Bua tshinyi kumanya mufuilakanyi ne Kristo?

Mupostolo Yone wakafunda ku bukole bua nyuma muimpe kale ne: ‘Nuakumvua ne: Mufuilakanyi ne Kristo ukadi pa kulua.’ (1 Yone 2:18) Mêyi aa adi akoka ntema bikole! Munkatshi mua bidimu bivule, bantu mbelangane meji bua kumanya tshidi mêyi aa umvuija. Mufuilakanyi ne Kristo nganyi? Nealue dîba kayi? Neenze malu kayi paluaye?

MUNKATSHI mua bidimu bivule mbabikile bantu ba bungi ne: bafuilakanyi ne Kristo. Kale, ku bantu bavuabu babikila ne: ‘mufuilakanyi ne Kristo’ kuvua bena Yuda, bapape bena Katolike ne bakalenge bena Lomo. Tshilejilu, pakabenga Mukalenge Frédéric II (1194-1250) bua kuya ku mvita ivuabu baluila ekeleziya, Pape Grégoire IX wakamubikila ne: mufuilakanyi ne Kristo ne wakamuipata mu ekeleziya. Mupinganyi wa Grégoire, Innocent IV, wakipata tshiakabidi Frédéric mu ekeleziya. Frédéric pende wakabikila Innocent ne: mufuilakanyi ne Kristo.

Ku bafundi bonso ba Bible, anu mupostolo Yone ke udi mutele miaku eyi ‘mufuilakanyi ne Kristo.’ Miaku eyi idi isanganyibua misangu itanu ku bumue ne ku bungi mu ibidi ya ku mikanda idi ne dîna diende. Mvese idi ne miaku eyi mmileja mu kazubu kadi mu dibeji didi dilonda. Patudi tubala mvese eyi tudi tumvua ne: mufuilakanyi ne Kristo mmuena mashimi ne mupambuishi wa bantu, udi wenza muende muonso bua kunyanga malanda a muntu ne Kristo ne Nzambi kabidi. Ke bua tshinyi mupostolo Yone wakabela bena Kristo nende ne: ‘Bananga, kanuitabuji nyuma yonso, kadi nutete nyuma ne idi ya Nzambi anyi; bualu bua baprofete ba bungi ba mashimi bakamuangalaka pa buloba.’​—1 Yone 4:1.

Yezu pende wakamba bua kudimukila bantu badi bapambuishangana anyi baprofete ba mashimi, uleja ne: “Batu balua kunudi baluate biseba bia mikoko, kadi munda muabo mudi nkashama idi ne luonji. Nenubajingulule ku mamuma abo” anyi bienzedi biabu. (Matayo 7:15, 16) Yezu uvuaku kabidi wambila bayidi bende bua badimukile mufuilakanyi ne Kristo anyi? Tumonayi mutudi mua kumanya muntu mubi muena mashimi eu.