Mushindu uudi mua kupeta diakalengele
Mushindu uudi mua kupeta diakalengele
ANU mutu muledi yonso utabalela bana bende ne ubajingila diakalengele, ke mudi Nzambi Tatu wetu wa mu diulu ututabalela ne utujingila petu diakalengele. Bua kuleja mushindu udiye ututabalela bikole, mmufundishe malu a bungi adi aleja mutudi mua kupeta diakalengele anyi kudipangila. Bible muine udi wamba tshidi muntu upeta padiye ulonda bidi Nzambi muambe ne: “Malu onso adiye wenza adi atuta diakalengele.”—Musambu 1:3.
Pikalabi nanku, bua tshinyi bantu ba bungi kabena ne diakalengele ne disanka? Tuetu balonge kabidi bimpe Musambu wa kumpala eu, netupete mushindu wa kuandamuna lukonko elu ne netumanye mutudi petu mua kupeta diakalengele.
“Lungenyi lua bantu babi”
Mufundi wa Misambu udi utudimuija bua njiwu ya kulonda “lungenyi lua bantu babi.” (Musambu 1:1) Mfumu wa “bantu babi” n’Satana Diabolo. (Matayo 6:13) Bible udi wamba ne: udi “mukokeshi wa buloba” ebu ne ‘ba pa buloba bonso badi balala mu bubi.’ (Yone 16:11; 1 Yone 5:19) Ke bualu kayi mibelu ya bungi itudi mua kupeta pa buloba idi anu ileja lungenyi lua mubi eu Satana.
Mmibelu ya mushindu kayi itu bantu babi bafila? Pa tshibidilu, bantu babi badi balengulula Nzambi. (Musambu 10:13) Mibelu yabu idi ilengulula Nzambi anyi idi kayiyi imunemeka idi miaba yonso. Bena pa buloba badi basaka bantu ku ‘bijingajinga bia muibidi, bijingajinga bia mêsu ne lutambishi bua biuma.’ (1 Yone 2:16, MMM) Ku tudiomba ne mu bikandakanda mudi malu adi mua kupesha bantu lungenyi lua kukeba bua kupeta bintu bia bungi. Ku tshidimu tshionso etshi, kumpanyi itu itula dolare mipite pa miliyare 500 bua kusuisha bantu bintu bidiyi ipatula bua babisumbe nansha bobu kabayi nabi dijinga. Kabidi dijula bantu muoyo wa kusumba edi ki ndisaka anu bantu bua kusumba bintu to. Ndishintulule mmuenenu wabu wa mushindu wa kupeta diakalengele.
Ke bualu kayi, nansha mudi bantu ba bungi ne bintu bivua bantu bakeba kumpala, badi bakeba anu bua kuikala ne bikuabu bia bungi. Badi bela meji ne: wewe kuyi ne bintu abi, kuakuikala ne diakalengele to. Ngelelu wa meji wa mushindu eu ngua dishima, ‘kêna ufuma kudi Tatu, kadi udi ufuma ku buloba.’—1 Yone 2:16.
Nzambi udi mutufuke mmumanye bimpe malu adi mua kutupesha diakalengele. Mibelu yende mmishilangane ne ‘ya bantu babi.’ Nanku, kukeba bua Nzambi atupesha masanka eku tulonda njila wa bena panu bua kupeta diakalengele kudi anu bu muntu ujinga bua kuendela mu njila ibidi musangu umue. Kabiena mua kuenzeka to. Ke bualu kayi Bible udi utuambila ne: “Kanulondi bidi bena panu benza.”—Lomo 12:2, MMV.
Kulondi mmuenenu wa bena panu
Bena panu badi balombola kudi Satana badi basua kutuleja bu badi batunange. Kadi tudi ne bua kudimuka. Vuluka ne: Satana uvua mushime Eva anu bua yeye kumufikishaye ku tshivuaye ukeba. Pashishe wakasaka kabidi Eva bua kufikisha Adama ku dilonda lungenyi luende. Lelu kabidi, Satana udi wenza mudimu ne bantu bua kutangalaja ngenyi yende mibi.
Tshilejilu, David utuvua batele mu tshiena-bualu tshishale, uvua wenza mudimu mêba a bungi a pa mutu ne uvua wenza ngendu ya bungi bua mudimu wende. Wakamba ne: “Mvua ngumuka kumbelu mu Dimue mu dindadinda bua kupingana anu mu Dinayi dilolo.” Bu muvua balunda ba pa muoyo ba David, balela bende ne bena mudimu nende bamona bivuaye wenza abi bu mushindu wa kupeta diakalengele, bavua bamuambila ne: “Tungunuka ne mudimu webe bua disanka dia mukaji ne bana bebe.” Bavua bela meji ne: bivua bimpe yeye kutungunuka ne mudimu eu bidimu ndambu too ne pavuaye upeta makuta a bungi. David wakamba ne: “Bavua baleja mudibi bimpe bua diakalenga dia dîku dianyi pamvua ngalukila kumbelu ne makuta a bungi, ne bua nanku mvua mua kuikala ne diakalengele dia bungi. Nansha mumvua tshiyi nsomba kumbelu, balunda banyi bavua bangambila ne: bimvua ngenza bua dîku dianyi bivua bikumbane.” Anu bu David, bantu ba bungi badi benza mudimu mukole bua kupesha bena mu dîku diabu bionso bidibu nabi dijinga. Kadi kulonda ngenyi ya mushindu eu kudi kufikisha ku diakalengele anyi? Bena dîku badi dijinga ne tshinyi menemene?
David wakatshimanya pavuaye ku luendu musangu mukuabu. Wakamba ne: “Mvua nyukila ne muananyi wa bakaji Angelica ku telefone, yeye kungambila ne: ‘Papa, bua tshinyi kutu musue bua kusombaku netu ku nzubu?’ Mêyi aa akansama ku muoyo bikole.” Mêyi aa akamusaka bua kulekela mudimu au. David wakasungula bua kupesha bena dîku diende tshivuabu natshi bualu menemene, mbuena kuamba ne: yeye muine.
Tumikila mibelu ya mu Bible bua upete diakalengele
Mmunyi muudi mua kubenga mibelu mibi idi mitangalake lelu pa buloba? Mufundi wa Misambu udi utuambila ne: muntu udi ne diakalengele ne disanka ngeu udi ne ‘disanka diende mu mikenji ya Yehowa, ne mu mikenji yende mmudiye welangana meji munya ne butuku.’—Musambu 1:2.
Pavua Nzambi muteke Yoshua ku mutu kua tshisamba tshia Isalele, wakamuambila ne: ‘Welangane meji a mukanda [wa Nzambi] eu munya ne butuku.’ Nunku kubala Dîyi dia Nzambi ne kuelelapu mêji kuvua ne mushinga; kadi Yoshua uvua kabidi ne bua ‘kudimuka bua kuenza malu onso adi mafundamu.’ Eyowa, dibala dia Bible diodi nkayadi kadiena dikufikisha ku diakalengele to. Udi ne bua kutumikila malu audi ubala. Nzambi uvua muambile Yoshua ne: ‘Pashishe neutute dikasa dimpe, newikale ne diakalengele.’—Yoshua 1:8.
Anji fuanyikijabi ne: muana mmusombe pambidi pa muledi wende, udi useka padibu bamubadila muyiki kampanda utuye musue. Nansha bikalabu bakadi baubale misangu ne misangu, udi anu umvua disanka bua bikondo bionso bidibu basomba ne muledi wende nunku. Ke mudi kabidi muntu udi munange Nzambi umvua padiye ubala Bible dituku dionso: bidi bimusankisha, ntshikondo tshilenga tshidiye upitshisha ne Tatu wende wa mu diulu. Padi muntu eu witaba ne ulonda mibelu ya Yehowa, udi ulua bu ‘mutshi wakukunabu kukala kua misulu ya mâyi, udi ukuama mamuma au mu tshidimu tshiawu; dibeji diawu kadiena difubidila. Malu onso adiye wenza adi atuta diakalengele.’—Musambu 1:3.
Mutshi udi mufundi wa Misambu umvuija eu kawena ukola ku mpukampuka to. Mbaukune kumpenga kua mâyi ne tshidima udi uutabalela. Mu mushindu wa diatshimue, Tatu wetu wa mu diulu udi wakaja meji etu ne ngelelu wetu wa meji ne mibelu ya mu Bible. Nunku, tudi tukola ne tupeta ngikadilu idi isankisha Nzambi.
Kadi ‘muntu mubi kêna nanku nansha.’ Bua tshikondo kampanda bantu babi badi bamueneka bu badi baya kumpala bimpe, kadi pashishe nsombelu wabu utu ulua kunyanguka bibi. ‘Kabena bajalame palua kulumbuluisha kuabu.’ Nunku, ‘njila wa bantu babi neajimine.’—Musambu 1:4-6.
Bua bualu ebu, kulekedi bua bena panu bakuleje malu audi mua kuipatshila ne audi ne bua kuenza to. Nansha wewe muikale ne mamanya kampanda ne muikale ne mushindu wa kuya kumpala mu bulongolodi ebu, utangile bimpe mushindu uudi wenza mudimu ne mamanya ebe ne mushindu uudi ulekela bena panu benza nawu mudimu. Kuipatshila bintu bifue ne biuma kudi mua kukufikisha ku “difubidila” anu bu dibeji dia mutshi. Kadi, kudia bulunda ne Nzambi kudi kufikisha ku diakalengele ne disanka.
Mushindu uudi mua kupeta diakalengele
Bua tshinyi padi muntu ulonda tshidi Dîyi dia Nzambi diamba malu onso adiye wenza adi atuta diakalengele? Mufundi wa Misambu kavua wakula bua diakalengele mu malu a pa buloba to. Muntu udi mulamate Nzambi udi upeta diakalengele mu dienza disua dia Nzambi, ne tudi bamanye ne: disua dia Nzambi ditu anu dikumbana bimpe. Tukonkononayi mushindu udi dilonda mêyi a mu Bible dituambuluisha bua kututa diakalengele.
Dîku: Bible udi ubela mulume bua ‘kusua mukajende bu mudiye musue mubidi wende,’ ne mukaji pende udi ne bua ‘kunemeka bayende’ bikole. (Efeso 5:28, 33) Udi wambila baledi bua kusomba ne bana babu, kuseka nabu ne kubalongesha malu a mushinga a mu nsombelu. (Dutelonome 6:6, 7; Muambi 3:4) Bible udi kabidi upesha baledi mubelu eu: ‘Kanufuishi bana benu balela tshiji.’ Padibu balonda mubelu eu, bitu bilua bipepele bua bana ‘kutumikila baledi babu mu Mukalenge’ ne bua ‘kunemekabu tatuabu ne mamuabu.’ (Efeso 6:1-4) Kulonda mibelu ya mu Bible eyi kudi mua kufila diakalengele mu dîku.
Balunda: Bantu ba bungi batu basue kuikala ne balunda. Tudi ne bipedi bia kunanga bakuabu ne bobu pabu kutunanga. Yezu wakambila bayidi bende ne: nudi ne bua ‘kunangangana.’ (Yone 13:34, 35, MMM) Mu bantu aba mudi balunda batudi mua kunanga ne kueyemena; tufika ne ku dibambila yetu ya munda yonso. (Nsumuinu 18:24) Tshia mushinga ntshia ne: paudi utumikila mêyi adi mu Bible, udi ‘usemena pabuipi ne Nzambi’ ne anu bu Abalahama, badi mua kukubikila pebe ne: “Mulunda wa Nzambi.”—Yakobo 2:23; 4:8.
Bua tshinyi tudi pa buloba: Bantu badi ne diakalengele mu nsombelu mbamanye bua tshinyi badi ne muoyo, kadi bakuabu kabena bamanye bua tshinyi badi nawu to. Nsombelu wa badi ne diakalengele kêna muimanyine pa mmuenenu wa bantu utu ushintuluka misangu ya bungi to. Malu adibu bipatshila adi abafikisha ku disanka dilelela ne dia matuku a bungi bualu mbimanyine pa tshipatshila tshilelela tshia muoyo udibu nawu. Ntshinyi tshidi tshipesha muntu disanka dia kuikala ne muoyo? Ntshiotshi etshi: ‘Utshine Nzambi, utumikile mikenji yende; ebu mbualu buonso budi muntu ne bua kuenza.’—Muambi 12:13.
Ditekemena: Nzambi yeye muikale mulunda wetu, netutekemene malu mimpe matuku adi kumpala. Mupostolo Paulo udi ubela bena Kristo nende bua ‘kabateki ditekemena diabu kudi bubanji budi mua kujimina tshitupa tshîpi; kadi batekemene Nzambi.’ Pavuabu mua kuenza nunku, bavua mua ‘kudibutshila bidi bitekibua bimpe bua matuku alualua, bua bobu balamate muoyo udi muoyo wa bushuwa.’ (1 Timote 6:17-19) Muoyo udi muoyo wa bushuwa eu ukadi pa kufika bualu Bukalenge bua mu diulu bukadi pa kuvuija buloba ebu Mparadizu.—Luka 23:43.
Nansha wewe utumikila mêyi a mu Bible, makenga kaakupanga webe mushiku wa mbelu to. Kadi neupetaku mushindu wa kuepuka malu makole ne tunyinganyinga tudi bantu babi badiambika. David wa buena utukavua batele au ne bantu bakuabu ba bungi, mbalonge mua kutumikila mêyi a mu Bible. Pavua David mupete mudimu uvua umushilaku dîba, wakamba ne: “Ndi ne disanka bua mundi musombe ne mukajanyi ne bana banyi kabidi, ne bua diakalenga dindi nadi dia kuenzela Yehowa mudimu bu mukulu mu tshisumbu.” Kabiena bitukemesha padi Musambu wamba bua muntu udi ulonda mibelu ya Nzambi ne: ‘Malu onso adiye wenza adi atuta diakalengele’!
[Tablo mu dibeji 6]
MALU ATANU BUA KUPETA DIAKALENGELE
1 Kuitabi mmuenenu wa bena panu.
2 Bala Bible ne ikala wela meji dituku dionso.
3 Tumikila mibelu ya mu Bible mu nsombelu webe.
4 Nzambi ikale mulunda webe.
5 Tshina Nzambi mulelela ne tumikila mikenji yende.
[Bimfuanyi mu dibeji 7]
Utuku ulonda malu atanu adi mua kukufikisha ku diakalengele anyi?