Udi muvuluke anyi?

Dibala dia nimero ya ndekelu ya Tshibumba tshia Nsentedi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

• Ntshinyi tshidi mua kukuambuluisha padi muntu uudi munange ulekela Yehowa?

Udibake bua kukolesha ditabuja diebe ne dia bena mu dîku bakuabu. Udifile mu malu a Yehowa. Udifile bua kuambuluisha bakuabu. Ikala mutekemene ne: mulela webe au udi mua kupingana. Lekela kudilumbuluisha. Unemeke dinyoka didi Yehowa ufila, ne yukila ne balunda bebe muudi udiumvua.​—1/9, dibeji 18-21.

• Mmalu kayi abidi adi Bible wamba adi mua kutuambuluisha bua kumanya ‘matuku a ku nshikidilu’?

Bible udi udianjila kumanyisha malu avua mua kuenzeka mu matuku a ‘ku nshikidilu kua tshikondo.’ (Matayo 24:3, 7, 8; Luka 21:11) Udi kabidi umvuija muvua mmuenenu ya malu ya bantu mua kushintuluka ne bienzedi biabu kabidi mu ‘matuku a ku nshikidilu.’ (2 Timote 3:1-5) Mu mushindu wa dikema lumu luimpe lua Bukalenge luvua ne bua kumanyishibua pa buloba bujima mu tshikondo etshi.​—15/9, dibeji 4-6.

• Ntshinyi tshidi tshisumbu ne bua kuenza bikala muena Kristo udi wendesha mashinyi mukebeshe njiwu idi mishipeshe bantu bakuabu?

Bakulu badi balondesha tshilumbu badi mua kumona ne: ki mmupie dibanza dia mashi bualu uvua anu ne bukokeshi bukese pa tshivua tshikebeshe njiwu anyi kavua mene nabu to. Bikala muntu mmupie dibanza dia mashi ne yeye muine udi unyingalala, nebamunyoke bilondeshile Bible ne nebamumbushe majitu adiye nawu mu tshisumbu.​—15/9, dibeji 30.

• Bua tshinyi muoyo wa tshiendelele kawena ulua bua malu a bena sianse?

Kudi malu a bungi adi bena sianse benza bua kulepesha bungi bua bidimu bidi muntu ushala ne muoyo, bu mudi kuvudija bungi bua misangu idi selile idivuija mipiamipia anyi kuenzulula bitupa bia mubidi wa muntu bipiabipia bidi mubidi kauyi mua kubenga ku diambuluisha dia selile ya nshindamenu ya muntu. Kadi Bible udi uleja ne: bantu nebapete muoyo wa tshiendelele anu ku diambuluisha dia mulambu udi utupikula wa Yezu Kristo.​—1/10, dibeji 3-5.

• Batismo wa bena Kristo mmufumine ku tshilele tshia bena Yuda tshia diowa dia mâyi anyi?

Kabiena nanku to. Bena Yuda bavua ne tshilele tshia kudikezula buobu nkayabu, ne tshilele etshi ntshishilangane ne batismo wa Yona. Didikezula divua mikenji ya Mose ilomba divua dia kuenzulula misangu ne misangu, kadi batismo wa bena Kristo udi yeye anu musangu umue.​—15/10, dibeji 12-13.

• Kalasa ka Dilongesha Mudimu ntshinyi?

Nkalasa ka mbingu muanda-mukulu kadibu babuela kudi bakulu ne basadidi ba mudimu batshidi bajike ne badi ne mushindu wa kubatumabu bua kuenzela mudimu muaba udi dijinga dia bungi. Badi mua kubatuma mu bisumbu bivuabu bafumine, muaba mukuabu mu ditunga diabu anyi mu dinga ditunga.​—15/11, dibeji 10-11.

• Mufuilakanyi ne Kristo udibu batela mu 1 Yone 2:18; 4:3 nganyi peshi ntshinyi?

Pa tshibidilu, ‘mufuilakanyi ne Kristo’ udi uleja bantu bonso badi baluisha Kristo anyi badi bashima mudibu Kriso peshi mudibu baleji mpala bende. Miaku ya Yezu ne ya Yone idi ileja ne: mufuilakanyi ne Kristo ntshisumbu tshienza ne bantu badi bafuilakanyi ne Kristo badi batangalaja malongesha a dishima a bitendelelu ne babenga Bukalenge bua Nzambi.​—1/12, dibeji 4-6.