Bua tshinyi kuenza malu mimpe?

MUNTU mukuabu uvua mulonge tulasa tua bungi wakamba ne: ‘Disua dia kuenza bimpe didi kundi, kadi bukole bua mua kuenza nabu bimpe kabuenaku. Bualu bua muanda muimpe undi musue kuenza, tshiena ngenza, kadi muanda mubi undi tshiyi musue kuenza, eu ngundi ngenza.’ Bua tshinyi bivua bikolele muntu eu bua kuenza malu mimpe avuaye musue kuenza? Udi wamba ne: ‘Nunku ndi nsangana mukenji eu kundi meme ne: Pandi musue kuenza bimpe, bubi budi nanyi. Ndi nsanka munda muanyi bua mikenji ya Nzambi, kadi ndi mmona mukenji mukuabu mu mubidi wanyi udi uluangana ne mukenji wa mu meji anyi, ne udi umbueja mu bupika bua mukenji wa bubi udi mu mubidi wanyi.’​—Lomo 7:18, 19, 21-23.

Muntu au uvua mupostolo Paulo. Mêyi ende aa mufunde kukadi bidimu bu 2 000 adi aleja bua tshinyi bitu bikolele bantu bapange bupuangane bua kuenza malu mimpe. Bua tuetu kuenza malu adi mimpe, tudi ne bua kuikala ne bukole bua bungi mu lungenyi, nangananga patudi mu ntatu. Nunku mbimpe kudiebeja ne: Mbualu kayi bua mushinga budi ne bua kutusaka bua kuenza malu mimpe?

Tangila tshidi Bible wamba bua matuku atshilualua a muntu muakane. Tudi tubala mu Musambu wa 37:37, 38 ne: ‘Tangila muntu udi ne mutshima mutoke bimpe, mona muntu udi muakane; bualu bua tunkanunuina netuikale kudi muena ditalala. Kadi batomboki nebabutudibue, buonso buabu mene. Tunkanunuina tua bantu babi netujimijibue.’ Nsumuinu 2:21, 22 udi wamba ne: ‘Badi ne mitshima miakane nebashikame mu buloba, badi ne mutshima umue mutoke nebajalame. Kadi nebajimije bantu babi pa buloba, nebumushepu bena tshitungu.’

Nansha mudi milayi eyi ne mikuabu idi mu Bible itusaka bua kuenza malu adi asankisha Nzambi, ki nyoyi nkayayi idi ne bua kutusaka bua kuenza nunku nansha. Bualu bua mushinga budi ne bua kutusaka bua kuenza anu malu mimpe budi bupetangana ne tshilumbu tshidi tshitangila muntu yonso. Tshiena-bualu tshidi tshilonda netshiakule bua tshilumbu etshi ne mushindu uditshi tshitutangila.