Mbapete biuma bia mu nyuma mu Guinée

MUNKATSHI mua bidimu bia bungi, bantu badi bajinga kufika mu bitupa bia maloba bivua kabiyi bitamba kumanyika bakateka muoyo wabu mu njiwu bua kukeba biuma ne bubanji. Bena dikima bavua bafike mu ditunga dia Guinée, ku Ouest kua Afrike, bakapeta biuma bia mishindu ibidi mishilangane: bia ku mubidi ne bia mu nyuma. Ditunga edi didi ne bantu bapite pa miliyo tshitema ne ndiule tente ne mbongo, or, tshiamu tshifike ne bauxite muimpe mutambe (kudibu bapatuila aluminium).

Nansha mudi bitendelelu bia mu Bukua-Buena-Kristo kabiyi bia bungi mu ditunga edi, bantu badi bangata ntendelelu ne mushinga wa bungi ne batu banyisha biuma bia mu nyuma. Kadi biuma ebi ntshinyi? Mbasadidi ba lulamatu ba Yehowa badibu babikila mu Bible ne: “Biuma bia mu bukua bisamba.”​—Hagai 2:7, MMM.

Biuma bia mu nyuma

Kumbula mu buloba bua kupeta biuma bisokoka kutu kulomba bukole bua bungi. Bia muomumue mu mudimu wetu wa kuyisha, mbimpe kudienzeja bikole bua kupeta biuma bia mu nyuma. Mu Guinée, mudimu wa kuyisha Bukalenge wakatuadija munkatshi menemene mua ditunga ku mbangilu kua bidimu bia 1950 ne wakafika mu Conakry tshimenga tshikulu ku mbangilu kua bidimu bia 1960. Mpindieu mu ditunga dijima mudi Bantemu ba Yehowa pabuipi ne 900 mu bisumbu 21 binene ne bikese.

Bamisionere bakafika mu 1987 ne bakenza mudimu ne tshisumbu tshimue tshivua mu Conakry. Mpindieu kudi bamisionere bapite pa 20 mu tshimenga tshikulu ne munda mua ditunga. Badi bambuluisha bisumbu ne lukunukunu  ne badi bayisha pamue ne bana betu ba mu ditunga edi.

Luc, udi musombele mu Conakry wakapeta disanka dia kulonga Bible ne Albert, nsongalume kampanda udi doktere. Albert uvua mukebe bulelela mu bitendelelu bia bungi ne uvua upakisha manga. Uvua ne mpeta uvua muena manga mumupeshe bua ikale ne dikasa dimpe. Panyima pa Albert mumane kupangila mu dikeba diende dia tshitendelelu tshilelela, wakimansha mpeta wende au ne kusambila ne: “Nzambi, wewe koku, enza bua nkumanye ne nkuenzele mudimu. Tshianana, nengikale ndienzela malu mu wanyi mushindu.” Mutantshi mukese eu pashishe, Albert wakaya ku nzubu kua yayende ne kumvuaye Ntemu wa Yehowa kampanda ulonga ne muana wa yayende. Pashishe, bakalongolola bua Albert alonge Bible ne Luc.

Lumingu luonso, Luc uvua wenda ne disanka dionso kilometre 5 mu diya ne 5 mu dialukila bua kulonga ne Albert. Nansha muvua Luc kayi mulonge tulasa tua bungi, Albert uvua mulonge iniversite uvua ukema bua ditabuja diende dikole dia malu a mu Bible ne mushindu uvuaye uatumikila. Albert wakasanka bikole pakamanyaye ne: makenga a bantu kaena afumina kudi Nzambi to, kadi pamutu pa nanku, Yehowa mmulongolole bua kujikija makenga onso ne kukudimuna buloba ebu mparadizu. (Musambu 37:9-11) Malu malelela a mu Bible kusangisha ne bikadilu bilenga bia bena mu tshisumbu biakalenga Albert ku muoyo.

Kadi anu mudi mumanyi mupiluke mua kusonga dibue dia mbongo bimpe ne kumbusha manyanu onso bua dibue edi kubalakanadi, ke muvua Albert pende ne bua kumbusha bikadilu bibi bia bena panu bua kuikala ne nsombelu udi umvuangana ne mikenji miakane ya Nzambi. Wakalekela kuya kudi bena manga, kulekela dikuatshika maluvu ne manaya a mfranga. Kadi biakakolela Albert bua kulekela mfuanka. Ndekelu wa bionso wakalekela dinua mfuanka pakalombaye diambuluisha kudi Yehowa. Ngondo isambombo pashishe, wakafundisha dibaka diende kua mbulamatadi. Mukajende wakabangisha pende kulonga Bible. Mpindieu bonso babidi bakadi basadidi ba Yehowa batambule.

Martin udi pende anu bu dibue dia mbongo dia mu nyuma. Wakatuadija kulonga Bible mu  tshimenga tshia Guéckédou pavuaye ne bidimu 15. Baledi bende bavua bena Katolike ne bakabenga bua ikale ubuela mu bisangilu bia Bantemu ba Yehowa. Bakapandila Martin mikanda yende ya malu a Nzambi, kumututabu ne kumuipatabu ku mbelu. Anu mutu carbone kafinakane bikole menemene kalua dibue dia mbongo, Martin pende wakakola mu dinanga dia malu a mu Bible bua dimukengesha divuabu bamukengesha. Kadi baledi bende bakalua kuteketa ne yeye kupingana ku mbelu. Ntshinyi tshiakambuluisha baledi bende bua kushintuluka? Bakamona dishilangana dinene pankatshi pa bikadilu bia Martin ne bia bakunyi bende, bakavua balue bantomboji ne bena tshiendenda tshia masandi. Tatuende wakamona ne: tshitendelelu tshipiatshipia tshia Martin tshivua tshimpe, ne wakabangisha kuakidila bena mu tshisumbu kuende. Mamuende wa Martin mmuele bana betu tuasakidila misangu ya bungi bua bionso bidibu benzele muanende. Martin wakatambula ne bidimu 18, kuluaye kubuela pashishe mu Kalasa ka Dilongesha Mudimu ne mpindieu udi mpanda-njila wa pa buende.

Biuma bia mu nyuma bifumine ku ba bende

Nansha mudi ditunga dia Guinée disumbisha biuma biadi bia bungi bia mu buloba, bimue biuma bia mu nyuma bidi bifumina mu matunga makuabu. Bantu ba bungi mbumbukile mu matunga makuabu a mu Afrike, nangananga bua lutatu lua mfranga. Bakuabu pabu mbanyeme mvita mikole ikadi muenze matuku a bungi.

Ernestine wa mu ditunga dia Cameroun uvua mulue mu Guinée kukadi bidimu 12. Wakalonga ne Bantemu ba Yehowa ne kubuela mu bisangilu munkatshi mua bidimu bia bungi, kadi kayi utambula to. Mu 2003 pakamonaye muvuabu batambuisha bantu mu mpuilu wa tshijengu, binsonji biakamutengebela muisu. Wakatuadija kudilumbuluisha, ne kusambilaye Yehowa ne: “Nzambi wanyi, nkadi ne bidimu 51, ne tshiena mukuenzele bualu buimpe nansha bumue. Ndi musue kukuenzela mudimu.” Pashishe, Ernestine wakenza malu bilondeshile disambila diende.  Wakambila mulume uvua mumubanjije ne: bavua ne bua kushala pamue anu bobu bafundishe dibaka diabu kua mbulamatadi. Mulume au wakitaba, ne Ernestine wakapuekesha binsonji bia disanka pakatambulaye yeye muine mu ngondo wa 11 mu 2004.

Katshia ku ntuadijilu kua bidimu bia 1990, ditunga dia Guinée ndiakidile bena tshimuangi ba bungi ba mu ditunga dia Liberia ne dia Sierra Leone. Munkatshi mua bena tshimuangi aba muvua basadidi ba bungi ba Yehowa. Diakamue patu bana betu bafika mu kamponya ka bena tshimuangi, batu balongolola bisangilu, mudimu wa buambi ne basa Nzubu wa Bukalenge. Bamue bantu mbalue basadidi ba Yehowa anu mu tumponya amu. Isaac ngumue wa munkatshi muabu. Panyima pa batismo wende, wakapeta mushindu wa kupingana ku mudimu wende mu kumpanyi kampanda munene wa mu Liberia. Kadi wakasungula bua kushala mpanda-njila wa pa tshibidilu mu kamponya ka bena tshimuangi ka Lainé. Udi wamba ne: “Mpindieu tshiena ne bualu bua kulomba mfumu wa mudimu bua kuya mu bisangilu anyi mu mpuilu. Ndi ngenzela Yehowa mudimu mudikadile.” Mu ngondo wa 12 mu 2003, bakalongolola mpungilu wa distrike bua Bantemu 150 ba mu kamponya ka kule aka kadi ne bena tshimuangi 30 000. Bualu bua disanka mbua se: bantu 591 bakabuelamu, ne munkatshi muabu muvua tumama 9 tuvua tulonde ndongamu mu muakulu wa tumama. Bantu 12 bakatambula. Bana betu bakanyisha bikole bionso bivua bienzeke bua bobu kubuela mu tshibilu tshinene atshi.

Bantu badi bu “biuma” badi bashintulula nsombelu

Bantu batu bakeba or anyi mbongo, kabatu balekela tshintu nansha tshimue tshibapumbisha. Bia muomumue, bidi bikolesha ku muoyo bua kumona mudi bantu bapiabapia badienzeja bua kulekela bintu bionso bidi mua kubapumbisha bua kuenzela Yehowa mudimu. Tuangate tshilejilu tshia Zainab.

Pavua Zainab ne bidimu 13, bakamuvuija mupika ku bukole. Bakamumbusha mu ditunga diabu anu ku Ouest kua Afrike aku ne kuya nende mu Guinée. Pakakumbajaye bidimu 20, wakumvua mukenji wa mu Bible. Wakadienzeja ne disanka dionso bua kutumikila bivuaye ulonga.

Bivua bikole bua Zainab kubuelaye mu bisangilu bia bena Kristo bua kutendelela Yehowa. Kadi uvua munange bisangilu bikole ne kavua musue kuikala ubipumbisha. (Ebelu 10:24, 25) Uvua usokoka mikanda yende pambelu pa lupangu bua kuyangata pavuaye ne bua kuya mu bisangilu. Misangu ya bungi, aba bavua badiamba ne: mbamfumu bende, bavua bamututa ne tshikisu tshikole bualu uvua ubuela mu bisangilu.

Malu akashintuluka pashishe, ne Zainab wakapeta budikadidi. Diakamue wakabangisha kubuela mu bisangilu bionso ne biakamuambuluisha bua kukola mu nyuma ne lukasa. Wakabenga mudimu wa mfranga ya bungi uvua mua kumupangisha bua kubuela mu bisangilu ne kulonga malu a bena Kristo. Wakadifundisha mu Kalasa ka Mudimu wa Nzambi, kuluaye mumanyishi wa Bukalenge udi kayi mutambule, ne pashishe kutambulaye bua kuleja muvuaye mudilambule kudi Nzambi. Diakamue panyima pa ditambula diende, wakatuadija bumpanda-njila buambuluishi. Ngondo isambombo pashishe, wakalomba bua kulua mpanda-njila wa pa tshibidilu.

Muntu mukuabu uvua wanyisha malu a mu Bible ne ukavua ubuela mu bisangilu, wakamba ne: “Tshiena ndiumvua mulanda pandi muaba eu to.” Padi bantu ba bungi bakeba anu biuma bia muinshi mua buloba bidi mu Guinée, bantu badi banange Yehowa bobu badi bakeba biuma bia mu nyuma. Bulelela, “biuma bia mu bukua bisamba” bidi bilua mu ntendelelu mukezuke wa Yehowa lelu!

[Kazubu mu dibeji 8]

GUINÉE-2005

Bungi bua Bantemu: 883

Malonga a Bible: 1 710

Bantu bavua mu Tshivulukilu: 3 255

[Tuarte mu dibeji 8]

(Bua kumona malu bimpe, tangila mu mukanda)

GUINÉE

Conakry

SIERRA LEONE

LIBERIA

[Tshimfuanyi mu dibeji 9]

Albert ne Luc

[Tshimfuanyi mu dibeji 9]

Nzubu wa Bukalenge mu Conakry

[Tshimfuanyi mu dibeji 10]

Ernestine

[Tshimfuanyi mu dibeji 10]

Martin

[Tshimfuanyi mu dibeji 10]

Zainab

[Mêyi a dianyisha bua tshimfuanyi mu dibeji 8]

USAID