Badi bibaka mu buobumue bua kutumbisha Nzambi

PAVUA bantu ba mu tshidila tshia Salomon babandila Nzubu kampanda wa Bukalenge mupiamupia wa Bantemu ba Yehowa, mamu mukuabu wakamba ne: “Mu Nzambi muetu mudi malu a bungi adibu balongolole bua kumona mua kupeta makuta a bungi mu tshitendelelu. Tudi tuambila bena kuitabuja betu bua kuelabu makuta, kadi katuena banji kupeta makuta makumbane bua kuasa nzubu wa Nzambi mupiamupia nansha. Kadi nuenu Bantemu aba enu makuta nutu nupeta kuepi?” Muanetu wa bakaji uvuaye wambila bualu ebu wakamuandamuna pende ne: “Tuetu tudi tutendelela Yehowa bu bana ba muntu umue pa buloba bujima. Bana betu ba mu tshisumbu tshietu ne bakuabu ba pa buloba bujima mbadi bafile bionso bivua bikengedibua bua kuasa Nzubu wa Bukalenge mupiamupia eu. Yehowa mmutulongeshe bua kuikala tshintu tshimue mu malu onso.”

Tangila buobumue budi munkatshi mua Bantemu ba Yehowa mu malu abu onso nansha too ne mu dibaka dia binunu ne binunu bia Nzubu yabu ya Bukalenge. Buobumue bua nunku mu malu aa ki mbubange anu lelu to. Buvua kabidi munkatshi mua bantu ba Nzambi ba kale. Tudi tuamba nanku bua tshinyi?

Dibaka dia Nzubu wa tshijila ne dia ntempelo

Yehowa uvua ne tshisamba tshia Isalele mu meji pakambilaye Mose kukadi mpindieu bidimu bipite pa 3 500 ne: ‘Bangashile Nzubu wa tshijila.’ (Ekesode 25:8, MMM) Yehowa wakalua kuamba bua mushindu uvuabu ne bua kumuasa ne: ‘Nuenze nzubu eu ne bintu bionso bia kutekamu anu mushindu ungakuleja.’ (Ekesode 25:9, MMM) Panyima Yehowa e kulua kumuleja plan wa mushindu wa kuibaka nzubu au, bintu bia kutekamu ne bikuabu. (Ekesode 25:10–27:19) “Nzubu wa tshijila” anyi ntenta au uvua ne bua kulua muaba munene wa ntendelelu mulelela bua bena Isalele bonso.

Katuena bamanye bungi bua bantu bakenza mudimu wa dibaka au to, tshikola muena Isalele yonso uvua ne bua kuukuatshisha pende. Mose wakabambila ne: ‘Nusangishe bintu binudi nabio bua kulambula Yehowa. Bantu bonso ba muoyo muimpe balambule Yehowa milambo eyi.’ (Ekesode 35:4-9, MMM) Ntshinyi tshiakenza bena Isalele? Ekesode 36:3 udi wamba ne: ‘Bobu bakangata ku bianza bia Mose bintu bionso biakafila bena Isalele ne disanka bua kuenza nabi bintu bionso bia mu nzubu wa tshitendelelu. Bakatshidi balua kudiye ne bintu biakadi mitshima yabu misue ku dinda ku dinda.’

Katupa aka bintu bivuabu bafile kuluabi mushiki, bantu pabu batungunuke anu kulua ne bikuabu bungibi. Bansenda bavuabu bapeshe mudimu wa kufula bintu ebi kuambilabu Mose ne: ‘Bantu mbalue ne bintu bitambe bungi bia kuenza nabi mudimu wakuamba Yehowa.’ Ke Mose kuela dîyi ne: “Nansha mulume nansha mukaji kalu [kabidi] ne bintu bikuabu bia [kuasa nabi nzubu wa] tshitendelelu.” Tshiakamueneka ntshinyi? “Bobo bakadi ne bungi bua bintu bia kuenza nabi mudimu wonso, ne bintu bikuabu pa mutu.”​—Ekesode 36:4-7.

 Bua muoyo wa difila bintu uvua nawu bena Isalele, bakajikija dibaka dia nzubu wa tshijila mu tshidimu tshimue patupu. (Ekesode 19:1; 40:1, 2) Pavua bantu ba Yehowa bakuatshishe mudimu wa ntendelelu wende mulelela eu, bavua bamutumbishe bikole. (Nsumuinu 3:9) Mu matuku avua alua, bavua mua kulua kuenza kabidi mudimu munene menemene wa dibaka. Musangu au kabidi muntu yonso uvua musue bua kutua pende bianza ku mudimu eu uvua anu mua kuenza nanku, nansha yeye mumanye kuibaka anyi kayi mukumanye.

Kunyima kua bidimu bu nkama itanu bena Isalele bamane kuibaka Nzubu wa tshijila, bakatuadija kabidi kuibaka ntempelo mu Yelushalema. (1 Bakelenge 6:1) Ntempelo au uvua ne bua kuikala nzubu wa dikema, wa kabayi basa balua kujula kabidi, muibaka ne mabue ne mabaya. (1 Bakelenge 5:17, 18) Yehowa wakapesha Davidi plan ya mushindu wa kuibaka ntempelo au ku diambuluisha dia nyuma wende. (1 Kulondolola 28:11-19) Kadi wakasungula Solomo muana wa Davidi bua kulombola mudimu au. (1 Kulondolola 22:6-10) Davidi wakakuatshisha mudimu eu ne muoyo mujima. Wakakeba mabue, mikamba ne bikuabu bintu bia dibaka nabi, kufilaye kabidi or ne argent bungi tshianana. Wakambila kabidi bena Isalele nende bua kuikala ne tshianza tshitekesha, yeye kubebeja ne: ‘Kunudi eku, nnganyi udi musue pende kulambula Yehowa bintu?’ Bena Isalele bakamba tshinyi?​—1 Kulondolola 29:1-5.

Tshikondo tshiakatuadija Solomo kuibaka ntempelo, uvua ne or ne argent bungi tshianana, kabiyi kubala. Biamu bia mitaku ne biamu bifike bivua bungi tshiakaa kakuyi nansha mushindu wa kubipima kumanya bungi buabi. (1 Kulondolola 22:14-16) Mudimu wa ntempelo au wakajika mu bidimu anu 7 patupu ne tshitupa, bionso abi anu bua diambuluisha dia Yehowa nkayende ne dikuatshisha dia bena Isalele.​—1 Bakelenge 6:1, 37, 38.

‘Nzubu wa Nzambi’ mulelela

Bavua babikila nzubu wa tshijila ne ntempelo ne: ‘Nzubu wa Nzambi’ mulelela. (Balumbuluishi 18:31; 2 Kulondolola 24:7) Kadi Yehowa katu dijinga ne nzubu wa kuikishila to. (Yeshaya 66:1) Wakibakishisha nzubu ayi anu bua diakalenga dia bantu. Ke bualu kayi Solomo wakebeja mu dituku dia dibanjija dia ntempelo au ne: ‘Kadi Nzambi neitabuje bua kuikalaye pa buloba anyi? Monayi, diulu ne diulu ditambe mulu kaena makukumbane, nzubu eu ungakukuashila se neikale mupite bukese!’​—1 Bakelenge 8:27.

Yehowa wakamba mukana mua muprofete wende  Yeshaya ne: ‘Nebabikile nzubu wanyi ne: Nzubu wa tshitendelelu tshia bantu bonso.’ (Yeshaya 56:7) Milambu ne masambila ne makuabu malu avua enzeka mu ntempelo au avua apetesha bantu bavua batshina Nzambi, bena Yuda ne bantu bakuabu, mushindu wa kuluabu balunda bende. Pavuabu batendelela Yehowa mu nzubu wende, uvua ubakuba, bobu pabu balua balunda bende. Disambila diakenza Solomo dituku diakabanjijabu ntempelo didi dijadika bualu ebu. Udi mua kubala mêyi a dikema akambilaye Nzambi mu disambila diende mu 1 Bakelenge 8:22-53 ne mu 2 Kulondolola 6:12-42.

Nzubu wa kale wa Nzambi mulelela au bakamubumbula, kadi Dîyi dia Nzambi dikavua dileje tshikondo tshivuabu ne bua kusangisha bantu ba mu matunga onso bua kutendelela Yehowa mu ntempelo wende mutambe bunene wa mu nyuma. (Yeshaya 2:2) Milambu ya nyama ivuabu balambula ku ntempelo, ivua mundidimbi wa mulambu kauyi katoba wa Muana umuepele mulela wa Nzambi; mulambu eu ke mushindu uvua bantu mua kudila bulunda ne Yehowa. (Yone 14:6; Ebelu 7:27; 9:12) Bantemu ba Yehowa badi batendelela Nzambi mushindu au udi mutambe yonso, badi bambuluisha kabidi bantu bakuabu bua kutendelelabu pabu Nzambi nanku.

Mudibu bibaka matuku etu aa

Bantemu ba Yehowa badi bakuatshila Nzambi mulelela mudimu pa buloba bujima. Badi ‘tshisamba’ tshikole tshidi ne bungi bua bantu badimu buenda anu buvula. (Yeshaya 60:22) Muaba munene utu Bantemu ba Yehowa benzela bisangilu biabu nku Nzubu wa Bukalenge. * Batu badisangishila mu binunu ne binunu bia nzubu ayi nansha mutshidiku anu dijinga dia kupeta mikuabu binunu ne binunu.

Bantemu ba Yehowa batu ‘badifila ne disanka’ bobu nkayabu bua kuibaka Nzubu ya Bukalenge idibu nayi dijinga. (Musambu 110:3) Kadi pamuapa Bantemu ba miaba ya bungi kabatu bamanye kuibaka bimpe to, kabidi imue miaba idi mudimu wetu wenda utanta bikole, bana betu ba bungi miaba ayi batu mu bupele bukole. Mu 1999 Kasumbu Kaludiki ka Bantemu ba Yehowa kakatuadija dibaka dia Nzubu ya Bukalenge bua kujikija lutatu elu. Mudimu eu mmufikishe Bantemu badi bamanye kuibaka bua kuya miaba ya kule bua kulongeshaku bana betu ba bakaji ne ba balume mua kuibaka Nzubu ya Bukalenge. Pashishe bana betu badibu balongesha mudimu aba badi batungunuka ne kuibaka Nzubu ya Bukalenge mu tshitupa atshi. Bionso ebi mbipatule tshinyi?

Mu ngondo muibidi wa 2006, Bantemu ba Yehowa ba mu matunga mudi bantu kabayi ne makuta a bungi mbapete Nzubu ya Bukalenge mipiamipia mipite pa 13 000. Mona tshiakamba bamue bakadibu bibakile Nzubu ya Bukalenge eyi.

“Mu tshisumbu tshietu muvua bantu 160 bavua batamba kubuela mu bisangilu. Kadi mu tshisangilu tshia kumpala tshituakenzela mu Nzubu wetu wa Bukalenge mupiamupia, bantu 200 bakabuelamu. Mpindieu ukadi ngondo 6 mipite, bantu 230 mbakadi babuelamu. Mbidimuenekele patoke mudi Yehowa ukuatshisha midimu ya dibaka dia nzubu ya mushinga mukumbanyine eyi kadi mikale yambuluisha bikole bua bisangilu bietu.”​—Mutangidi wa tshijengu mu ditunga dia Équateur.

“Bantu mbatuebeje munkatshi mua bidimu bia bungi ne: ‘Ndîba kayi dinuapetaku penu Nzubu wa Bukalenge wa buena itutu tumona mu foto mu mikanda yenu?’ Ndekelu wa bionso Yehowa e kutuambuluisha, mpindieu tukadi ne muaba muimpe wa kutendelela. Tuvua tuenzela bisangilu bietu mu depo wa muanetu mukuabu muvua bantu batue ku 30 balua kubuela. Mu tshisangilu tshietu tshia kumpala tshia mu Nzubu wa Bukalenge mupiamupia, bantu 110 bakabuelamu.”​—Tshisumbu tshia mu Ouganda.

 “Bana betu ba bakaji babidi bampanda-njila ba pa tshibidilu badi bamba ne: katshia batuibakila Nzubu wa Bukalenge, bitu bitusankisha bikole bua kuyisha mu teritware wa tshisumbu tshietu. Bantu badi batuteleja patudi tuyisha ku nzubu ne ku nzubu ne padi mpunga umueneka. Bana betu ba bakaji aba badi balonga mpindieu Bible ne bantu 17 ne ba bungi ba ku balongi babu abu batu babuela mu bisangilu.”​—Biro bietu bia mu Bidila bia Salomon.

“Mpasata mukuabu udi lua pabuipi ne Nzubu wetu wa Bukalenge wakamba ne: nzubu eu mmulengejije muaba eu ne bantu bonso ba tshitupa etshi bakadi baditambisha anu bua Nzubu wa Bukalenge eu. Bapitshi ba njila ba bungi badi anu banyisha mudi nzubu eu muimpe. Malu aa adi apetesha bana betu mushindu wa kuyisha. Bantu ba bungi bakadi anu bakeba kumanya mutudi ne bana betu ba buloba bujima. Bakuabu bakavua balekele dibuela mu bisangilu mbibasake bua kuikala kubuelamu kabidi.”​—Biro bietu bia mu Myanmar (Birmanie).

“Muanetu mukuabu wa bakaji wakabikila tatu mukuabu muaba uvuabu bibaka Nzubu wa Bukalenge pabuipi nende. Tatu au wakalua kuamba ne: ‘Mvua ngela meji ne: bavua benza mudimu muaba au kabavua mua kungitabila bua kudiatapu to. Kadi biakankemesha bikole pavua Bantemu abu bangele muoyo ne disanka. Balume ne bakaji bavua munkatshi mua dienza mudimu mukole, kakuyi uvua ujimija dîba patupu to. Buonso buabu bavua benza mudimu mu diumvuangana ne disanka.’ Tatu au kuitabaye bua kulonga Bible yeye kutuadija dibuela too ne mu bisangilu. Wakalua kuamba kabidi ne: ‘Lungenyi ndunshintuluke. Mpindieu unkadi mupete Nzambi eu, tshiakumulekela kabidi nansha bia munyi.’”​—Biro bietu bia mu Colombie.

 Mbimpe tuikale tukuatshisha petu mudimu eu

Dibaka dia Nzubu ya Bukalenge ntshitupa tshinene tshia mudimu wetu wa tshijila. Mushindu udi Bantemu ba Yehowa pa buloba bujima bakuatshishe mudimu eu ne makuta anyi ne bintu bikuabu, mbakumbanyine kalumbandi menemene. Kadi katupu muoyo bua se: malu makuabu adi atangila mudimu wetu wa tshijila adi pawu ne mushinga. Imue misangu, bikumina ne mvula mikole ne bipepele bikole bitu bikengesha bena Kristo bakuabu ne bilomba bua tuetu kubambuluisha. Dipatula dia mikanda yetu ya malu a mu Bible ditu dikuatshisha mudimu wetu wa tshijila bikole. Tukadiku anu bamone diambuluisha didi nadi mikanda yetu ya malu a mu Bible anyi bibejibeji bitutu tushila bantu badi banange Dîyi dia Nzambi. Kabidi kukuatshisha bamisionere ne bana betu bakuabu badi mu mudimu wa tshijila wa pa buawu kudi paku ne mushinga wa bungi. Bana betu badi badifila nunku eu aba badi bakuata mudimu mukole bua mudimu wa diyisha kuyawu kumpala mu matuku a ku nshikidilu aa.

Bantu bonso bakafila diambuluisha pavuabu bibaka ntempelo bakasanka bikole. (1 Kulondolola 29:9) Lelu eu, tudi petu tupeta disanka patudi tufila bietu bintu bua kukuatshisha ntendelelu mulelela. (Bienzedi 20:35) Tudi tumvua disanka edi patudi tuela makuta mu kashete bua dibaka dia Nzubu ya Bukalenge ne bua mudimu wetu udi wenzeka pa buloba bujima, biambuluisha kabidi mikuabu midimu idi yenda pamue ne mudimu wetu wa diyisha. Bantemu ba Yehowa lelu eu badi mu buobumue bua dikema mu ntendelelu mulelela! Nanku tuetu bonso tuikale ne disanka dia kukuatshisha ntendelelu mulelela ne bintu bietu!

[Mêyi adi kuinshi]

[Kazubu/​Tshimfuanyi mu mabeji 20, 21]

MISHINDU IDI BAMUE BAFILA MAPA

MAPA BUA MUDIMU WA PA BULOBA BUJIMA

Bantu bavule batu balama ndambu wa mfranga bua kuela mu tushete tua “Mapa bua mudimu wa pa buloba bujima​—Matayo 24:14.”

Ku ngondo yonso bisumbu bitu bituma mfranga eyi ku biro bia Bantemu ba Yehowa bidi bitangila mudimu wa ditunga diabi. Bantu badi mua kutuma kabidi mfranga eyi buludiludi ku Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, anyi ku biro bia Bantemu ba Yehowa bidi bitangila mudimu wa ditunga diabu. Sheke ya mfranga idibu batuma mu adrese eu idi ne bua kuikala mu dîna dia “Watch Tower.” Nudi mua kufila nansha bilengejilu bu mudi mpeta ne bikanu bia or peshi bintu bikuabu bia mushinga mukole. Mapa enu aa nuatume ne mukanda muipi udi uleja ne: nudi baatume bua kashidi.

DILAMISHA MAKUTA

Muntu udi mua kusombesha Watch Tower mfranga bua enza nayi mudimu miaba yonso idiye musue pa buloba bujima. Kadi padi muntu au nawu dijinga badi bamupingajilawu musangu umue. Wewe musue kumanya malu makuabu, udi mua kufundila biro bia Treasurer’s Office mu adrese udi kuulu eku.

MAPA MALONGOLOLA

Pa kumusha mapa a mfranga mifila bua kashidi, kudi mishindu mikuabu ya kufila bintu bua mudimu wa Bukalenge udi wenzeka pa buloba bujima. Tudi mua kutela:

Mfranga ya tshieya: Muntu udi mua kushila Watch Tower bukenji bua kuangata mfranga yende ya tshieya anyi ya pansio.

Konte ya ku banke: Muntu udi mua kufundisha konte yende ya ku banke, mikanda ya mfranga mitekesha ku banke anyi konte yende ya mfranga ya pansio mu dîna dia Watch Tower anyi kufunda bua kuyifutabu Watch Tower dîba dia lufu luende, bilondeshile mikenji ya banke ya muaba udiye.

Bukenji bua kupeta bintu ne mfranga misombesha: Badi mua kupesha Watch Tower bukenji bua kupeta bintu ne mfranga misombesha bu dipa dia kashidi.

Mpangu ne Nzubu: Muntu udi mua kufila lupangu anyi nzubu wende bua kashidi, kadi utungunuka ne kusombamu patshidiye ne muoyo. Bidi bikengela kumanyisha biro bia filiale bidi mu ditunga dienu kumpala kua kumupesha lupangu anyi nzubu.

Dipa dia kufuta ku tshidimu: Etshi ndipa dia muntu wangata makuta anyi mikanda ubifila kudi biro bia Bantemu ba Yehowa. Pashishe muntu eu (anyi mukuabu udiye musungule) udi utuadija kupeta makuta bungi kampanda tshidimu tshionso patshidiye ne muoyo. Tshidimu tshidi muntu ufila dipa edi badi bamupuekeshila mushinga wa bitadi bituye ufuta.

Testama ne bintu bilamisha: Muntu udi mua kushila Watch Tower bintu anyi mfranga yende, peshi kumupa bukenji bua kuangata bintu bidiye mulamisha. Badi mua kukepesha mushinga wa bitadi padi bintu bitekesha mu dîna dia tshitendelelu.

Anu mudi miaku eyi: “mapa malongolola” ileja, mapa a mushindu eu atu alomba bua muntu adianjile kudilongolola. Bua kuambuluisha bantu badi bajinga kukuatshisha mudimu udi Bantemu ba Yehowa benza pa buloba bujima ne mapa malongolola, mbapatule kakanda ka mu Anglais ne mu tshiena-Espagne kadi ne tshiena-bualu tshia ne: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Bavua bafunde kakanda aka bua kuleja mishindu mishilangane idibu mua kufila mapa ne bintu bia bumpianyi. Kunyima kua bantu ba bungi bamane kubala kakanda aka ne bayukile ne aba batu babapesha mibelu mu malu a mikenji anyi a bitadi, mbafike ku dikuatshisha mudimu wa Nzambi ne wa diambuluisha bantu udi Bantemu ba Yehowa benza pa buloba bujima, ne bungi bua makuta a bitadi biabu avuabu bafuta mbukepele. Udi mua kulomba kakanda aka ku Charitable Planning Office (Biro bia Mapa Malongolola).

Bua kumanya malu makuabu, udi mua kufundila Charitable Planning Office anyi kuela nshinga mu adrese udi kuinshi eku, peshi ku biro bia Bantemu ba Yehowa bidi bitangila mudimu mu ditunga dienu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707

[Tshimfuanyi mu dibeji 18]

Mudimu utudi tuenza mu buobumue udi utuambuluisha bua kuibaka Nzubu ya Bukalenge mimpe pa buloba bujima

[Tshimfuanyi mu dibeji 18]

Nzubu wa Bukalenge mupiamupia mu Ghana