Nkonko ya babadi

Bua tshinyi Bible wa Traduction du monde nouveau udi wamba mu Dutelonome 31:2 ne: Mose kavua ‘kabidi ne bukenji bua kuya ne kulua’ bua kulombola bena Isalele, eku Bible mikuabu ileja yoyi ne: kavua kabidi ne bukole bua kuenza nanku?

Nansha mudibu mua kukudimuna muaku wa mu tshiena-Ebelu udi mu mvese eu mu mishindu ibidi eyi, mushindu udibu baukudimune mu imue Bible ya mu Tshiluba udi uleja ne: pakavua Mose pa kufua, kavua kabidi ne bukole bua kulombola nabu bena Isalele to. Tshilejilu, mu Mukanda wa Mvidi Mukulu (wa bena Katolike) Mose udi wamba ne: “Lelo ndi ne bidimu lukama ne makumi abidi. Tshiena mmona mua kunuludika kabidi.” Bia muomumue, Mukanda wa Mvidi Mukulu (wa bena Mishonyi) udi wamba ne: “Mbakumbaji bidimu lukama ne makumi abidi. Tshiena ne bukole bua kunulombola kabidi to.”

Kadi Dutelonome 34:7 udi uleja ne: nansha mukavua Mose mukulakaje, uvua anu ne makanda a mubidi. Udi wamba ne: ‘Pakafua Mose, yeye wakadi ne bidimu lukama ne makumi abidi; mêsu ende kaakadi bilejileji ne bukole buende kabuakapua.’ Nunku, Mose uvua amu ne bukole bua kulombola tshisamba tshia Isalele, kadi Yehowa ke uvua kayi musue bua yeye kutungunuka ne kutshilombola to. Ke tshivua Mose muine musue kuamba pakambaye ne: ‘Yehowa wakamana kungambila ne: Wewe kuena usabuka Yadene eu.’ Mbimueneke ne: Yehowa uvua muambulule mêyi akavuaye muambe ku mâyi a Meliba.​—Nomba 20:9-12.

Mose uvua mulale matuku a bungi ne uvua ne nsombelu wa pa buende utudi mua kukosolola mu bitupa bisatu. Munkatshi mua bidimu 40, uvua mu Ejipitu, muvuabu ‘bamuyishe lungenyi luonso lua bena Ejipitu’ ne uvua ‘mukole mu mêyi ende ne mu bienzedi biende.’ (Bienzedi 7:20-22) Munkatshi mua bidimu bikuabu 40, wakasomba mu Midiana. Muomu emu ke muakapetelaye ngikadilu ivua ikengedibua bua kulombolaye tshisamba tshia Yehowa. Ndekelu wa bionso, Mose wakalombola ne kukokesha bena Isalele munkatshi mua bidimu 40. Kadi mpindieu, Yehowa uvua musungule Yoshua bua kulombola bena Isalele ne kubasambuisha Musulu wa Yadene bua kubabueja mu Buloba Bulaya.​—Dutelonome 31:3.

Nunku, mu Bible wa Traduction du monde nouveau mbakudimune bimpe Dutelonome 31:2. Mose kavua mupangile bukole bua kutungunuka ne kulombola bena Isalele to, kadi Yehowa ke uvua mumukandike bua kutungunuka ne kubalombola.