Mibelu mimpe ya mua kukolesha bana

RUTH udi wamba bua difu diende dia kumpala ne: “Mvua ne bidimu 19, musombele kule ne balela banyi ne tshivua mudilongolole mu bualu nansha bumue to.” Bu muvuaye mulela nkaya, kavua muele meji bua kulua muledi nansha. Mmuaba kayi uvuaye mua kupeta mibelu mimpe?

Ku luende luseke, Jan udi mpindieu tatu wa bana babidi bakole, udi wamba ne: “Mvua ndieyemena bikole kumpala. Kadi mutantshi mukese meme kujingulula ne: tshivua ne dimanya dia nsongo to.” Nansha baledi batuadije kukolesha bana kabayi bamanye tshia kuenza, anyi balue kutuadija kuelakana pashishe, mmuaba kayi udibu mua kupeta mibelu ya mushindu wa kukolesha bana?

Lelu, baledi ba bungi badi bakeba mibelu ku Internet. Kadi udi mua kudiebeja bikala mibelu idibu bapetaku mikale mimpe. Mbimpe wikale mudimuke. Udi mumanye bimpe bantu badi bakupesha mibelu ku Internet anyi? Bobu bine mbakolesha bana babu bimpe anyi? Kakuyi mpata, udi ne bua kuikala mudimuke bua malu adi alenga dîku diebe. Imue misangu, anu mudi tshiena-bualu tshishale tshileje, nansha mibelu mifila kudi bantu badi balonge bikole itu ilua kumueneka kayiyi mimpe. Mpindieu nkuepi kuudi mua kuya?

Yehowa Nzambi, Mufuki wa dîku ke udi mua kutupesha mibelu mimpe pa mushindu wa dikolesha bana. (Efeso 3:15) Yeye ke Mufidi wa mibelu munene. Mmufundishe mibelu mimpe ne idi ikuatshisha menemene mu Bible. (Musambu 32:8; Yeshaya 48:17, 18) Nunku tuetu ke badi ne bua kuyitumikila.

Bavua balombe baledi bavule bua kulonda malu avuabu balonge mu dikolesha dia bana babu bua kuluabu bantu badi batshina Nzambi ne bikale ne nkatshinkatshi pakolabu. Bakamba ne: bualu bua kumpala budi bubambuluishe nditumikila dia mêyi a mu Bible. Bakamona ne: mibelu ya mu Bible idi yambuluisha lelu anu muvuayi yambuluisha pakamufundabu.

Ikala usomba ne bana

Pakebejabu Catherine mamu wa bana babidi bua aleje mubelu uvua mutambe kumuambuluisha, wakatela diakamue Dutelonome 6:7. Mvese eu udi wamba ne: ‘Wewe neuyishe bana bebe [mêyi a mu Bible], wewe neusombelele nabu bua mêyi au, pawashikama mu nzubu webe, ne pawenda mu njila, ne pawalala, ne pawabika.’ Catherine wakamona ne: bua kulonda mubelu eu uvua ne bua kusomba ne bana bende.

Udi mua kuamba ne: ‘Kuamba nkutekete, kadi kuenza nkukole.’ Pikala baledi bonso babidi benza mudimu bua kudisha dîku diabu, mmunyi mudibu mua kupeta dîba dia bungi dia kusomba ne bana babu? Torlief, ukadi mukoleshe muana wa balume udi ne diende dîku mpindieu, udi wamba ne: muanda munene nkulonda mubelu wa mu Dutelonome. Ndaku ne bana bebe muaba wonso uudi uya, nunku neupete mishindu ya kuyukila nabu ya bungi. Torlief udi wamba ne: “Meme ne muananyi eu tuvua tulongolola pamue malu avua dîku dietu ne bua kuenza. Tuvua tuenza ngendu pamue mu dîku. Ne tuvua tudia pamue.” Bua bualu ebu udi wamba ne: “Muanetu uvua wakula netu mudilekelele.”

Kadi tshia kuenza ntshinyi bikala diyukidishangana dikale dia dikanuna? Bitu bienzeka nunku imue misangu padi bana benda bakola. Musangu eu kabidi, kutamba kusomba nabu kudi mua kuambuluisha. Ken bayende wa Catherine udi wamba ne: pakalua muanabu wa bakaji tshitende, uvua udiabakena ne: tatuende kavua umuteleja to. Bana ba bitende ba bungi batu badiabakena nanku. Ntshinyi tshivua Ken mua kuenza? Udi wamba ne: “Ngakangata dipangadika dia kusomba ne kuyukila nende bikole bua kumanya meji ende, muvuaye udiumvua ne malu avua amutatshisha. Bualu ebu buakamuambuluisha bikole.” (Nsumuinu 20:5) Kadi Ken udi wela meji  ne: ngenzelu eu mmuambuluishe bualu diyukidishangana mu dîku diabu kadivua bualu buenyi. Udi wamba ne: “Meme ne muananyi tuvua tumvuangana bikole, ke bualu kayi uvua umona ne: uvua mua kuyukila nanyi bipepele.”

Dilonga didibu benze matuku mashale aa ndileje ne: bana ba bitende batu bapepele bikole kupita baledi babu ku diamba ne: baledi ne bana kabena batamba kusomba pamue. Nunku bua tshinyi kubenga kulonda mibelu ya mu Bible? Ikala utamba kusomba ne bana bebe padiku mushindu: paudi muikishe ne paudi wenza mudimu, paudi kumbelu ne paudi wenza luendu, mu dinda paudi ubika ne butuku kumpala kua kulala. Padiku mushindu, uye nabu muaba wonso uudi uya. Anu mudi Dutelonome 6:7 uleja, kakuena tshidi mua kupingana pa muaba wa disomba ne bana bebe to.

Ubalongeshe mêyi a mushinga

Mario udi pende tatu wa bana babidi udi ubela baledi nende ne: “Unange bana bebe bikole, ne ikala ubabadila mikanda.” Kadi ki ntshilumbu patupu tshia kukolesha meji a bana to. Udi ne bua kubalongesha mua kutapulula tshimpe ne tshibi. Mario udi usakidila wamba ne: “Ikala ulonga nabu Bible.”

Bua kulongesha bana bimpe, Bible udi ubela baledi ne: ‘Nuenu batatu, kanufuishi bana benu balela tshiji; nubadiundishe bimpe ne dibela ne didimuija bia Mukalenge.’ (Efeso 6:4) Lelu mu mêku a bungi baledi kabena batamba kulongesha bana babu ngikadilu mimpe to. Bamue baledi badi bamba ne: pakola bana, nebadisunguile mêyi a mushinga ikalabu ne bua kulonda. Udiku umona pebe bualu ebu bu bua meji anyi? Anu mutu mibidi ya bana batekete ilomba diyidisha dimpe bua kukolayi ne makanda, ke mudibi bikengela kulongesha lungenyi luabu ne mioyo yabu. Biwikala kuyi ulongesha bana bebe mêyi a mushinga kumbelu, pamuapa nebalonde ngenyi ya balongi ne balongeshi babu anyi ya ku tudiomba ne mu bikandakanda.

Bible udi mua kuambuluisha baledi bua kulongesha bana babu mua kutapulula tshimpe ne tshibi. (2 Timote 3:16, 17) Jeff, mukulu muena Kristo mushindame ukadi mukoleshe bana babidi, udi ubela baledi bua kuangata Bible bua kulongesha nende bana mêyi a mushinga. Udi wamba ne: “Kulongesha ne Bible kudi kuambuluisha bana bua kujingulula mudi Mufuki umona bualu kampanda, kadi ki nganu mudi Mamu anyi Tatu ubumona nansha. Tudi bamone bukole bua pa buabu budi nabu Bible pa lungenyi ne muoyo. Bua kujikija ngenzelu anyi ngelelu wa meji mubi, tuvua tuanji kukeba mvese udi muakanyine. Pashishe, muaba wa pa nkayetu, tuvua tuambila muana bua abale mvese au. Misangu mivule muana uvua utuadija kudila kunyima kua dibala dia mvese. Bivua bitukemesha bikole. Bible uvua ne bukole bua bungi kupita tshintu kayi tshionso tshituvua mua kuelela meji bua kuamba anyi kuenza.”

Ebelu 4:12 udi umvuija ne: ‘Dîyi dia Nzambi didi ne muoyo ne bukole, didi dijingulula lukasa meji ne malu adi mutshima musue kuenza.’ Nunku malu adi mu Bible ki nngenyi ya bantu bavua Nzambi muangate bua kumufunda anyi malu avua mabafikile patupu nansha. Kadi adi aleja meji a Nzambi adi atangila ngikadilu wa kuikala nende. Ke bualu kayi mmashilangane ne mibelu mikuabu yonso. Paudi ulongesha bana bebe Bible, udi ubambuluisha bua kumanya meji a Nzambi bua malu mashilangane. Malu audi ulongesha muana neikale ne bujitu bua bungi ne neupete mushindu muimpe wa kulenga muoyo wende.

Catherine utudi batele kuulu eku udi witaba bualu ebu ne wamba ne: “Patuvua tupeta lutatu lukole menemene, tuvua tutamba kukeba mibelu mu Dîyi dia Nzambi, ne bivua bienda bimpe!” Udiku mua kutamba kuenza mudimu ne Bible paudi ulongesha bana bebe mua kutapulula tshimpe ne tshibi anyi?

Ikala muena bupole

Mupostolo Paulo udi uleja dîyi dikuabu dia mushinga didi diambuluisha bua kukolesha bana. Wakabela bena Kristo nende ne: ‘Bupole buenu bumanyibue kudi bantu bonso.’ (Filipoi 4:5) Bushuwa, abi bidi biumvuija kuleja bana mutudi bena malu mapole. Vuluka ne: bupole budi buleja ‘meji adi afuma mu diulu.’​—Yakobo 3:17.

Kadi ndiumvuangana kayi didi pankatshi pa bupole ne nkoleshilu wa bana? Nansha mutudi tudienzeja bikole bua kubambuluisha, katuena tulondolola bualu buonso budibu benza to. Tshilejilu,  Mario utudi batele kuulu eku udi Ntemu wa Yehowa, ne udi wamba ne: “Tuvua misangu yonso tukankamija bana betu bua kutambula, kuenza mudimu wa bumpanda-njila ne kuenza malu makuabu a mu mudimu wa Yehowa. Kadi tuvua tubatokeshila ne: bobu ke bavua ne bua kudisunguila tshia kuenza pavua tshikondo tshikumbana.” Ntshinyi tshidibu bapete bua bualu ebu? Bana babu bonso babidi badi mpindieu bampanda-njila.

Bible udi udimuija batatu mu Kolosai 3:21 ne: ‘Kanufikishi munda mua bana benu, bua mitshima yabu kayibungami.’ Catherine udi pende Ntemu wa Yehowa utu musue mvese eu be! Padi lutulu lua muledi lukepa, mbipepele bua kufika munda ne kubanga kuenzeja muana malu mapite bungi. Kadi udi wamba ne: “Kulombi muanebe bua enze malu anu muudi wewe ne bua kuenza to.” Udi wamba kabidi ne: “Enza bua dienzela Yehowa mudimu dikale bualu bua disanka.”

Jeff utudi batele kuulu eku udi ufila lungenyi luimpe elu ne: “Pavua bana betu benda bakola, mulunda wetu mukuabu wakatuambila muakajingululaye ne: uvua misangu ya bungi ubengela bana bende malu avuabu bamulomba. Bualu ebu buvua bubabungamija ne bubaleja ne: tuvua tubakengesha. Bua kuepuka bualu ebu, wakatuambila ne: tukebe mishindu ya kubitabila bidibu balomba.”

Jeff udi wamba ne: “Tuakamona mubelu eu muimpe. Ke tuetu kutuadija kukeba mushindu uvua bana betu mua kuenza malu atuvua tuanyisha ne bana bakuabu. Nunku tuvua tubabikila ne tubambila ne: ‘Nudi bamanye ne: kampanda wawa udi wenza bualu kansanga anyi? Bua tshinyi nuenu penu kanuena nuya?’ Peshi pavua bana batulomba bua kuya nabu muaba kampanda, tuvua tudienzeja bua kuya nansha patuvua bapungile. Tuvua tuenza nunku anu bua kuepuka dibabengela tshivuabu bakeba.” Atshi ke tshidi kuikala muena malu mapole kumvuija: kuikala muakane, kumvuila bakuabu ne kuitaba amue malu kakuyi dishipa mêyi a mu Bible.

Mibelu mimpe ikuambuluishe

Bavule ba ku baledi aba bakadi ne bankana. Badi basanka bua kumona mêyi amue amue a mu Bible aa ambuluisha bana babu bua kuikala baledi bimpe. Mibelu ya mu Bible idiku mua kukuambuluisha anyi?

Pavua Ruth utudi batele ku ntuadijilu mulue muledi, yeye ne bayende bavua imue misangu badimona kabayi ne pa kuimanyina. Kadi kabavua bapangile pa kuimanyina to. Bavua ne mibelu mitambe bulenga ya mu Bible Dîyi dia Nzambi. Bantemu ba Yehowa mbapatule mikanda milenga ya kulonga nayi Bible idi mua kuambuluisha baledi. Munkatshi muayi mudi Longa malu kudi Mulongeshi Munene, Miyuki ya mu Mukanda wa Nzambi, Les jeunes s’interrogent​—Réponses pratiques, ne Muntu mutambe bunene wa katshia ne katshia. Torlief bayende wa Ruth udi wamba ne: “Lelu kudi mibelu mipite bungi miangatshila mu Bible idi baledi mua kupeta bipepele. Bobu bayitumikile, idi mua kubambuluisha mu nsombelu ya mishindu yonso mu dikolesha dia bana babu.”

 [Kazubu/​Tshimfuanyi mu dibeji 5]

Tshidi BAFIDI BA MIBELU bamba . . . Tshidi BIBLE wamba

Bua kuleja dinanga:

Mu mukanda wende mukuabu wa mu 1928, Mulongeshi John Broadus Watson wakabela baledi ne: “Kanuedi [bana benu] mu tshitupa anyi kanubatu mishiku nansha kakese. Kanubalekedi basomba pambidi penu nansha kakese.” (The Psychological Care of Infant and Child) Kadi matuku adi panshi aa, Mulongeshi Vera Lane ne Mulongeshi Dorothy Molyneaux bakamba mu tshinga tshikandakanda tshia mu ngondo muisatu wa 1999 ne: “Malu makebulula adi aleja ne: bana batekete badibu kabayi balenga pambidi bua kubaleja dinanga batu misangu mivule bapangila bua kukola bimpe.”​—Our Children.

Kadi Yeshaya 66:12 udi wamba mudi Nzambi uleja bantu bende dinanga ne mêyi adi aleja dinanga dia muledi. Bia muomumue, pavua bayidi ba Yezu bakeba kukanda bana bua kabayi kudi Yezu, wakababela wamba ne: ‘Nuitabuje bua bana bakese kulua kundi, kanubakandi.’ Pashishe ‘wakabambula mu maboko ende, wakabasankisha, wakabalenga bianza.’​—Mâko 10:14, 16.

Bua kulongesha mêyi a mushinga:

Mu tshimue tshiena-bualu tshia mu tshikandakanda tshia mu 1969, Mulongeshi Bruno Bettelheim wakaleja ne: muana udi ne “bukenji bua kuela ende meji, kayi muenzeja kudi [diyisha] dia ku bukole dia [baledi bende], kadi ulonda anu dimanya diende nkayende.” (New York Times Magazine) Kadi kunyima kua bidimu bu 30, Mulongeshi Robert Coles, wakafunda ne: “Bana batu bajinga bikole bua kuikala ne tshipatshila ne mibelu ya kulonda mu nsombelu, mêyi a mushinga” adi baledi babu ne bantu bakulumpe bakuabu banyisha.​—The Moral Intelligence of Children, 1997.

Nsumuinu 22:6 udi ubela baledi ne: ‘Yisha muana mu njila udiye ne bua kuendela; nunku pakolaye, kêna umbukamu.’ Muaku wa mu tshiena Ebelu udibu bakudimune ne: “yisha” udi kabidi umvuija ne: “tuadija,” ne muaba eu udi uleja dituadija dia dilongesha dia kumpala dia muana. Nunku badi bakankamija baledi bua kutuadija kulongesha bana babu mêyi a mushinga kubangila anu ku buana. (2 Timote 3:14, 15) Malu adibu balonga ku buana adi mua kushala mu lungenyi luabu kashidi.

Bua dinyoka:

Mulongeshi James Dobson wakafunda mu mukanda mukuabu (The Strong-Willed Child) wa mu 1978 ne: “Padi muledi wa dinanga unyoka muana ndilongesha didi dikanda ngikadilu mubi.” Ku luseke lukuabu, mu tshimue tshiena-bualu tshivuabu balongolole tshia mukanda kampanda uvua mumanyike bikole (mu dipatuka diawu dia muanda mutekete), Mulongeshi Benjamin Spock wakamba ne: “Dikuma bana didi dibalongesha ne: muntu mukulumpe udi ne bukole bua bungi udi ne bukokeshi bua kuenza tshionso tshidiye musue, nansha yeye ne bukenji bua kutshienza anyi kayi nabu.”​—Baby and Child Care, 1998.

Bible udi wamba bua dinyoka bana ne: “Lukodi ne kubela bidi biyisha meji.” (Nsumuinu 29:15) Kadi bana bonso kabatu bakengela kubela lukodi to. Nsumuinu 17:10 udi utuambila ne: ‘Dîyi dia mibelu didi dibuela mu mutshima wa muena lungenyi didi dipita mikumu lukama pambidi pa mupote.’

[Tshimfuanyi]

Enza mudimu ne Bible bua kulenga muoyo wa muana

[Tshimfuanyi mu dibeji 7]

Baledi ba meji badi balongoluela bana babu mushindu wa kujikija mukodi