Ditunga dia Yuda diakashala munda mutupu anyi?

BIBLE ukavua mumanyishe pa bidi bitangila ditunga dia Yuda ne: divua ne bua kubutudibua kudi bena Babulona ne kushala munda mutupu too ne pavua bena Yuda bavua mu bupika ne bua kupingana. (Yelemiya 25:8-11) Muyuki mufundisha ku nyuma wa Nzambi bidimu bu 75 panyima pa tshisumbu tshia kumpala tshia bapika bamane kualukila mu ditunga diabu, udi ujadika ne: dîyi dia buprofete edi diakakumbana. Udi wamba bua mukalenge wa Babulona ne: ‘Wakangata bantu bavua bapanduke ku mvita, kuya nabu ku Babulona, kushalabu bapika bende ne ba bana bende too ne tshikondo tshivua bukalenge bua bena Pelasa bubuele mu ditunga.’ Udi wamba kabidi bua ditunga adi ne: ‘Nedishale munda mutupu, too ne panemekadi matuku a tshijila.’ (2 Kulondolola 36:20, 21, MMM) Kudiku bintu bia kale bikalula mu buloba bidi bijadika bualu ebu anyi?

Ephraim Stern mulongeshi wa malu a bintu bia kale bia mu Palestine ku Iniversite wa bena Ebelu udi wamba mu tshikandakanda kampanda ne: “Bena Ashû ne bena Babulona bakanyanga bitupa binene bia Isalele wa kale, kadi bintu bidibu bakalule mu buloba bia kunyima kua dibuela dia matunga aa mu Isalele bidi bileja miyuki ibidi mishilangane bikole.” Udi umvuija ne: “Bena Ashû bakashiya bimanyinu bia muvuabu mu Palestine, kadi panyima pa bena Babulona bamane kubutula ditunga, katuena tumona tshijadiki nansha tshimue. . . . Kakuena tshintu tshidi tshileja ne: bantu bavua basombe mu ditunga too ne mu tshikondo tshia bena Pelasa. . . . Kakuena tshijadiki nansha tshimue tshia muvua bantu basombemu. Mu tshikondo tshionso atshi, kabavua basulule musoko nansha umue uvua bena Babulona babutule.”​—Biblical Archaeology Review.

Mulongeshi Lawrence Stager wa mu Iniversite wa Harvard udi witaba bualu ebu, wamba ne: mukalenge wa Babulona uvua ne “tshilele tshia kubutula bintu bionso ne wakashiya luseke luonso lua ku Ouest kua musulu wa Yadene anu tshipela mu ditunga dijima dia Peleshete ne pashishe mu dia Yuda.” Stager udi wamba kabidi ne: “Anu mu bukokeshi bua Kolesha Munene, muena Pelasa wakapingana bena Babulona, ke padi bimanyinu bia bintu bia kale bimueneka kabidi . . . mu Yelushalema ne mu Yuda muvua bena Yuda bavule bavua mu bupika basombe pavuabu balukile mu ditunga diabu.”

Eyowa, dîyi divua Yehowa muambe bua dibutuka dia Yuda diakakumbana. Bualu buonso butu Yehowa ulaya butu anu bukumbana. (Yeshaya 55:10, 11) Tudi ne bua kueyemena Yehowa ne milayi yende idi mu Bible ne muoyo wetu wonso.​—2 Timote 3:16.