musambu 119:11, 16, 20, 24, 40, 47, 48, 97.

Bushuwa mufundi wa musambu eu uvua wanyisha Dîyi dia Nzambi ne muoyo wende wonso! Ke muutu udiumvua pebe bua malu adi mu Bible, Dîyi dia Nzambi anyi? Udi musue pebe kudinanga nunku anyi? Bikalabi nunku, udi ne bua kuanji kupeta tshibidilu tshia kubala Bible dituku dionso pikalaku mushindu. Yezu Kristo wakamba ne: ‘Muntu kikadi biende ne muoyo bualu bua bidia nkayabi, ikale biende nawu bualu bua mêyi onso adi alopoka mukana mua Nzambi.’ (Matayo 4:4) Pashishe, udi ne bua kuelela meji pa malu audi ubala. Paudi welangana meji bua malu malelela adi atangila Nzambi, ngikadilu yende, disua diende ne malu adiye mulongolole, neuvudije dianyisha diebe bua Bible. (Musambu 143:5) Bualu bua ndekelu ne bua mushinga mukole mbua kutumikila mibelu mimpe idimu mu nsombelu webe wa buatshia buila.​—Luka 11:28; Yone 13:17.

Dinanga malu adi Bible wamba nedikuambuluishe ku tshinyi? Musambu wa 119:2 udi wamba ne: ‘Disanka didi kudi badi banemeka mêyi [a Nzambi].’ Malu adi Bible utuvuluija neakuambuluishe bua kutantamena ntatu ya mu nsombelu. (Musambu 1:1-3) Neupete meji, busunguluji ne dijingulula dia malu. Ngikadilu eyi neyikuambuluishe bua ‘kukanda makasa ebe bua kaendi mu njila yonso mibi.’ (Musambu 119:98-101) Kumanya bulelela pa bidi bitangila Nzambi ne malu adiye mulongolole bua buloba nekupeteshe muoyo wetu mushinga ne nekukoleshe ditekemena dietu bua matuku atshilualua.​—Yeshaya 45:18; Yone 17:3; Buakabuluibua 21:3, 4.

Bantemu ba Yehowa batu basue kuambuluisha bikole bantu bakuabu bua kumanyabu Bible bimpe ne kunanga malu adimu. Tudi tujinga ne muoyo umue bua witabe dilomba didi kuinshi edi.