‘Dibika dia kumudilu’ dikadi dituadije!

‘Bantu badi bafue mu Kristo nebabike diambedi.’​—1 TESALONIKE 4:16.

1, 2. (a) Nditekemena kayi didiku bua bantu bakadi bafue? (b) Bua tshinyi udi witabuja ne: dibika dia bafue nedikaleku? (Bala note kuinshi kua dibeji.)

‘BADI ne muoyo badi bamanye ne: netufue.’ Ke tshidi bantu bonso bamanye katshia anu Adama wenza mpekatu. Muntu yonso udi uledibua mmumanye ne: dimue dituku neafue. Ke bualu kayi ba bungi batu badiebeja ne: ‘Kadi tshidi tshilua pashishe ntshinyi? Tshidi tshienzeka ntshinyi padi muntu ufua?’ Bible udi wamba ne: ‘Bafue kabena bamanye bualu nansha bumue.’​—Muambi 9:5.

² Kudiku ditekemena kampanda bua bantu bakadi bafue anyi? Eyowa. Ditekemena edi didi ne bua kuikalaku bua malu onso avua Nzambi mulongoluele bantu ku ntuadijilu kukumbanawu. Munkatshi mua bidimu bia bungi, basadidi ba Nzambi ba lulamatu mbaleje mudibu bitabuja malu onso avua Yehowa mulaye bua Dimiinu divua ne bua kubutula Satana ne kumbusha malu  mabi adiye mukebeshe. (Genese 3:15) Ba bungi ba kudibu bakadi bafue. Kadi bua bobu kumona muakumbana malu aa ne makuabu adi Yehowa mulaye, badi ne bua kuanji kubika ku lufu. (Ebelu 11:13) Bualu ebu budi mua kuenzeka anyi? Eyowa. Mupostolo Paulo wakamba ne: “Dibika dia bafue nedikaleku, ne dia bakane ne dia babi.” (Bienzedi 24:15) Tshilejilu, Paulo muine wakabisha Eutuko nsongalume mukuabu uvua mukuluke ku madidishi a ku tshisasa tshisatu tshia nzubu, bobu ‘kumuambula mufue.’ Edi ndibika dia ku lufu dia tshitema ku adibu bafunde mu Bible.​—Bienzedi 20:7-12. *

3. Ndikankamija kayi diudi upeta mu mêyi a Yezu adi mu Yone 5:28, 29, ne mbua tshinyi?

³ Dibika dia bantu tshitema abu didi ditusaka bua kuitaba mêyi a Paulo. Didi dikolesha ditabuja dietu mu tshivua Yezu muambe ne: ‘Dîba nedilue diumvua bonso badi mu nkita dîyi diende, nebajuke.’ (Yone 5:28, 29) Bushuwa mêyi aa adi akolesha ku muoyo! Adi kabidi asamba bantu bakadi bafuishe!

4, 5. Mmishindu kayi ya dibika ku lufu idi Bible utela? Mu tshiena-bualu etshi netuakule bua dibika kayi?

⁴ Bantu ba bungi bikala ne bua kubika ku lufu nebasombe mu ditalala pa buloba mu Bukalenge bua Nzambi. (Musambu 37:10, 11, 29; Yeshaya 11:6-9; 35:5, 6; 65:21-23) Kadi bantu bakuabu bavua ne bua kuanji kubika kumpala kuabu. Yezu Kristo ke uvua ne bua kubika kumpala bua kufila mushinga wa mulambu wende kudi Nzambi bua bualu buetu. Yezu wakafua ne wakabika mu tshidimu tshia 33.

⁵ Pashishe, bela manyi anyi bena “Isalele ba Nzambi” nebalonde Mukalenge Yezu Kristo bua kupeta pabu butumbi mu diulu ‘muikalabu ne Mukalenge tshiendelele.’ (Galatia 6:16; 1 Tesalonike 4:17) Ke tshidibu babikila ne: “Dibika dia ku lufu dia kumudilu.” (Buakabuluibua 20:6) Pajika dibika dia ku lufu edi, dîba nedilue dia kubisha bantu bakuabu miliyo ne miliyo badi ne ditekemena dia kupeta muoyo wa tshiendelele pa buloba mu Mparadizu. Nunku, nansha tuetu ne ditekemena dia kuya mu  diulu anyi dia kushala pa buloba, “dibika dia ku lufu dia kumudilu” didi ne bua kukoka ntema yetu. Ndibika dia mushindu kayi adi? Nedienzeke dîba kayi?

Nebalue ‘ne mibidi kayi?’

6, 7. (a) Tshidi ne bua kuanji kuenzeka kumpala kua bena Kristo bela manyi kuyabu mu diulu ntshinyi? (b) Nebabike ne mubidi kayi?

⁶ Mu mukanda wa kumpala uvua Paulo mutumine bena Kolinto, wakela lukonko elu bua dibika dia ku lufu dia kumudilu: ‘Bantu bafue nebabike ku lufu munyi? Nebalue ne mibidi kayi?’ Pashishe yeye kuluandamuna ne: ‘Bintu biudi ukuna kabiena bitoloka ne muoyo bikalabi kabiyi bifue, kadi Nzambi udi upa maminu onso mubidi bu mudiye musue. Butumbi bua mibidi ya mu diulu budi pa buabu, ne butumbi bua mibidi ya pa buloba budi pa buabu.’​—1 Kolinto 15:35-40.

⁷ Mêyi a Paulo adi aleja ne: bena Kristo bela manyi a nyuma badi ne bua kuanji kufua kumpala kua kupetabu difutu diabu mu diulu. Padibu bafua, mibidi yabu ya pa buloba idi ipingana ku lupuishi. (Genese 3:19) Dîba didi Nzambi usungula bua kubabisha, udi ubabisha ne mubidi udi mukumbanyine muoyo wa mu diulu. (1 Yone 3:2) Nzambi udi ubapesha kabidi muoyo udi kauyi ufua. Kabena bapeta muoyo eu ku diledibua diabu to, bienza bu bavua babele mu mibidi yabu tshintu kampanda tshitu katshiyi tshifua to. Paulo udi wamba ne: ‘Mubidi eu udi ufua udi ne bualu bua kuluata udi kauyi ufua tshiendelele.’ Muoyo udi kauyi ufua ndipa dia kudi Nzambi didi bantu badi ne bua kubika ku dibika dia kumudilu ne “bua kuluata.”​—1 Kolinto 15:50, 53; Genese 2:7; 2 Kolinto 5:1, 2, 8.

8. Mmunyi mutudi bamanye ne: Nzambi kêna usungula bantu 144000 mu bitendelelu bishilashilangane?

⁸ Anu bantu 144 000 ke badi babika mu dibika dia ku lufu dia kumudilu. Yehowa wakatuadija kubasungula mu Pentekoste wa mu 33, matuku makese panyima pa dibika dia Yezu ku lufu. Bonso buabu badi ne ‘dîna dia Yezu ne dîna dia Tatu wende mafunda pa mpala pabu.’ (Buakabuluibua 14:1, 3) Nunku, kabena babasungula mu bitendelelu bishilashilangane to. Bonso mbayidi ba Yezu ne kabena bumvua bundu bua kubikidibuabu ku dîna dia Tatu wetu Yehowa to. Padibu babika ku lufu, badi bapeta mudimu wa kuenza mu diulu. Ditekemena bua kuenzela Nzambi mudimu buludiludi nunku didi dibenza disanka dia menemene.

Dibika edi dikadi dituadije anyi?

9. Mmunyi mudi Buakabuluibua 12:7 ne 17:14 ituambuluisha bua kutshinka dîba didi dibika dia ku lufu dia kumudilu dituadija?

⁹ Ndîba kayi didi dibika dia ku lufu dia kumudilu dienzeka? Kudi bualu budi bujadika menemene ne: dibika edi dikadi dituadije. Tshilejilu, fuanyikija nshapita ibidi ya mu Buakabuluibua. Anji tangila Buakabuluibua nshapita wa 12. Tudi tubalamu ne: Mukalenge mupiamupia Yezu Kristo ne banjelu bende badi baluisha Satana ne bademon bende. (Buakabuluibua 12:7-9) Anu mutu tshibejibeji etshi tshileja njila ne njila, mvita eyi yakatuadija mu 1914. * Wewe mubale bimpe neumone ne: kakuena muyidi muela manyi wa Kristo nansha umue udibu baleje muikale ne Yezu mu mvita ya mu diulu eyi to. Mpindieu, tangila mu nshapita wa 17 wa Buakabuluibua. Tudi tubalamu ne: panyima pa dibutuka dia “Babulona Munene,” Muana wa mukoko nealuangane ne bisamba ne neabipite bukole. Pashishe badi bambamu kabidi ne: ‘Bantu badi nende, babikidibue, ne basungidibue, ne ba kueyemena, nebapite bukole kabidi.’ (Buakabuluibua 17:5, 14) Bantu badi “babikidibue, ne basungidibue ne ba kueyemena” badi ne bua kuikala dîba adi bamane kubika bikalabu ne bua kuikala ne Yezu bua kutshimuna bulongolodi bua Satana. Nunku, bidi bimueneka ne: bela manyi badi bafua kumpala kua Armagedone badi babika pankatshi pa 1914 ne Armagedone.

10, 11. (a) Bakulu 24 mbanganyi? Umue wa ku bakulu aba udi ujinguluila Yone tshinyi? (b) Tshitudi mua kuamba bua bualu ebu ntshinyi?

¹⁰ Tudiku mua kujadika dîba menemene divua dibika dia kumudilu dituadije anyi? Bualu bua mushinga budi butuambuluisha budi mu Buakabuluibua 7:9-15, mudi mupostolo Yone  umvuija tshikena-kumona tshiende tshia ‘musumba munene wa bantu uvua muntu kayi mua kubala.’ Badi bajinguluila Yone tshidi musumba munene eu umvuija kudi umue wa ku bakulu 24, ne bine bakulu aba badi baleja bantu 144 000 baapiana Bukalenge ne Kristo mu butumbi mu diulu. * (Luka 22:28-30; Buakabuluibua 4:4) Yone pende uvua mutekemene bua kuya mu diulu; kadi bu mutshivuaye pa buloba pavua mukulu au muakule nende, nunku mu tshikena-kumona etshi Yone udi ne bua kuikala uleja bela manyi badi pa buloba badi kabayi banji kupeta difutu diabu mu diulu.

¹¹ Nunku tshitudi mua kuamba bua mudi umue wa ku bakulu 24 ujinguluila Yone tshidi musumba munene umvuija ntshinyi? Bidi bimueneka ne: bena mu kasumbu ka bakulu 24 bakadi babike ku lufu badi mua kuikala bamanyisha malu malelela a Nzambi lelu. Bua tshinyi bualu ebu budi ne mushinga? Bualu bakajinguluila basadidi bela manyi ba Nzambi badi pa buloba tshidi musumba munene umvuija menemene mu 1935. Bikalabu bavua bambile umue wa ku bakulu 24 bua kumanyisha bulelela ebu bua mushinga mukole, nanku mukulu eu uvua ne bua kuikala mumane kubika ne muikale mu diulu kumpala kua 1935. Bidi mua kumvuija ne: dibika dia kumudilu diakatuadija pamuapa pankatshi pa 1914 ne 1935. Kudiku mushindu wa tuetu kufila dîba dijalame menemene anyi?

12. Umvuija bua tshinyi tudi mua kuamba ne: dibika dia ku lufu dia kumudilu diakatuadija mu printemps wa 1918.

¹² Muaba eu bidi mua kutuambuluisha bua kuanji kutangila bualu bukuabu budi bupetangana ne Bible. Bakela Yezu Kristo manyi bua kulua Mukalenge wa Bukalenge bua Nzambi mu muvu wa automne (ngondo wa 9 too ne wa 12) mu 29. Mu muvu wa printemps (ngondo 3 too ne 5) mu 33, anyi bidimu 3 ne tshitupa pashishe, Nzambi wakamujula ku lufu ne kuluaye muntu wa bukole wa mubidi wa nyuma. Nunku, tudiku mua kuamba ne: bu muvua Yezu mudie Bukalenge mu automne wa 1914, dibishibua dia bayidi bende ba lulamatu bela manyi divua ne bua kutuadija bidimu 3 ne tshitupa pashishe anyi mu printemps wa 1918 anyi? Eyowa tudi mua kuamba nanku. Nansha mudi Bible kayi ujadika bualu ebu, tshidibi budi bumvuangana ne mvese mikuabu idi ileja ne: dibika dia kumudilu diakatuadija mutantshi mukese panyima pa Yezu mumane kudia Bukalenge.

13. Mmushindu kayi udi 1 Tesalonike 4:15-17 uleja ne: dibika dia kumudilu didi dibangisha ku ntuadijilu kua dikalaku dia Kristo?

¹³ Tshilejilu, Paulo wakafunda ne: ‘Tuetu, batshidi ne muoyo, ne badibu bashiye too ne ku dilua dia Mukalenge [ki ntoo ne ku ndekelu kua dikalaku diende to], katuena tudianjila kuya kumpala kua badi balala tulu mu lufu. Bualu bua Mukalenge muine neapueke mu diulu wela dîyi dikole ne dîyi dia muanjelu mutambe bakuabu bunene, ne dîyi dia mpungi wa Nzambi; ne bantu bafue mu Kristo nebabike diambedi; ne pashishe tuetu batshidi ne muoyo badibu bashiya netuangatshibue nabu popamue mu matutu, bua kusangila ne Mukalenge mu lupepele; nunku netuikale ne Mukalenge tshiendelele.’ (1 Tesalonike 4:15-17) Nunku, bena Kristo bela manyi bavua bafue kumpala kua Kristo kudiaye Bukalenge badi babika bua kuya mu diulu kumpala kua aba badi ne muoyo mu tshikondo tshia dikalaku dia Kristo. Bualu ebu budi bumvuija ne: dibika dia kumudilu divua ne bua kubangisha ku ntuadijilu kua dikalaku dia Kristo, ne didi ditungunuka mu tshikondo tshionso tshia dikalaku diende. (1 Kolinto 15:23) Dibika dia kumudilu kadiena dienzeka anu musangu umue bua bonso to, kadi didi dienzeka munkatshi mua tshikondo kampanda.

‘Bakabapesha muntu ne muntu muzabi mutoke’

14. (a) Ndîba kayi didi bikena-kumona bidi mu Buakabuluibua nshapita 6 bikumbana? (b) Tshidibu baleje mu Buakabuluibua 6:9 ntshinyi?

¹⁴ Tutangile kabidi bualu bukuabu budi mu Buakabuluibua nshapita 6. Badi baleja muntu emu Yezu pa kabalu bu Mukalenge udi mutshimune mvita. (Buakabuluibua 6:2) Bisamba mbibuelakane mu mvita minene ya katshi ku dînu. (Buakabuluibua 6:4) Kudi tshiyole tshia nzala  tshibi. (Buakabuluibua 6:5, 6) Masama mabi menemene adi akengesha bantu. (Buakabuluibua 6:8) Malu onso akavuabu bamanyishe aa adi apetangana menemene ne aa adi enzeka pa buloba katshia mu 1914. Kadi bualu bukuabu budi buenzeka. Badi bakoka ntema yetu ku tshioshelu tshia milambu. Kuinshi kuatshi kudi ‘mioyo ya bantu bakashipibua bua dîyi dia Nzambi, ne bua bumanyishi buakadibu nabu.’ (Buakabuluibua 6:9) Bu mudi ‘muoyo wa tshintu tshionso tshidi ne mubidi mu mashi,’ tshidibu baleje tshikale kuinshi kua tshioshelu mmashi a bayidi ba lulamatu ba Yezu bavuabu bashipe bua diyisha diabu ne tshisumi kabayi batshina.​—Lewitiki 17:11, MMM.

15, 16. Umvuija mudi mêyi a mu Buakabuluibua 6:10, 11 akula bua dibika dia kumudilu.

¹⁵ Anu bu mashi a muntu muakane Abele, mashi a bena Kristo badibu bashipe aba adi ela lubila bua babasombuele. (Genese 4:10) ‘Bakadila ne dîyi dikole, bamba ne: O Mukalenge wa tshijila ne mulelela, udi windija musangu bule munyi bua kulumbuluisha ne bua kutusombuela bua mashi etu kudi badi bikala pa buloba?’ Tshidi tshienzeka pashishe ntshinyi? ‘Bakabapesha, muntu ne muntu, diyeka ditoke; ne bakabambila bua kuanji kuikisha tshitupa tshipi too ne pakumbajibua bapika nabu, ne bana babu ba mu Kristo, badi balua kushipibua bu bobu.’​—Buakabuluibua 6:10, 11.

¹⁶ Mashi avua kuinshi kua tshioshelu au ke avuabu bapeshe mizabi mitoke anyi? Tòo! Mizabi ayi bavua bayipeshe bantu bena mashi a mu tshimfuanyi au avuabu bele pa tshioshelu. Bakalambula mioyo yabu mu dîna dia Yezu ne mpindieu bavua bababishe ku lufu bu bantu ba mu nyuma. Mmunyi mutudi bamanye bualu ebu? Tudi tubala mu mukanda wa Buakabuluibua ne: ‘Udi upita bukole nealuatshishibue nunku ne bilulu bitoke, ne meme tshiena njimija dîna diende mu mukanda wa muoyo nansha kakese.’ Vuluka kabidi ne: bakulu 24 bavua ‘baluatshishibue ne bivualu bitoke, ne pa mitu pabu pavua bifulu bia butumbi bia ngolo.’ (Buakabuluibua 3:5; 4:4) Nunku pavua mvita, nzala ne masama bituadije kukengesha bantu pa buloba, bamue ba mu bantu 144 000 bakavua bafue (badibu baleje kudi mashi adi kuinshi kua tshioshelu) bakabika bua kuya mu diulu ne bakavuala mizabi mitoke ya mu tshimfuanyi.

17. Mmu ngumvuilu kayi mudi bantu badi bapete mizabi mitoke ne bua kuanji “kuikisha”?

¹⁷ Bantu badibu babishe mpindieu badi ne bua kuanji “kuikisha.” Badi ne bua kuindila ne lutulu too ne pafika dituku dia disombuela dia Nzambi. ‘Bapika nabu’ anyi bena Kristo bela manyi batshidi pa buloba badi ne bua kuleja pabu lulamatu luabu mu mateta. Padi dîba dia dilumbuluisha dia Nzambi dikumbana, ‘dikisha’ diabu didi dijika. (Buakabuluibua 7:3) Dîba adi, bantu bakadi babike ku lufu aba nebadisange ne Mukalenge Yezu Kristo bua kubutula ndongoluelu mubi eu,  pamue ne bantu bonso bavua bashipe bena Kristo tshianana kabayi ne bualu.​—2 Tesalonike 1:7-10.

Tshidi bualu ebu bumvuija buetu tuetu

18, 19. (a) Mbua malu kayi buudi mua kuamba ne: dibika dia ku lufu dia kumudilu dikadi dituadije? (b) Mmunyi muudi udiumvua paudi umvua bualu bua dibika dia kumudilu?

¹⁸ Dîyi dia Nzambi kadiena dileja dituku menemene divua dibika dia ku lufu dia kumudilu ne bua kutuadija to, kadi didi dileja ne: didi dienzeka munkatshi mua tshikondo kampanda, mu tshikondo tshia dikalaku dia Kristo. Bantu ba kumpala babishabu mbena Kristo bela manyi bavua bafue kumpala kua Kristo kuluaye mukalenge. Padi matuku enda aya mu tshikondo tshia dikalaku dia Kristo edi, bena Kristo bela manyi badi bafua ne lulamatu badi bashintuluka mu “kuvinya kua disu” bua kulua bantu ba mu nyuma ba bukole bua bungi. (1 Kolinto 15:52) Bela manyi bonso nebapete difutu diabu dia mu diulu kumpala kua mvita ya Armagedone anyi? Katuena bamanye to. Tshidibi, tudi bamanye ne: mu tshikondo tshidi Nzambi nkayende musungule, bela manyi bonso 144 000 nebikale bimane pa Mukuna wa Siona wa mu diulu.

¹⁹ Tudi kabidi bamanye ne: bantu ba bungi ba mu bantu 144 000 bakadi badisange ne Kristo mu diulu. Nkushale anu bakese patupu pa buloba. Etshi ntshijadiki tshinene tshidi tshituleja ne: dîba dia dilumbuluisha dia Nzambi didi disemena ne lukasa luonso! Mu katupa kîpi emu, bulongolodi bua Satana bujima nebubutudibue. Satana muine nebamuele mu dijimba. Pashishe, dibika dia bantu bonso nedituadije, ne ku diambuluisha dia mulambu wa Yezu bantu bena lulamatu nebalue bapuangane anu bu muvua Adama kumpala. Mulayi wa Yehowa udi mu Genese 3:15 udi wenda ukumbana bimpe menemene. Tudi ne diakalenga dinene dia kuikala ne muoyo mu matuku aa!

[Mêyi adi kuinshi]

Udi mua kumvuija anyi?

Mmunyi mudi mvese idi ilonda eyi ituambuluisha bua kumanya dîba dia “dibika dia ku lufu dia kumudilu”?

• Buakabuluibua 12:7; 17:14

• Buakabuluibua 7:13, 14

• 1 Kolinto 15:23; 1 Tesalonike 4:15-17

• Buakabuluibua 6:2, 9-11

[Nkonko ya dilonga]

[Bimfuanyi mu dibeji 26]

Ndibika dia banganyi didi dienzeka kumpala kua bantu bonso kubikabu ku lufu?

[Tshimfuanyi mu dibeji 29]

Mmu ngumvuilu kayi mudibu bapeshe bamue bantu bavua balale mu lufu mizabi mitoke?