Mufuilakanyi ne Kristo udi wedibua patoke

WEWE mumvue ne: disama dia tshiambu didi dienda ditonkola bantu muaba uudi musombele, udi mua kuenza tshinyi bua kudikuba? Udi mua kukolesha bidi bikuba mubidi webe ne kuepuka bantu badi ne disama edi. Ke tshitudi mua kuenza kabidi mu nyuma. Mukanda wa Nzambi udi utuambila ne: mufuilakanyi ne Kristo ‘wakumana kulua pa buloba.’ (1 Yone 4:3) Tuetu basue kuepuka disama tudi ne bua kumanya tshiledi tshia disama adi ne kutshiepuka. Diakalenga, Bible udi ututokeshila tshilumbu etshi bimpe menemene.

‘Mufuilakanyi ne Kristo’ udi mua kuikala muntu yonso udi ubenga Kristo anyi udi ushima mudiye Kristo peshi muleji-mpala wende. Yezu nkayende wakamba ne: ‘Udi kayi nanyi udi umpidia [anyi udi mufuilakanyi ne Kristo]; udi kayi usangisha nanyi bintu udi ubitangalaja.’​—Luka 11:23.

Bushuwa, Yone wakafunda bua mufuilakanyi ne Kristo bidimu bipite pa 60 panyima pa Yezu mumane kufua, mubike ne muye mu diulu. Nunku tudi mua kumanyina malu adi mufuilakanyi ne Kristo wenza ku tshidiwu enzela bayidi ba Yezu ba lulamatu badi pa buloba.​—Matayo 25:40, 45.

Mufuilakanyi ne Kristo mmuluishi wa bena Kristo

Yezu wakambila bayidi bende ne: bantu ba bungi bavua ne bua kubakina. Wakamba ne: ‘Nebanufile mu dikenga, nebanushipe; bisamba bionso nebikale nenu lukuna bua dîna dianyi. Baprofete badi ne mashimi ba bungi nebabike, nebapambuishe ba bungi.’​—Matayo 24:9, 11.

Bu mudi bayidi ba Yezu bakengeshibua ‘bua dîna diende,’ bantu badi babakengesha mbafuilakanyi ne Kristo anyi mbaluishi bende. “Baprofete badi ne mashimi” (bamue ba kudibu bavua bena Kristo kumpala) badi pabu bafuilakanyi ne Kristo. (2 Yone 7) Yone wakafunda ne:  ‘Bafuilakanyi ne Kristo ba bungi’ aba ‘bakumuka munkatshi muetu, kadi kabakadi betu mene; bu bobu bikale betu, bakadi kuikala netu.’​—1 Yone 2:18, 19.

Mêyi a Yezu ne a Yone adi aleja patoke ne: mufuilakanyi ne Kristo ki mmuntu umue, kadi mmuenza ne bantu ba bungi badi bafuilakanyi ne Kristo. Kabidi, bu mudibu baprofete ba dishima, tshimue tshia ku bipatshila biabu binene ntshia kulongesha malu a Nzambi a dishima. Ngamue mayele kayi atubu nawu?

Badi batangalaja malongesha a dishima

Mupostolo Paulo wakambila menzejanganyi nende wa mudimu Timote bua adimukile malongesha a batontolodi bu mudi Humenayo ne Fileto bavua ne ‘mêyi avua avulangana bu mputa wa lubangu.’ Paulo wakamba kabidi ne: ‘Bobu bakamana kupambuka mu njila wa mêyi malelela, bamba ne: Kubika kua bantu ku lufu kuakumana kulua, ne badi banyanga ditabuja dia bakuabu.’ (2 Timote 2:16-18) Humenayo ne Fileto bavua pamuapa balongesha ne: dibika dia bafue divua dia mu tshimfuanyi, ne bena Kristo bakavua bamane kubika ku lufu mu ngumvuilu wa mu nyuma. Bushuwa, padi muntu ulua muyidi mulelela wa Kristo udi ulua ne muoyo ku mêsu kua Nzambi, bualu buvua Paulo muine muambe patoke. (Efeso 2:1-5) Kadi dilongesha dia Humenayo ne Fileto divua dipepeja mulayi wa Yezu wa dibika dilelela dia bantu ku lufu mu Bukalenge bua Nzambi.​—Yone 5:28, 29.

Tshisumbu tshia bena Gnosis (Gnostiques) tshiakalua patshi kutangalaja lungenyi lua dibika dia ku lufu dia mu tshimfuanyi. Bu muvua bena Gnosis bitaba ne: bavua mua kupeta dimanya (gnoʹsis mu tshiena Gelika) mu majimbu, bavua basambakaja Buena-Kristo bua dishima ne nkindi ya bena Gelika ne majimbu a bena mu Asia. Tshilejilu, bavua bamba ne: bintu bionso bia mubidi mbibi, ke bualu kayi Yezu kavua mulue mu mubidi to, kadi uvua patupu umueneka bu uvua ne mubidi wa bantu. Anu mutukadi bamone, aa ke malu avua mupostolo Yone muambe bua kudimukila.​—1 Yone 4:2, 3; 2 Yone 7.

 Dishima dikuabu diakaluabu kupatula bidimu bia bungi panyima ke dilongesha dia Busatu bunsantu, didi diamba ne: Yezu udi Nzambi Wa-Bukole-Buonso ne Muana wa Nzambi. Mulongeshi Alvan Lamson udi wamba mu mukanda wende kampanda ne: dilongesha dia Busatu Bunsantu “kadiena mu mikanda ya bena Yuda ne ya bena Kristo; bafundi bena Kristo bavua balonda Platon ke bavua baditangalaje ne badibueje mu Buena-Kristo.” (The Church of the First Three Centuries) “Bafundi bena Kristo bavua balonda Platon” aba bavua banganyi? Bavua balombodi ba ekeleziya batontolodi bavua basue malongesha a Platon muena nkindi wa bena Gelika uvua kayi mutendeledi mulelela.

Tshingoma tshinene tshiakasa mufuilakanyi ne Kristo tshivua dilongesha dia Busatu Bunsantu, bualu dilongesha edi diakapangisha bantu mua kumanya Nzambi bimpe ne mua kujingulula malanda adi pankatshi pende ne Muanende. (Yone 14:28; 15:10; Kolosai 1:15) Anji elabi pebe meji, mmunyi mudi muntu mua ‘kusemena pabuipi ne Nzambi’ mudi Bible ulomba bikalaku kakuyi mushindu wa kumumanya?​—Yakobo 4:8.

Dibuejakaja ndilue kuvula kabidi bualu bakudimunyi bavule ba Bible mbumushe dîna dia Nzambi dia Yehowa mu Bible yabu, nansha mudidi misangu mipite pa 7 000 mu mifundu ya ku ntuadijilu! Bushuwa, bantu mbapepeje bikole Mufuki wetu Wa-Bukole-Buonso ne Dîyi diende bualu mbamuvuije muntu utudi katuyi mua kumanya bimpe ne udi kayi ne dîna. (Buakabuluibua 22:18, 19) Kabidi, kupingaja miaku bu mudi Mukalenge ne Nzambi pa muaba wa dîna dia Yehowa nkubenga kulonda disambila dia tshilejilu dia Yezu, didi diamba ne: “Banemeke dina diebe.”​—Matayo 6:9.

Bafuilakanyi ne Kristo badi babenga Bukalenge bua Nzambi

Bafuilakanyi ne Kristo badi batamba kuenza mudimu mu ‘matuku a ku nshikidilu’ atudi lelu aa. (2 Timote 3:1) Tshipatshila tshiabu tshinene ntshia kushima bantu bua mudimu udi nawu Yezu bu Mukalenge wa Bukalenge bua Nzambi, bumfumu bua mu diulu buakokesha buloba bujima.​—Danyele 7:13, 14; Buakabuluibua 11:15.

Tshilejilu, bamue balombodi ba bitendelelu batu balongesha ne: Bukalenge bua Nzambi budi mu mioyo ya bantu; kadi bualu ebu kabuena mu Bible nansha kakese. (Danyele 2:44) Bakuabu badi bamba mudi Kristo wenza mudimu ne mbulamatadi ya bantu ne bisumbu biabu. Pabi Yezu wakamba ne: ‘Bukalenge buanyi kabuena bua pa buloba ebu.’ (Yone 18:36) Bushuwa, Satana ke “mukokeshi wa buloba” ne “nzambi wa tshikondo etshi,” ki n’Yezu to. (Yone 14:30; 2 Kolinto 4:4) Ke bua tshinyi mu katupa kîpi emu Yezu neabutule makalenge onso a bantu ne yeye nealue Mukokeshi umuepele wa buloba bujima. (Musambu 2:2, 6-9; Buakabuluibua 19:11-21) Bantu batu balomba bua bualu ebu buenzeke patubu bambulula Disambila dia Tatu wetu, bamba ne: ‘Bukalenge buebe bulue. Benze pa buloba muudi musue bu mudibu benza mu diulu.’​—Matayo 6:10.

Bu mudi balombodi ba bungi ba bitendelelu bakuatshisha bisumbu bia tshididi bia pa buloba, badi baluisha bantu badi bamanyisha bulelela pa bidi bitangila Bukalenge bua Nzambi ne babakengesha. Tumanye ne: mukanda wa Buakabuluibua udi wakula bua ndumba wa mu tshimfuanyi, “Babulona Munene,” udi ‘mukuatshike ne mashi a bansantu, ne mashi a bamanyishi ba Yezu.’ (Buakabuluibua 17:4-6) Udi wenda kabidi bundumba bua mu nyuma padiye ukuatshisha ‘bakalenge’ ba pa buloba anyi bamfumu ba tshididi, bobu pabu bamuambuluisha. Mukaji wa mu tshimfuanyi eu mbitendelelu bia dishima bia pa buloba bujima. Yeye ke udi wenza tshitupa tshinene tshia mufuilakanyi ne Kristo.​—Buakabuluibua 18:2, 3; Yakobo 4:4.

Mufuilakanyi ne Kristo ‘udi wafunya bantu ku matshi’

Bena Kristo bavule ba dishima kabena anu babenga malongesha malelela a mu Bible to, kadi mbalekele kabidi mikenji ya mu Bible ya bikadilu bimpe bua kulonda bikadilu bidi bitangalake. Dîyi dia Nzambi dikavua dimanyishe bualu ebu ne: “Dinga diba, bantu [badi bamba mudibu bakuatshila Nzambi mudimu]  kabakuikala kabidi bateleja dilongesha dimpe, nebikale badikebela amu balongeshi bavule patupu ba pa diabo dijinga, bikale babafunya ku matshio.” (2 Timote 4:3, MMM) Bible udi ubikila kabidi balongeshi ba dishima aba ne: ‘Bapostolo badingi, bena mudimu ba mashimi, badi badiandamuna bu bapostolo ba Kristo.’ Bible udi utungunuka ne kuamba ne: ‘Ku nshikidilu kuabu nekuikale bu mudi bienzedi biabu.’​—2 Kolinto 11:13-15.

Munkatshi mua bienzedi biabu mudi “bienzenza bia masandi,” bidi bikale bipetula bikadilu bilenga ne dikamakama dionso. (2 Petelo 2:1-3, 12-14) Katuenaku tumona balombodi bavule ba bitendelelu ne bena kuitabuja babu balonda anyi babuikila mêsu pa bilele bidi kabiyi bia bena Kristo, bu mudi diangatangana dia mulume ne mulume anyi dia mukaji ne mukaji, anyi dia bantu badi kabayi baselangane anyi? Suaku ufuanyikije nsombelu ne bilele ebi bidi bitangalake ne tshidi Bible wamba mu Lewitiki 18:22; Lomo 1:26, 27; 1 Kolinto 6:9, 10; Ebelu 13:4; ne Yuda 7.

“Nutete nyuma”

Pa kumona malu onso adi kuulu eku, tudi ne bua kuteleja mêyi a mupostolo Yone adi atulomba bua kubenga kulengulula anyi kupepeja malu adibu batulongesha. Wakafunda ne: ‘Bananga, kanuitabuji nyuma yonso, kadi nutete nyuma ne idi ya Nzambi; bualu bua baprofete ba bungi ba mashimi bakamuangalaka pa buloba.’​—1 Yone 4:1.

Tangila tshilejilu tshimpe tshia bamue bantu ba meji ‘mimpe’ bavua basombele mu tshimenga tshia Beloya mu bidimu lukama bia kumpala. ‘Bakitabuja dîyi ne mitshima mimana kulongolola; bakadi badikebela mu Mukanda wa Nzambi ku dituku ku dituku ne: Malu aa [mamba kudi Paulo ne Sila] adi malelela anyi.’ (Bienzedi 17:10, 11) Nansha muvua bena Beloya ne dijinga dia kulonga, bavua bakeba kujadika ne: malu avuabu bumvue ne bitabe avua mangatshila mu Mukanda wa Nzambi.

Lelu eu kabidi, bena Kristo balelela kabena balonda ngenyi idi mitangalake to, kadi mbalamate kashendende ku malongesha a mu Bible. Mupostolo Paulo wakafunda ne: ‘Ndi ndomba bualu ebu ne: dinanga dienu ditambe kudiundadiunda mu dimanya ne mu dijingulula dia malu onso.’​—Filipoi 1:9.

Biwikala kuyi muanji kuenza bualu ebu, udifundile tshipatshila tshia kupeta ‘dimanya ne dijingulula dia malu onso’ pa kulonga tshidi Bible ulongesha menemene. ‘Mêyi a mashimi’ a bafuilakanyi ne Kristo kaena apambuisha bantu badi bidikija bena Beloya nansha. (2 Petelo 2:3) Kadi malongesha a mu Bible adi atangila Kristo wa bushuwa ne bayidi bende balelela adi abapesha budikadidi.​—Yone 8:32, 36.

[Kazubu/​Tshimfuanyi mu dibeji 4]

TSHIDI BIBLE WAMBA BUA MUFUILAKANYI NE KRISTO

‘Bana banyi, didi dîba dia ku nshikidilu [bimueneka ne: nshikidilu wa tshikondo tshia bapostolo]; ne mbu munuakumvua ne: Mufuilakanyi ne Kristo ukadi pa kulua, ne katataka bafuilakanyi ne Kristo bakumana kulua ba bungi.’​—1 Yone 2:18.

‘Nganyi udi muena mashimi, anu yeye udi uvila ne: Yezu kena Kristo? Yeye udi uvila Tatu ne Muana, eu udi mufuilakanyi ne Kristo.’​—1 Yone 2:22.

‘Nyuma yonso udi kayi ujikula Yezu, kêna wa kudi Nzambi; eu udi nyuma wa mufuilakanyi ne Kristo, unuakumvua lumu luende ne: Yeye ulualua; ne katataka wakumana kulua pa buloba.’​—1 Yone 4:3.

‘Bena mashimi ba bungi bakamuangalaka pa buloba, kabayi bajikula ne: Yezu Kristo udi mulue mu mubidi. Eu udi muena mashimi ne mufuilakanyi ne Kristo.’​—2 Yone 7.

[Kazubu/​Bimfuanyi mu dibeji 5]

MUENA MASHIMI WA MPALA YA BUNGI

Miaku eyi ‘mufuilakanyi ne Kristo’ idi ikumbanyina bonso badi babenga tshidi Bible wamba bua Yezu Kristo, bonso badi babenga Bukalenge buende ne bonso badi bakengesha bayidi bende. Idi ifunkuna kabidi bantu, malongolodi ne matunga adi ashima mudiwu aleja mpala wa Kristo anyi adipesha mudimu wa Masiya padiwu alaya bualu budi anu Kristo nkayende mua kuenza: kufila ditalala ne bupole.

[Mêyi a dianyisha]

Augustin: © SuperStock/​age fotostock

[Tshimfuanyi mu dibeji 7]

Anu bu bena Beloya, tudi ne bua ‘kudikebela mu Mukanda wa Nzambi dituku dionso’