Udi mua kutantamena ntatu mikole

MU MATUKU makole atudi aa, bantu ba bungi badi batantamena ntatu itudi mua kufuanyikija ne mvula mukole wa tshipepele. Kadi dinanga dia Nzambi ne lulamatu ku mikenji yende bidi biambuluisha bena Kristo bua kuyitantamena. Mmushindu kayi? Tumonayi diandamuna mu tshilejilu kampanda tshivua Yezu mufile. Uvua mufuanyikije bayidi bende badi bamutumikila ne ‘muena meji, wakibaka nzubu wende pa mutu pa dibue.’ Yezu wakamba ne: ‘Mvula yakaloka, misulu yakuula, bipupu biakalua, biakakuma ku nzubu, kadi nzubu kakupuka, bualu wakadi muibakila pa dibue.’​—Matayo 7:24, 25.

Nansha mudi muntu wa mu tshilejilu etshi muikale ne meji, utu anu upeta pende ntatu idibu bafuanyikije ne mvula idi iloka, misulu ya mâyi yuula ne bipupu anyi mpepele mikole inyangakaja bintu. Nunku Yezu kavua muleje ne: bayidi bende bavua ne bua kuikala dîba dionso anu mu ditalala, kabayi bapeta ntatu nansha mikese to. (Musambu 34:19; Yakobo 4:13-15) Kadi uvua muambe ne: basadidi ba lulamatu ba Nzambi bavua ne bua kutekemena ntatu ne makenga ne kuatantamena.

Yezu wakatuadija tshilejilu tshiende atshi ne mêyi aa: ‘Muntu yonso udi mumvue mêyi anyi aa ne utu uatumikila neikale bu muena meji, wakibakila nzubu wende pa mutu pa dibue.’ Muaba eu Yezu kavua wakula bua dibaka dia nzubu wetu wa bushuwa eu to, kadi uvua wakula bua kupeta ngikadilu ne bienzedi bidi bena Kristo ne bua kuikala nabi. Bantu badi balonda mêyi a Yezu badi bapeta busunguluji ne ngelelu wa meji muimpe. Badi bajalamija ngikadilu ne bienzedi biabu pa dibue didi dikale malongesha a Kristo padibu batumikila malu adibu balonga. Kadi dibue dia mu tshimfuanyi edi kadiena dia pamutupamutu to, bualu bidi bilomba muntu wa mu tshilejilu eu bua ‘kumbula mutubu mule.’ (Luka 6:48) Bayidi ba Yezu pabu badi ne bua kudienzeja bikole bua kupeta ngikadilu idi ibambuluisha bua kutantamena ntatu ne kusemena pabuipi ne Nzambi.​—Matayo 5:5-7; 6:33.

Tshitu tshienzeka ntshinyi padi ntatu itudi mua kufuanyikija ne mvula mukole wa tshipepele iteta bukole bua tshishimikidi tshia Buena-Kristo tshia bayidi ba Yezu? Ditumikila diabu dia malongesha a Kristo ne ngikadilu yabu milenga ya bena Kristo idi ibapesha bukole mu ntatu ya nunku, ne neyibambuluishe bikole mu tshipepele tshikole tshia Armagedone tshikadi pabuipi. (Matayo 5:10-12; Buakabuluibua 16:15, 16) Bushuwa, bantu ba bungi badi batantamena ntatu idi mifuane mvula mukole wa tshipepele padibu balonda malongesha a Kristo. Wewe pebe udi mua kuenza bia muomumue.​—1 Petelo 2:21-23.