Bible udi ne mikenji mipite bukole anyi?

NSONGA mukuabu wa mu ditunga dia Finlande udi wamba ne: “Ku buana buanyi kabavua bandongeshe mukenji nansha umue wa mu Bible to. Kabavua batela nansha Nzambi to.” Ke mudibu bakoleshe bana ba bungi lelu’eu. Bantu ba bungi ne nangananga bansonga, batu bangata Bible bu mukanda wa kale menemene udi ne mikenji mipite bungi. Batu bamona bantu badi balonda Bible bu bena dikenga badi ne mêyi ne mikandu ya bungi. Ke bualu kayi bavule badi bela meji ne: mbimpe kulekela Bible ne kukeba diambuluisha muaba mukuabu.

Bantu badi bamona Bible mushindu eu, bualu ku kale bitendelelu bia Bukua-Buena-Kristo biakakengesha bantu bikole. Tshilejilu mu tshikondo tshidibu babikila ne: Tshikondo tshia Mîdima, Ekeleziya Katolike uvua ne dîyi ku Mputu mu malu atu bantu benza pa kuamba onso. Muntu yonso uvua uteta kuela diapa mulu bavua bamukengesha bikole anyi bamushipa mene. Pashishe bitendelelu bia bena Mishonyi biakalua pabi kumuenena bantu bikole. Lelu’eu bamue bantu badi bibidilangane ne bitendelelu bia bena Mishonyi mbamanye muvuabu bakengesha bantu bavua badisangisha mu bitendelelu ebi. Nunku bu muvua bitendelelu bikengeshangana, bantu badi badishima padibu bamba ne: malongesha a mu Bible adi ne bua kuikala akengeshangana.

Mu bidimu bidi bishale ebi, bitendelelu mbijimije bukokeshi buabi mu nsombelu wa bantu mu amue matunga. Pakalekela bantu ba bungi malu a nzambi, bakatuadija kulongesha ne: bantu badi ne bukenji bua kudisunguila tshidi tshimpe ne tshibi. Tshiakenzeka ntshinyi? Ahti Laitinen, (mulongeshi wa malu a dienzelangana bibi ne dilumbuluishangana), udi wamba ne: “Dibenga kunemeka bumfumu ndivule ne dimanya dia bantu pa tshidi tshimpe ne tshibi didi dienda dikepela.” Bualu bua dikema, nansha bamfumu ba bitendelelu bakadi bitaba pabu lungenyi elu. Tshilejilu, mpasata mukuabu muende lumu muena Mishonyi ya Luther wakamba ne: “Ntu mbenga lungenyi lua ne: bua kujikija bilumbu bidi bitangila kumanya tshidi tshimpe ne tshibi, mbimpe kuya mu Bible anyi kudi bamfumu ba bitendelelu.”

Budikadidi budi kabuyi ne mikalu mbuimpe anyi?

Lungenyi lua budikadidi budi kabuyi ne mikalu ludi pamuapa mua kusankisha nangananga bansonga. Ba bungi ki mbasue kubatumina dîyi anyi ki mbasue kuikala ne mulongolongo wa mikenji to. Kadi muntu yonso udi ne bua kuikala ne budikadidi bua kuenza tshionso tshidiye musue anyi? Bua kuandamuna lukonko elu, tuangatayi tshilejilu. Elabi meji ne: mu tshimenga kampanda kamuena mikenji ya njila to. Kamuena mikanda ya kuanyishila nayi bantu bua kuluabu ba-kanyemesha ne kabena bela muntu mateta kumpala  kua kuluaye kanyemesha. Bantu badi mua kuendesha mashinyi mudibu basue, nansha padibu bakuatshike, kabayi banemeka lubilu lua kunyema nalu, kabayi banemeka bimanyinu, luseke lua njila lua kuyila anyi miaba idi bena ku makasa basambukila. Budikadidi bua mushindu eu mbuimpe anyi? Tòo! Bualu nekuikale kayumbayumba ne njiwu ya bungi. Nansha mudi mikenji ya njila yelela bantu mikalu, tudi tumona ne: idi yepula ba-kanyemesha ne bena ku makasa ku njiwu.

Bia muomumue, Yehowa udi utuleja njila utudi ne bua kuendela bua diakalenga dietu. Bu Yehowa yeye kayi utulombola, tuvua mua kulonga malu tuenda tutua eku ne eku, ne tuvua mua kudienzela bibi ne kuenzela bantu bakuabu bibi kabidi. Nsombelu wa lukutukutu eu mmubi ne udi ne njiwu anu bu mudi kuikala mu tshimenga mudi kamuyi mikenji ya njila. Tshidibi tumanye ne: tudi dijinga ne mêyi ne mikandu kampanda, ne bantu ba bungi badi bitaba bualu ebu.

‘Bujitu buanyi budi bupepele’

Mikenji ya njila idi mua kuikala ya bungi, tshilejilu mu imue miaba bungi bua mikandu pa mushindu wa kuimanyika mashinyi budi bukemesha. Kadi Bible kêna ne mulongolongo wa mikenji to. Tshidibi, udi ne mêyi manene adi kaayi mua kukengeshangana to. Yezu Kristo wakambila bantu ba mu tshikondo tshiende ne: ‘Luayi kundi, bonso badi ne mudimu mukole, badi ne bujitu bunene, meme nennupe dikisha. Bualu bua mutshi wanyi wa tshikokedi udi muakane ne bujitu buanyi budi bupepele.’ (Matayo 11:28, 30) Mupostolo Paulo wakamba mu mukanda uvuaye mutumine bena Kolinto ne: ‘Padi nyuma wa Mukalenge padi budishikaminyi.’​—2 Kolinto 3:17.

Kadi budishikaminyi ebu budi ne mikalu. Yezu wakamba ne: mu malu adi Nzambi ulomba mudi imue mikenji mipepele. Tshilejilu, Yezu wakambila bayidi bende ne: ‘Eu udi mukenji wanyi ne: Nusuangane bu mungakunusua.’ (Yone 15:12) Elabi meji muvua malu mua kuikala pa buloba bu muntu yonso utumikila mukenji eu! Nunku, budikadidi budi nabu bena Kristo budi anu ne mikalu. Mupostolo Petelo wakamba ne: ‘Nuikale bu badishikamine, kadi ki mbu badi bangata budishikaminyi buabu bu tshibuikilu tshia malu mabi, kadi nuikale bu bapika ba Nzambi.’​—1 Petelo 2:16.

Ke bualu kayi, nansha mudi bena Kristo kabayi balombola kudi mulongolongo wa mikenji, kabena benza malu bilondeshile ngenyi yabu bua tshidi tshimpe ne tshidi tshibi to. Bidi bikengela anu Nzambi alombole bantu. Bible mene udi wamba ne: ‘Muntu kêna ne bukole munda muende bua kuendesha nabu biendedi biende bimpe.’ (Yelemiya 10:23) Tuetu tutumikila Nzambi, netupete malu mimpe a bungi.​—Musambu 19:11.

Bumue bua ku malu au ndisanka. Tshilejilu, nsonga utuvua batele ku ntuadijilu uvua wiba ne ushima bikole. Uvua kabidi wenda bundumba bikole. Pakalongaye Bible, wakashintulula nsombelu wende. Wakamba ne: “Nansha mumvua tshiyi mua kulonda mêyi onso a mu Bible musangu umue, mvua mumanye mushinga wawu. Nsombelu wanyi wa kale kavua  mua kumpetesha disanka dindi nadi mpindieu pandi ntumikila mikenji ya Yehowa to. Kulonda mikenji ya mu Bible kudi kulongolola nsombelu webe. Udi umanya kuudi uya ne tshidi tshimpe ne tshibi.”

Bantu ba bungi mbapitshile mu nsombelu wa muomumue. Mibelu ya mu Bible mmibambuluishe bua kuakaja malanda abu ne bantu nabu, bua kuikala ne nkatshinkatshi mu mudimu wa bianza, bua kulekela bibidilu bibi ne kuikala ne disanka. Markus * nnsonga uvua mu tshimue tshikondo kayi ulonda Bible ne mu tshikuabu umulonda. Udi wamba ne: “Pamvua ndonda mikenji ya mu Bible, mvua ndimonaku ne mushinga.” *

Newenze tshinyi?

Netuambe tshinyi, Bible udi utuelela mikenji kampanda anyi? Eyowa, kadi mbua diakalenga dietu bonso. Nansha nanku, Bible udi ne mikenji mipite bungi anyi? Tòo. Budikadidi budi kabuyi ne mikalu butu bulela ntatu. Mikenji ya mu Bible idi ne nkatshinkatshi, ne idi ituvudijila diakalenga ne disanka. Markus udi wamba ne: “Pavua matuku enda apita mvua mmona muvuabi bimpe bua kulonda Dîyi dia Nzambi mu nsombelu. Nansha mudi nsombelu wanyi mushilangane ne wa bantu bavule mu mishindu ya bungi, tshiena mupangile tshintu nansha tshimue tshia mushinga to.”

Paudi upeta masanka bua ditumikila diebe dia mikenji ya mu Bible, dianyisha diudi nadi bua Dîyi dia Nzambi nedidiunde. Nedikufikishe ku dipeta disanka dinene dia kunanga Yehowa Nzambi muena dîyi edi. ‘Bua edi ndinanga dia Nzambi, bua tuetu tutumikile mikenji yende, ne mikenji yende kayena itunemena bujitu.’​—1 Yone 5:3.

Yehowa Mmufuki wetu ne Tatu wetu wa mu diulu. Udi mumanye tshidi tshitambe buimpe buetu tuetu. Pamutu pa kutuelelaye mikalu, udi utulombola ne dinanga bua diakalenga dietu. Yehowa udi utuambila ne: ‘Aka! Bu wewe mumvue mikenji yanyi, ditalala diebe diakadi kuikala bu musulu, ne buakane buebe buakadi kuikala bu mavuala a mâyi manene.’​—Yeshaya 48:18.

[Mêyi adi kuinshi]

[Tshimfuanyi mu dibeji 9]

Yezu wakamba ne: malu adi Nzambi utulomba adi atuambuluisha

[Tshimfuanyi mu dibeji 10]

Kulonda dîyi dia Nzambi kudi kufila disanka ne didimona ne mushinga