Bua kupeta njila wa kulonda mu mâyi manene

BIDILA bia Marshall mbienza ne bidila binene ne bikese bipite pa 1 200. Buloba bua bia bungi bia ku bidila ebi kabuena bubanda bikole menemene pa mutu pa mâyi to. Bidila ebi bidi bijimina ku mêsu padi muntu wenza anu ntanta mukese pa mâyi. Nansha nanku, bendeshi ba matu ba mu bidila bia Marshall bavua bamanye mua kumbuka ku tshidila tshikese kuya ku tshidila tshikese, bavua bapeta njila wa kulonda nansha mu tshipapu tshia kilometre karé miliyo 2 mu Mbuu wa Pasifike. Bavua benza munyi? Bavua babalombola kudi tuarte tupepele ne tuvua tubambuluisha bikole, tuvuabu babikila ne: tuarte tua tumitshi.

Bu muvua bendeshi ba matu ba mu Marshall batamba kuendela pa mâyi, bakalua kumanya ne: buloba bûme budi buenzeja imue mishindu ya mavuala adi aleja muaba udi tshidila tshisanganyibua nansha mu ntanta wa kilometre 30. Kuvua mishindu ya bungi ya mavuala ivua ikengela kumanya, ne tuarte tua tumitshi tuvua tubambuluisha bua kuyimanya. Mmunyi muvua tuarte tua tumitshi? Anu muudi umona mu tshimfuanyi etshi, bavua baluka miji ya mutshi wa pandanus miumbusha bizubu biayi anyi mbala ya bikolo bia koko bua kuenza katshisasa kavua kaleja mishindu ya mavuala. Bavua balamikapu tuzubu tua binyamankole bua kuleja miaba ivua bidila bisanganyibua.

Munkatshi mua bidimu bia bungi, dienda pa mâyi ne karte ka tumitshi divua bualu busokoka, buvuabu baleja anu bamue bantu basungula. Mmunyi muvua muendeshi wa buatu mupiamupia mua kumanya mua kuenda ne karte ka tumitshi aka? Anu pavuabu bamuleja ne udibidija. Muendeshi wa buatu mupiluke uvua ulongesha muendeshi wa buatu mupiamupia mu musokoko, pamuapa uvua wenza nende ngendu mu bidila bia pabuipi. Pavua muendeshi wa buatu mupiamupia eu umanya mua kujingulula mishindu ya mavuala, uvua utuadija kuenza mudimu ne karte ka tumitshi ne dieyemena dionso. Ndekelu wa bionso uvua mua kuenda ne buatu mu mâyi manene yeye nkayende.

Bia muomumue, Bible udi mua kutuludika mu nsombelu wetu udi muenze bu luendu. Tshia kumpala, muntu kampanda udi mua kutuambuluisha bua kumvua malongesha manene a mu Bible. Pashishe, patudi tutungunuka ne kulonga Bible ne tutumikila mêyi manene adimu, tudi tuitaba malu adiye utuambila. Nzambi wakambila Yoshua mulombodi wa bena Isalele bua kubala Dîyi dia Nzambi dituku dionso bua amone mua ‘kuenza malu onso adi mafundamu; pashishe neutute dikasa dimpe, newikale ne diakalengele.’ (Yoshua 1:8) Bulelela, Bible udi mua kutuleja njila mujalame ne wa diakalenga utudi mua kulonda matuku onso.

[Mêyi a dianyisha bua tshimfuanyi mu dibeji 32]

© Greg Vaughn