Diakalengele utu udimuenena ku tshinyi?

JESSE LIVERMORE mmuntu uvua bantu ba bungi bamona bu uvua ne diakalengele dipite bualu uvua mutekeshe mfranga ku nzubu ya bangenda ya Wall Street ya mu États-Unis kupita bantu bonso. Uvua ngenda-mushinga munene wa meji a bungi ne bubanji. Uvua uvuala bilamba bivua bitela bimpe be, usombela mu nzubu uvua ne bibambalu 29, uvua wendela mu mashinyi a mushinga mukole a Rolls-Royce ne kanyemesha wende nkayende.

David * pende uvua ukeba nsombelu wa mushindu wa muomumue. Bu muvuaye mulombodi tshindondi ne direktere mu kumpanyi mukuabu wa malu a dizola, uvua wipatshila bua kuluaye mulombodi wa tshitupa tshikuabu tshia kumpanyi eu. Bubanji ne lumu ke bivuaye munange. Kadi, David wakangata dipangadika dia kulekela mudimu. Wakamba ne: “Ndi mumanye ne: tshiakupeta kabidi mudimu mukuabu wa mushindu eu to.” Udi wela meji ne: David uvua muenze tshilema anyi?

Bantu ba bungi batu bela meji ne: muntu udi ne diakalengele padiye ne makuta a bungi anyi padiye muende lumu. Pabi, bena makuta bavule batu bu badi bapangile tshintu kampanda munda muabu, ne kabayi ne disanka mu nsombelu wabu. Ke muvua tatu Livermore. Nansha muvuaye ne tente mu nzubu tente pambelu, uvua ne tunyinganyinga tupite, malu makole ne ntatu. Uvua mutekete ku muoyo bikole, bakaji bavuaye usela mabaka avua anu afua ne kavua umvuangana ne bana bende bimpe to. Dimue dituku pakavua Livermore mumane kujimija tshitupa tshinene tshia bintu biende, uvua musombe mu restoran wa nzubu wa  tshilala bengi mukuabu wa mushinga mukole ne kutuadijaye kunyingalala bua bintu biende bivua bijimine. Ke yeye kulombesha maluvu, kupatula kaye kende ka kufundila malu ne kufundila mukajende umulaya. Pavuaye mujikije kunua, wakabuela mu nkumba, yeye kudiasa tshingoma kudishipa.

Nansha mutu bantu badishipa bua malu kabukabu, tshivua tshienzeke etshi tshidi tshileja mudi mêyi a mu Bible aa malelela: ‘Bobu badi basue kuikala babanji bakadisunsula mubidi wonso ne tunyinganyinga tua bungi.’​—1 Timote 6:9, 10.

Tudiku mua kuamba ne: bantu badi bamuenena diakalengele ku bubanji budi muntu nabu, muanzu anyi lumu luende badi mua kuikala badishima anyi? Utu udiangata pebe bu udi ne diakalengele anyi? Bua tshinyi udi umona nanku? Mmalu kayi adi akuleja ne: bidi nanku? Tshidi tshikusaka bua kumuenena diakalengele mu mushindu au ntshinyi? Tshiena-bualu tshidi tshilonda netshimanyine pa mibelu milenga idi miambuluishe bantu miliyo ya bungi bua kupeta diakalengele. Mpindieu tumonayi mushindu uudi pebe mua kupeta diakalengele.

[Mêyi adi kuinshi]