Daniel ne kamanyinu kende ka Mpungilu

YEZU wakebeja bamfumu ba bitendelelu bavua badiamba mudibu bantu bakane eku bumvua bibatonda bua muvua bana bakese batumbisha Nzambi ku mêsu kua bantu bonso ne: ‘Nuenu kanuakubala dîyi ne: Wewe wakujadika butumbi buebe mukana mua bana bakese ne mua badi bamua mabele anyi?’​—Matayo 21:15, 16.

Bualu bua Daniel, muana mutekete wa bidimu bisambombo udi ubuela mu tshisumbu tshia muakulu wa tshiena-Russie mu ditunga dia Allemagne buakaleja ne: bana batshitu anu batumbisha Yehowa. Yeye ne mamuende ne yayende bakabuela mu mpungilu anyi tshisangilu tshinene tshia Bantemu ba Yehowa tshiakenzekela mu tshimenga tshia Duisburg. Uvua musangu wabu wa kumpala wa kubuela mu mpungilu munene wa nunku. Malu onso avua mapiamapia buabu bobu bu mudi: nzubu wa tshilala benyi, bungi bua bantu bavua babuela mu mpungilu, kushala basombe munkatshi mua matuku asatu majima, ditambula dia bantu, drama eku ne katushadi. Kadi Daniel muine uvua bishi? Uvua ne bukalanga.

Mu Dimue mu dinda panyima pa mpungilu bobu bamane kupingana kuabu, Daniel wakajuka ne dinda dionso bua kuya mu kalasa. Kadi ntshinyi tshitshivua ku ka nkotshi kende? Kamanyinu kende kavua kaleja ne: yeye pende uvua mu mpungilu au! Ke mamuende kumuambila ne: “Mpungilu ukadi mujike. Lelu udi mua kushiya kamanyinu kebe.” Kadi Daniel kumuambila ne: “Ndi musue bua muntu yonso amanye kumvua muye ne malu andi mulonge.” Dituku adi dijima mu kalasa Daniel uvua anu ne kamanyinu aku ku ka nkotshi kende. Pakamuebeja mulongeshi wabu tshivua kamanyinu aku kumvuija, yeye kumuambila malu avua menzeke mu mpungilu.

Nunku, Daniel wakatumbisha pende Yehowa bu muvua bana bakuabu ba bungi bamutumbishe ku mêsu kua bantu bonso kukadi mpindieu bidimu nkama ne nkama.