Nkonko ya babadi

Mushindu uvua Yezu muandamune mamuende pavuabu mu fete wa dibaka mu Kana, udiku uleja ne: kavua umunemeka anyi?​—Yone 2:4.

Bakabikila Yezu ne bayidi bende mu fete wa dibaka mu Kana matuku makese kunyima kua Yezu mumane kutambula. Mamuende Mariya uvua pende mu fete amu. Pakamona Mariya ne: mvinyo uvua mushale kavua ukumbana bantu, wakambila Yezu ne: ‘Kabena ne mvinyo.’ Ke Yezu kumuandamuna ne: ‘Mukaji, ndi nebe bualu kayi? Dîba dianyi kadiena dianji kulua.’​—Yone 2:1-4.

Lelu’eu muntu yeye mubikile mamuende ne: “mukaji” anyi mumuebeje ne: “Ndi nebe bualu kayi?,” bidi bimueneka bu udi kayi ne kanemu anyi bu udi mumupende. Kadi tuetu katuyi bamanye bimpe bilele bia bena Yuda ne muvuabu bakula muakulu wabu tudi mua kuamba ne: Yezu uvua mupende mamuende. Kumanya tshivua mêyi aa umvuija bikondo abi nekutuambuluishe bikole.

Mukanda kampanda udi wamba bua muaku “mukaji” ne: “Pavua muntu ubikila muntu mukaji ne: mukaji, kabivua biumvuija ne: uvua umutandisha anyi umutonokela to, kadi uvua uleja dinanga ne kanemu.” (Vine’s Expository Dictionary of Old and New Testament Words) Mikanda mikuabu idi itaba payi bualu ebu. Tshilejilu, Bible mukuabu udi wamba ne: ‘Muaku eu kawena umvuija kukanyina muntu anyi kumupotela anyi kupanga dinanga to. Ke mushindu muimpe uvua Yezu ubikila bantu bakaji ne kanemu.’ (The Anchor Bible) Munga mukanda pawu udi wamba ne: “Padibu bawamba muntu, kawena ne diumvuija kampanda dibi to.” (The New International Dictionary of New Testament Theology) Mukuabu mukanda wowu udi wamba bua muaku eu ne: “Kawena umvuija dibula kanemu anyi dipotela muntu to.” (Theological Dictionary of the New Testament, wa Gerhard Kittel) Nunku katuena mua kuamba ne: Yezu uvua mupange kanemu bualu uvua mubikile mamuende ne: “mukaji” to.​—Matayo 15:28; Luka 13:12; Yone 4:21; 19:26; 20:13, 15.

Kadi netuambe tshinyi bua pavuaye muambe ne: ‘Ndi nebe bualu kayi?’ Bidi bimueneka ne: tshivua ngakuilu wa bena Yuda utu miaba ya bungi mu Bible. Tshilejilu, pavua Davidi ukandika Abishai bua kashipi Shimei, wakamba bilondeshile 2 Samuele 16:10 ne: ‘Nuenu bana balume ba Seluya, ndi nenu bualu kayi? Biampendaye bualu bua Yehowa wakamutuma ne: Upende Davidi.’ Bia muomumue, pakasangana mukaji mukamba wa mu Salefata muanende mufue, wakambila Eliya mu 1 Bakelenge 17:18 ne: ‘Ndi nebe bualu kayi, wewe muntu wa Nzambi? Wewe wakuluila bua kumvuluija bua bubi buanyi ne bua kushipa muananyi!’

Bilejilu bia mu Bible ebi bidi bituleja ne: bena Isalele bavua batamba kuamba ne: ‘Ndi nebe bualu kayi?’ kabiyi bua kupepeja muntu anyi kumukanyina to, kadi bua kubenga kuenza tshivuaye ubalomba, bua kubenga lungenyi anyi bualu buende. Kadi netuambe tshinyi bua tshivua Yezu muambile Mariya?

Pavua Mariya wambila Yezu ne: ‘Kabena ne mvinyo,’ kavua umumanyisha patupu bualu ebu to, uvua usua kumulomba bua kuenza bualu kampanda. Yezu wakakula bu muvua bantu bonso bakula bua kubenga tshivua Mariya umulomba. Mêyi akasakidilaye a ne: ‘Dîba dianyi kadiena dianji kulua,’ adi atuambuluisha bua kumanya tshivuaye muenzele nanku.

Kutuadijila dîba divua Yezu mutambule ne mulue Masiya mu tshidimu tshia 29, wakadifila bikole ku dienza tshivua Yehowa musue ne: enze. Bu muvuaye Masiya uvuabu balaye, uvua ne bua kushala mulamate Nzambi too ne ku lufu, kubishibua ku lufu ne kutumbishibua. Wakamba mukuabu musangu ne: ‘Muana wa muntu kakuluila bua bantu bamukuatshile mudimu, wakuluila bua kubakuatshila mudimu ne bua kufila muoyo wende bua kupikula nawu bantu ba bungi.’ (Matayo 20:28) Pakasemena dîba divuaye ne bua kufua, Yezu wakaleja bualu ebu patoke e kuambaye ne: ‘Dîba diakufika.’ (Yone 12:1, 23; 13:1) Butuku bua muladilu wa lufu luende, wakamba mu disambila  ne: ‘Tatu, dîba diakufika; utumbishe Muanebe, bua Muana akutumbishe.’ (Yone 17:1) Ndekelu wa bionso, pakalua tshisumbu tshia bantu bua kumukuata mu budimu bua Getesemane, wakabisha bapostolo bende ku tulu, e kubambila ne: ‘Diba diakufika! Muana wa muntu udi mufila mu bianza bia bantu babi.’​—Mâko 14:41.

Kadi mu fete wa mu Kana, Yezu utshivua utuadijilaku mudimu wende wa Masiya, ne ‘dîba’ diende kadivua dianji kulua to. Kipatshila kende ka kumpala kavua ka kuenza disua dia Tatuende mu mushindu uvuaye musue ne pa dîba divuaye musue, kavua musue bua muntu nansha umue amupangishe mua kuenza disua dia Tatuende to. Pakambila Yezu mamuende mêyi aa, uvua musue kumuleja malu muvuawu kadi ne kanemu ne bukalanga. Mariya mene kavua mumvue bibi anyi mumone bu ne: Yezu uvua mumupotele to. Bu muvuaye mene mumvue tshivua Yezu musue kuamba, wakambila bantu bavua babanya biakudia ne: ‘Enzayi muanuambilaye.’ Pamutu wa kulengulula mamuende, Yezu wakenza tshishima tshiende tshia kumpala panyima pa yeye mumane kulua Masiya. Wakandamuna mâyi kuluawu mvinyo muimpe mutambe bua kuleja muvuaye ne nkatshinkatshi mu dienza dia disua dia Nzambi eku unemeka Mariya.​—Yone 2:5-11.

[Tshimfuanyi mu dibeji 31]

Yezu uvua muandamune Mariya ne bulenga kadi uvua ne dîyi dimue