‘Dituku dinene dia Yehowa didi pabuipi’
‘Dituku dinene dia Yehowa didi pabuipi’
‘Dituku dinene dia Yehowa didi pabuipi; didi pabuipi ne didi didiendesha lukasa.’—SEFANYA 1:14.
1, 2. (a) Ndituku kayi dia pa buadi didi bena Kristo bindile? (b) Nnkonko kayi itudi ne bua kuandamuna ne mbua tshinyi?
NSONGAKAJI kampanda mmuindile dituku dia difesto dia dibaka diende ne disanka. Mamu mukuabu pende mmuindile ne disanka dituku dialelaye. Munga muena mudimu yeye mmuindile dituku diatuadija dikisha diende didiye muindile kukadi matuku. Ntshinyi tshidi bantu basatu aba natshi tshia mushindu umue? Buonso buabu mbindile dituku kampanda dia pa buadi, didi ne mushinga mu nsombelu wabu. Buonso buabu mbindile ne muoyo kulukulu, kadi malu adibu bindile mmashilangane. Dituku didibu bindile adi nedifike anu kufika ne nebenze bidibu bindile bualu mbadilongolole.
2 Lelu bena Kristo balelela mbindile pabu ne muoyo mujima dilua dia dituku kampanda dia pa buadi. Mbindile “dituku dinene dia Yehowa.” (Yeshaya 13:9; Yoele 2:1; 2 Petelo 3:12) “Dituku dia Yehowa” didi dilua edi ntshinyi, ne mmushindu kayi udidi ditangila bantu? Kabidi, ntshinyi tshidi mua kutushindikila ne: tudi badilongolole bua dilua diadi? Mpindieu ke tshikondo tshia tuetu kukeba mandamuna a nkonko eyi bualu malu adi aleja mudi mêyi a mu Bible aa malelela: ‘Dituku dinene dia Yehowa didi pabuipi; didi pabuipi ne didi didiendesha lukasa.’—Sefanya 1:14.
“Dituku dinene dia Yehowa”
3. “Dituku dinene dia Yehowa” ntshinyi?
3 “Dituku dinene dia Yehowa” ntshinyi? Mu Bible mujima, tshiambilu “dituku dia Yehowa” tshitu tshileja tshikondo kampanda tshia pa buatshi tshidi Yehowa unyoka bantu bonso badi nende lukuna ne utumbisha dîna diende dinene. Bantu bavua kabayi ne ditabuja ba mu Yuda ne mu Yelushalema, ne bena Babulona ne bena Ejipitu bavua bakengesha bantu, bonso bavua batuilangane ne “dituku dia Yehowa” pavuaye mubanyoke bu mukavua dilumbuluisha diende dileje. (Yeshaya 2:1, 10-12; 13:1-6; Yelemiya 46:7-10) Kadi “dituku dinene dia Yehowa” diodi ditshidi kumpala eku. ‘Ndituku’ dikala Yehowa mua kunyoka bantu badi bapenda dîna diende. Nedituadije ne dibutuka dia “Babulona Munene,” udi muenza ne bitendelelu bionso bia dishima bia pa buloba, ne nedijike ne dibutuka dia ndongoluelu mubi wa malu yonso nkong ku mvita ya Armagedone.—Buakabuluibua 16:14, 16; 17:5, 15-17; 19:11-21.
4. Bua tshinyi bantu ba bungi badi ne bua kutshina dituku dia Yehowa didi dilua lubilu?
4 Nansha bantu bamanye bua dituku edi didi dilua lubilu anyi kabayi bamanye, ba bungi badi ne bua kuditshina. Bua tshinyi? Yehowa udi wandamuna mukana mua muprofete wende Sefanya wamba ne: ‘Dituku adi ndituku dia njiya, ndituku dia ntatu ne kanyinganyinga, ndituku dia kunyanguka ne kubutuka, ndituku dia mîdima ne mufitu, ndituku dia matutu ne mîdima mikole.’ Didi dikuatshisha buôwa bulelela! Muprofete udi wamba kabidi ne: “Nentumine bantu makenga, . . . bualu bua bakuenzela Yehowa bibi.”—Sefanya 1:15, 17.
5. Ndungenyi kayi lulenga ludi miliyo ya bantu nalu pa bidi bitangila dituku dia Yehowa, ne mbua tshinyi?
5 Nansha mudi bamue bantu ne buôwa, kudi miliyo mivule idi yoyi mindile ne muoyo mujima dilua dia dituku dia Yehowa. Bua tshinyi? Bualu mbamanye ne: ntshikondo tshia lupandu ne dipikudibua bua bantu bakane, ndituku dikala Yehowa mua kuditumbisha bikole ne kupesha dîna diende lumu. (Yoele 3:16, 17; Sefanya 3:12-17) Dituku adi nedikale dia kutshina anyi dia kujinga bilondeshile tshidi muntu wenza ne muoyo wende mpindieu. Udi umvua bishi bua disemena dia dituku adi? Udi mudiakaje bua kudidindila anyi? Disemena dia dituku dia Yehowa didiku ne bualu budidi mua kukuenzela mu nsombelu webe wa dituku dionso kubangila anu ku mpindieu anyi?
“Baseki nebalue ne tuseku tuabu”
6. Mmunyi mudi bantu ba bungi bamona “dituku dia Yehowa”? Bua tshinyi bena Kristo balelela bobu kabena bakema bua bualu ebu?
6 Nansha mudi nsombelu ulomba bua kuenza malu ne mitalu, disemena dia “dituku dia Yehowa” kadiena ne mushinga bua bantu ba bungi pa buloba to. Badi baseka bantu badi babambila bua mudi dituku adi disemene pabuipi bikole. Bena Kristo balelela kabena bakema padibu bamona bantu baseka mushindu eu to. Mbavuluke didimuija dia mupostolo Petelo dia ne: ‘Numanye bienu bualu ebu kumpala ne: palua ku nshikidilu kua matuku, baseki nebalue ne tuseku tuabu, benda bu mudi nkuka yabu mene, bamba kabidi ne: Mulayi wa dilua diende udi penyi? Bualu bua katshia batatu balala tulu, malu onso adi ashala muomumue bu muakadiwu ku tshibangidilu tshia bufuki.’—2 Petelo 3:3, 4.
7. Ntshinyi tshiatuambuluisha bua tuetu kushala tuenza malu anu ne mitalu?
7 Ntshinyi tshidi mua kutuambuluisha bua kubenga lungenyi lubi elu ne bua kutungunuka ne kuenza malu ne mitalu? Petelo udi utuambila ne: ‘Ndi ntabuluja mitshima yenu miakane bua kunuvuluija bua nuenu kuvuluka mêyi akambibua diambedi kudi baprofete ba tshijila, ne mukenji wa Mukalenge ne Musungidi wakanuambileye kudi bapostolo benu.’ (2 Petelo 3:1, 2) Patudi tuteleja malu adi baprofete batudimuija nawu bidi bituambuluisha bua ‘kutabuluja mitshima yetu.’ Tudi mua kuikala tukadi bumvue misangu ya bungi malu aa, kadi bidi ne mushinga mpindieu kupita ne kumpala bua tutungunuke ne kuteleja malu adibu batudimuija nawu aa.—Yeshaya 34:1-4; Luka 21:34-36.
8. Bua tshinyi bantu ba bungi badi balengulula malu adi Bible utuvuluija?
8 Bua tshinyi bantu ba bungi badi balengulula malu adi Bible utuvuluija? Petelo udi utungunuka wamba ne: ‘Bobu badi basue kupua muoyo bua bualu ebu ne: Diulu diakadiku kale, ne buloba buakakuatakajibua bua mu mâyi bufume mu mâyi bua dîyi dia Nzambi; bualu bua mâyi aa, buloba abu buakadiku mu tshikondo atshi buakabuikidibua ne mâyi, buakajimina.’ (2 Petelo 3:5, 6) Kudi bantu badi kabayi basue bua dituku dia Yehowa kuluadi to. Ki mbasue tshintu kampanda tshilua kubanyangila nsombelu wabu to. Ki mbasue bua Yehowa alue kubakonka bua malu mabi onso adibu benza to! Anu bu mudi Petelo wamba, mbasue kuenza malu ‘bu mudibu basue.’
9. Mmuenenu kayi uvua nende bantu mu tshikondo tshia Noa ne Lota?
9 Bilondeshile ‘mudibu basue,’ baseki aba mbasungule bua kulengulula ne: Yehowa wakela dîyi mu malu a bantu mu bikondo bia kale. Yezu Kristo ne mupostolo Petelo badi batela malu abidi ku avua menzeke: malu a mu “matuku a Noa” ne a mu “matuku a Lota.” (Luka 17:26-30; 2 Petelo 2:5-9) Kumpala kua Mvula wa kabutu, bantu kabavua basue kuteleja malu avua Noa ubadimuija nawu to. Kabidi mu tshikondo tshia kumpala kua kabutu ka Sodoma ne Amola, Lota uvua anu bu “muntu udi wakula biakulakula” ku mêsu kua bantu bavua babangile bana bende ba bakaji.—Genese 19:14.
10. Ntshinyi tshienza Yehowa bua bantu badi babenga kuteleja?
10 Malu adi anu mushindu wa muomumue lelu. Nansha nanku, tangila tshidi Yehowa wamba bua bantu aba badi kabayi basue kuteleja: ‘Nenkengeshe bantu badi bashikame tshianana bua maluvu a mvinyo masambakena pa bisekeseke, badi bamba mu mitshima yabo ne: Yehowa kêna wenza malu mimpe, kêna wenza malu mabi. Biuma biabu nebinyengibue kudi bakuabu, nzubu yabu neyilue bikulu. Ee, nebase nzubu, kadi kabena bashikamamu; nebakune tumuma tua mvinyo, kadi kabena banua mvinyo yatu.’ (Sefanya 1:12, 13) Bantu badi mua kudifila ku malu abu a pa tshibidilu, kadi kabena bapeta diambuluisha dia kashidi nansha dimue dia mudimu wabu mukole to. Bua tshinyi? Bualu dituku dia Yehowa nedilue mu tshintuluntulu, ne kakuena bubanji nansha bumue budi mua kusungila bantu to.—Sefanya 1:18.
“Utshindile”
11. Ndidimuija kayi ditudi katuyi ne bua kupua muoyo?
11 Tuetu katuena tuenza malu bu bena panu to, tudi ne bua kuvuluka didimuija dia muprofete Habakuka edi: ‘Tshikena kumona etshi ntshia tshikondo tshiakupangidijabu bua kumuenekatshi, tshidi tshienda lukasa ku tshikondo tshiatshi, katshiena tshidinga, biajangulukatshi, utshindile; bualu bua netshimueneke bulelela, katshiena tshipanga kulua.’ (Habakuka 2:3) Nansha mudi dituku adi dimueneka bu didi dijanguluka bua bantu bapange bupuangane, tuvulukayi ne: Yehowa katu ne lulengu to. Dituku diende nedilue anu pa dîba diadi menemene, dîba didi muntu nansha umue kayi mutekemene to.—Mâko 13:33; 2 Petelo 3:9, 10.
12. Yezu wakadimuija bantu bua tshinyi, kadi ntshinyi tshidi bayidi bende ba lulamatu bobu benza?
12 Pavua Yezu uleja mushinga wa kushala batabale mu dindila dituku dia Yehowa, wakadimuija kabidi bua muvua bamue ba ku balongi bende mua kulua kulekela bua kuenza malu ne mitalu. Uvua mubambile ne: ‘Biamba mupika au mubi munda munda ne: Mfumu wanyi kêna ulua katataka; biabangeye kukuma bapika nende, biadieye bidia, bianueye maluvu popamue ne badi bakuatshike maluvu, mfumu wa mupika au nealue dituku didiye kayi mutekemene ne pa dîba didiye kayi mumanye, neamukose pankatshi.’ (Matayo 24:48-51) Kadi kasumbu ka mupika wa lulamatu ne wa budimu kuoku nkatungunuke ne kuenza malu ne mitalu. Kasumbu ka mupika aka nkashale katabale ne kadi kenza mudimu waku mu dindila. Yezu wakakateka bua kuikalaku ‘pa mutu pa bintu biende bionso.’—Matayo 24:42-47.
Bidi bikengela kuenza malu ne mitalu
13. Mushindu kayi uvua Yezu muleje mushinga wa kuenza malu kakuyi njingakanyi?
13 Bena Kristo ba kumpala bavua ne bua kuenza malu ne mitalu ya bungi. Bavua ne bua kunyema kakuyi dijingakana mu Yelushalema pavuabu bamona ‘bena mvita banyunguluka musoko.’ (Luka 21:20, 21) Bakanyunguluka musoko mu tshidimu tshia 66 bikondo bietu ebi. Bua kuleja muvua njinganjinga kayiyi ne mushinga kudi bena Kristo ba kale, Yezu wakabambila ne: ‘Udi pa mutu pa nzubu katuluki bua kumusha bidi mu nzubu; udi mu budimi kapinganyi bua kuangata tshivualu tshiende.’ (Matayo 24:17, 18) Patudi tutangila mudi miyuki ileja muvua tshimenga tshia Yelushalema tshianji kushala bidimu bikuabu binayi, bua tshinyi bena Kristo bavua ne bua kulonda mêyi a Yezu kakuyi njingakanyi mu tshidimu tshia 66 bikondo bietu ebi?
14, 15. Bua tshinyi bivua bia mushinga bua bena Kristo ba kumpala kunyema kabayi banjingakana mu Yelushalema pavuabu bamona bena mvita bamunyunguluke?
14 Nansha muvua bena Lomo balue kubutula tshimenga etshi mu tshidimu tshia 70, bidimu binayi bivua bipite pankatshi apu bivua bia bimvundu bia bungi. Kakuvua ditalala nansha dikese to! Mu bidimu ebi kuvua anu tshikisu ne dishipangana dikole. Mufundi mukuabu wa malu a kale udi umvuija muvua nsombelu mu Yelushalema mu tshikondo atshi wamba muvua “bena Yuda baluishangana bibi ne benzelangana malu a tshikisu.” Bavua bakuata bansongalume ku bukole bua kulama bimanu bia tshimenga, bua kuya ku mvita ne kuikala basalayi. Dituku dionso bavua balonga bua kusala busalayi. Bantu bonso bavua kabayi balamate ku tshiabu ne babambuluisha bavua babamona bu baluishi bena tshitungu. Bu bena Kristo bajingakane mu tshimenga, bavua ne bua kuikala mu nyiwu ya dikema.—Matayo 26:52; Mâko 12:17.
15 Tuvuluka kabidi muvua Yezu muambe ne: “badi mu Yudaya,” kabiyi anu mu Yelushalema nkayamu, bavua ne bua kutuadija kunyema. Dinyema divua ne mushinga bualu panyima pa ngondo mikese patupu pa diumuka dia basalayi ba bena Lomo mu Yelushalema, bakapingana kabidi bua mvita. Bakanji kukuata Galela mu 67 ne tshidimu tshivua tshilonda Yudaya yonso ukavua mu bianza biabu. Bua dikuata dia misoko eyi, lutatu lukole luakabuela mu bantu bonso bavua basombele bitupa abi. Nsombelu uvua anu wenda ukola bua muntu kunyema mu Yelushalema. Biibi bionso bivua bikanga, ne muntu uvua upima bua kupatuka bavua bamumona bu muena tshitungu: ulekela bana babu bena Yuda ulamata bena Lomo.
16. Mmuenenu kayi uvua bena Kristo ba kumpala ne bua kuikala nende bua kupandukabu ku makenga a tshikondo atshi?
16 Patudi tuela meji ku malu onso aa, tudi tumvua bua tshinyi Yezu uvua uleja muvua nsombelu kayi ulomba bua kuenza malu ne njingakanyi to. Bena Kristo abu bavua ne bua kuitaba bua kulekela malu makuabu, kabavua ne bua kulekela bua bintu bivuabu nabi kubapangisha bua kumona muvua nsombelu. Bavua ne bua kuitaba bua ‘kupidia bintu’ biabu bua kutumikila mubelu wa Yezu. (Luka 14:33) Aba bonso bavua batumikile diakamue mubelu wa Yezu ne banyemene dishiya dia musulu wa Yadene bakapanduka.
Tutungunukayi ne kuenza malu ne mitalu
17. Bua tshinyi tudi ne bua kutungunuka ne kuenza malu ne mitalu?
17 Mêyi a buprofete adi mu Bible adi aleja ne: tukadi basemene bikole mu matuku a ku nshikidilu. Ke bualu kayi, tudi ne bua kutungunuka ne kuenza malu ne mitalu kupita ne kumpala. Padiku ditalala, musalayi kêna umvua lungenyi lumulubakana anyi umvua buôwa bua mvita to. Kadi bikalaye ukadi wenza malu ne kalengu ne diakamue badi bamubikila ku mvita, kakuikala mudilongolole ne udi mua kupetakana ne njiwu ya lufu. Ke mudibi kabidi bua bena Kristo balelela. Bikala mitalu yetu ikadi yenda ikepa, katuakuikala badilongolole bua kukandamena buluishi budi mua kutuluila to, ne pamuapa dituku dia Yehowa didi mua kufika tuetu mu tshipua muoyo. (Luka 21:36; 1 Tesalonike 5:4) Bikalaku muntu ukadi ‘mulekele kulonda Yehowa,’ ke tshikondo tshia kumukeba kabidi etshi.—Sefanya 1:3-6; 2 Tesalonike 1:8, 9.
18, 19. Ntshinyi tshiatuambuluisha bua kuendesha lukasa ‘dilua dia dituku dia Yehowa’?
18 Katuena mua kukema bua mudi mupostolo Petelo utubela bua kuendesha lukasa “dilua dia dituku dia Yehowa”! Mmunyi mutudi mua kuenza nunku? Umue mushindu nkudifila “mu bienzedi bia tshijila ne bia Nzambi.” (2 Petelo 3:11, 12) Tuetu bikale ne bia bungi bia kuenza mu malu aa, netuindile “dituku dia Yehowa” ne muoyo mujima. Bulelela katuena mua kuendesha lukasa matuku adi mashale too ne muafika dituku dia Yehowa to. Kadi, patudi tuindila dituku adi, mêba adi anu bu adi apita lukasa patudi mu mudimu wa Nzambi misangu yonso.—1 Kolinto 15:58.
19 Kuelela meji pa Dîyi dia Nzambi ne kutangila bimpe malu adibu batuvuluijamu, nekutuambuluishe bua ‘kuindila Dituku dia Mfumu, tujinga bua difike lukasa.’ (2 Petelo 3:12, MMM) Mu malu adibu batuvuluija aa, mudi milayi ya dikema idi yakula bua dilua dia dituku dia Yehowa ne bua masanka apeta bantu badi ‘bindile Yehowa.’—Sefanya 3:8.
20. Ndikankamija kayi ditudi ne bua kuangata ne mushinga wa bungi?
20 Bushuwa, mpindieu ke tshikondo tshia tuetu kuangata ne mushinga wa bungi dikankamija edi divua muprofete Sefanya muambe: ‘Diambedi mukenji kauyi muanji kukola, diambedi dituku kadiyi dianji kupita lubilu bu mudi bisote bipepuka, diambedi tshiji tshikole tshia Yehowa katshiyi tshianji kufika kunudi; diambedi dituku dia tshiji tshikole tshia Yehowa kadiyi dianji kufika kunudi. Kebayi Yehowa, nuenu bena kalolo bonso ba pa buloba, badi batumikila mikenji yende; kebayi buakane, kebayi kalolo; bumue nebanusokoke mu dituku dia tshiji tshia Yehowa.’—Sefanya 2:2, 3.
21. Bena Kristo balelela mbadisuike bua kuenza tshinyi mu tshidimu tshia 2007 etshi?
21 Nunku mbikumbanyine bua mvese wa tshidimu tshia 2007 kuikalaye ne: ‘Dituku dinene dia Yehowa didi pabuipi.’ Bena Kristo balelela mbatuishibue ne: ‘didi pabuipi ne didi didiendesha lukasa.’ (Sefanya 1:14) ‘Kadiena dipanga kulua.’ (Habakuka 2:3) Nunku, patudi bindile dituku adi, tuikalayi bamanye bimpe tshikondo tshitudi, bashindike ne: dikumbana dia mêyi mamba kudi baprofete dikadi pa buipi!
Udi mua kuandamuna anyi?
• “Dituku dinene dia Yehowa” ntshinyi?
• Bua tshinyi bantu ba bungi badi balengulula bua kuenza malu ne mitalu mu tshikondo etshi?
• Bua tshinyi bena Kristo ba kumpala bavua ne bua kuenza malu ne mitalu?
• Mmunyi mutudi mua kuvudija dienza dietu dia malu ne mitalu?
[Nkonko ya dilonga]
[Lungenyi lunene lua mu dibeji 19]
Mvese wa tshidimu tshia 2007 udi ne: ‘Dituku dinene dia Yehowa didi pabuipi.’—Sefanya 1:14.
[Bimfuanyi mu mabeji 16, 17]
Anu bu mu matuku a Noa, Yehowa neabutule baseki dîba didibu kabayi batekemene
[Tshimfuanyi mu dibeji 18]
Bena Kristo bavua ne bua kuenza malu kakuyi njingakanyi pavuabu bamona Yelushalema ‘munyunguluka kudi bena mvita’