Muntu uvua munange muoyo ne bantu

DANIEL SYDLIK mmuntu uvua muenze bidimu bia bungi mu Kasumbu Kaludiki ka Bantemu ba Yehowa. Wakafua mu dibidi dia matuku 18 a ngondo muinayi mu tshidimu tshia 2006. Mmufue ne bidimu 87. Mmuenze mudimu mu dîku dia Betele ku Brooklyn (mu New York) munkatshi mua bidimu biamba kutua ku 60.

Muanetu Daniel wakabuela ku Betele mu tshidimu tshia 1946. Kumpala kua kuyaye ku Betele, uvua mpanda-njila wa pa buende mu Californie (mu États-Unis). Uvua mu buloko mu tshikondo tshia Mvita Mibidi ya Buloba bujima bualu uvua mubenge kubuelakana mu malu a tshididi anu bu bena Kristo nende bakuabu. Malu a mu nsombelu wende mmalonda bimpe mu Tshibumba tshia Nsentedi tshia dia 1 Kabalashipu 1985 (Mfual.) mu tshiena-bualu tshia ne: “Bulunda ne Nzambi mbulenge be!”

Muanetu Sydlik uvua mumanyike bua muvuaye ne didipuekesha ne bipepele bua kumukuatshila bualu. Pavuaye ulombola ntendelelu wa mu dinda ku Betele, lungenyi lua kukolesha nalu bakuabu luvuaye nalu ne dinanga diende dia muoyo luvua lumuenekela ku mêyi ende a mbangilu aa: “Kuikala ne muoyo bua kuenzela Nzambi mulelela ne wa muoyo mudimu nkuimpe be!” Pavuaye wela miyuki ya patoke, uvua ukolesha bantu bua kuikalabu ne mmuenenu wa buena wende eu. Uvua utamba kuela miyuki bu mudi eyi: “Disanka didi kudi bantu badi Yehowa muikale Nzambi wabu,” “Ikalayi ne disanka dia buena dia Yehowa,” “Kanujimi kadilu ka nyuma muimpe” ne “Bilengele bitshilualua.”

Mu 1970, Muanetu Sydlik wakasela Marina Hodson wa mu ditunga dia Angleterre. Uvua umubikila ne: “Dipa dia kudi Nzambi.” Mbenzele Yehowa mudimu pamue munkatshi mua bidimu bipite pa 35.

Mu bidimu bivua Muanetu Sydlik muenze ku Betele, uvua muenze mudimu mu bibambalu bishilashilangane, bu mudi tshia dipatula mikanda ne tshia diyifunda. Uvua muenze kabidi mudimu ku tshisanji tshia WBBR. Pashishe, mu ngondo wa 11 mu 1974, wakabuela mu Kasumbu Kaludiki ka Bantemu ba Yehowa ne kutuadijaye kuenza mudimu mu Komite udi utangila malu a badi mu Mudimu ne mu Komite wa Difunda.

Mu bidimu bipite pa 30 bidi Muanetu Sydlik muenze mu Komite udi utangila malu a badi mu Mudimu, mudimu wende uvua uleja muvuaye muntu uvua munange bantu bikole. Dîyi diende ditue divua dikolesha bantu ba bungi, pavuaye misangu mivule ubaleja diakalenga ditudi nadi dia kuenzela Yehowa mudimu. Misangu yonso uvua uleja ne: disanka dilelela kadiena difumina ku bintu bidi bimueneka ne mêsu to, kadi didi difumina ku malanda etu ne Yehowa ne ku mushindu utudi tumona muoyo.

Nansha mutudi tujinga bikole Muanetu Sydlik ku Betele, tshilejilu tshidiye mushiye katshiakukupuka mu mitu yetu nansha, bualu uvua munange muoyo ne bantu. Tudi batuishibue ne: udi pende mu bantu badibu batela mu Buakabuluibua 14:13. Badi bambamu ne: ‘Bafue badi bafua mu Mukalenge badi ne disanka katataka too ne tshiendelele. Nyuma udi wamba ne: Ee, bua bobu bikishe ku midimu yabu, bienzedi biabu bidi biya nabu.’