Tudiku mua kufika ku dimanya Nzambi anyi?

‘Eu udi muoyo wa tshiendelele, bua bobu bamanye nzambi umuepele mulelela.’​—Yone 17:3.

PAULO wakakema wamba ne: ‘Monayi ndondo wa bubanji bua meji ne lungenyi bia Nzambi!’ Kuambaye kabidi ne: ‘Monayi mutudi katuyi mua kujingulula bilumbuluidi biende, mutudi katuyi mua kulonda njila yende!’ (Lomo 11:33) Bilondeshile mêyi aa, tudiku mua kuamba ne: muntu kêna mua kupeta meji ne dimanya dia Nzambi, ne nunku kakuena mushindu wa kumumanya ne kumanya malu adiye mulongolole anyi?

Bena mu bimue bitendelelu batu bela meji ne: kakuena mushindu wa kumanya Nzambi to. Mukanda mukuabu udi wamba bua ngelelu wa meji eu ne: “Nzambi udi ku mutu kua malu onso adi bantu mua kumanya pa bidi bimutangila. . . . Kakuena mushindu wa kupesha Nzambi dîna anyi kumvuija tshidiye. Dîna anyi diumvuija dia mushindu kayi dionso didi dimuelela mikalu, kadi Nzambi katu ne mikalu. . . . Kakuena mushindu wa kumumanya, bualu udi ku mutu kua dimanya dionso.” *​—The Encyclopedia of Religion.

Bilondeshile tshikandakanda tshikuabu, bantu ba bungi ba mu matunga adibu kabayi basue kutendelela badi bitaba “lungenyi lupialupia” ludi luamba mudiku “anu bulelela bumuepele bua ne: bulelela kabutuku to.”​—Newsweek.

Kadi bantu ba bungi kabena bapeta mandamuna a nkonko idi itangila mushinga udi nawu muoyo wa muntu. Badi bamona ntatu idi ifumina ku bupele, masama ne tshikisu. Badi bateketa ku muoyo padibu bamona muoyo muikale anu mu njiwu misangu yonso. Mbasue kupeta mandamuna, kadi padibu kabayi baapeta, badi bela meji ne: kaatuku. Ke bualu kayi ba bungi ba ku bantu aba mbapatuke mu bitendelelu, ne bikalabu batshidi bitabuja ne: Nzambi udiku, badi badikebela wabu mushindu wa kusemena kudiye.

Tshidi Bible wamba

Bantu badi banyisha Bible, ne badi bitaba Yezu Kristo bu Muleji-mpala wa Nzambi badi ne bua kumanya tshidi Bible wamba. Udi pamuapa uvuluka musangu uvua Yezu muakule bua njila ibidi, ‘njila wa kabutu udi munene’ ne ‘njila wa muoyo udi mubumbakane.’  Wakumvuija mushindu wa kumanya bantu bavua bendela mu njila yonso eyi, wamba ne: “Nenubajingulule ku mamuma abo.” Mamuma a mushindu kayi? Ki nku malu adibu bamba kadi ku malu adibu benza, anu muvua Yezu muleje patoke ne: ‘Bantu batu bambikila ne: Mukalenge, Mukalenge, kabena babuela bonso mu bukalenge bua mu diulu, anu yeye utu wenza bu mudi Tatu wanyi udi mu diulu musue.’ Kuamba patupu ne: tudi tuitabuja Nzambi ki nkukumbane to. Tudi ne bua kuenza disua dia Nzambi. Nunku, tudi ne bua kuanji kupeta dimanya dijalame dia disua dia Nzambi.​—Matayo 7:13-23.

Yezu wakaleja patoke ne: bantu badi mua kumanya Nzambi. Wakamba ne: ‘Eu udi muoyo wa tshiendelele, bua bobu bakumanye wewe, Nzambi umuepele mulelela, ne yeye uwakatuma, Yezu Kristo.’ (Yone 17:3) Nunku, tudi mua kupeta meji ne dimanya bidi Nzambi ufila, kadi anu tuetu tudienzeja bua kubipeta. Tshidibi, Nzambi mmulaye bua kupesha bantu badi benza nunku muoyo wa tshiendelele. Nunku, dikeba edi didi ne mushinga wa bungi.

[Mêyi adi kuinshi]

[Tshimfuanyi mu dibeji 4]

Yezu wakamba ne: njila mubumbakane udi ufikisha ku muoyo