Longesha bana bebe bua kufila mandamuna

PERLA udi musombele mu ditunga dia Mexique udi uvuluka muvua mamuende umuambuluisha bua kufilaye mandamuna makese mu dilonga dia Tshibumba tshia Nsentedi patshivuaye kansongakaji. Lelu Perla udi ne muana wa balume wa bidimu bitanu. Mmunyi mudiye umuambuluisha? Udi wamba ne: “Ntu nganji kudilongolola. Pandi ndilongolola, ndi nkeba tshikoso tshidi muananyi mua kumvua bimpe, tshidiye mua kumvuija mu ende mêyi. Pashishe tudi tuimanyina pa tshikoso tshidiye ubikila ne: ‘Tshikoso tshianyi.’ Ndi mulomba bua atshiumvuije ne bilejilu bidiye mumanye bimpe. Pashishe, tudi tuambulula diandamuna misangu ya bungi. Tudi tuangata tshintu tshia bunene bua mikro bua amanye mua kukuata mikro pikalaye ne bua kuandamuna. Ndi ne disanka dia bungi bua mushindu udiye kayi upangila kuela tshianza kuulu anyi kuandamuna mu bisangilu bionso. Misangu ya bungi, utu uya kamonangana ne mulombodi wa dilonga kumpala kua bisangilu kutuadija ne umuleja tshikoso tshikalaye mua kuandamuna.”

Jens mmukulu mu kasumbu ka muakulu wa Hindi, ne udi ne bana babidi, wa bidimu bibidi ne wa binayi. Yeye ne mukajende, padibu balongolola bisangilu ne bana babu, badi balonda mushindu uvua baledi ba Jens bamulongeshe bua kuandamuna. Udi wamba ne: “Tudi tukeba bitupa bidi bana mua kumvua bimpe. Pashishe tudi tudienzeja bua kubapesha tshikepeshilu tshia dilonga anyi malu manene adimu. Panyima tudi tubela nkonko idibu mua kuandamuna mu bisangilu. Misangu ya bungi, mandamuna atubu bafila mu abu mêyi atu atukemesha. Mandamuna abu adi aleja mudibu bumvue bidibu babale. Ke bualu kayi mandamuna abu adi alua mêyi adi atumbisha Yehowa ne adi aleja ditabuja diabu.”