Mulume ne mukaji: mbabafuke bua bambuluishangane

MULUME utu amu ne muoyo wa mukaji ne mukaji pende ne muoyo wa mulume. Ke mudi Nzambi mubafuke nanku. Yehowa wakamona ne: ki mbimpe bua mulume wa kumpala Adama ikale anu nkayende to. Ke bualu kayi Nzambi wakamufukila ‘mukuatshishi bu mudiye.’

Yehowa wakaladika Adama tulu tukole ne pashishe kuangataye lubadi luende lumue ke yeye ‘kuenza nalu mukaji ne kulua nende kudi mulume.’ Adama wakasanka bikole pakamonaye muntu eu bulengayi uvua Yehowa mufuke e kufikaye too ne ku diamba ne: “Eu udi mufuba wa mifuba yanyi ne musunyi wa musunyi yanyi.” Eva kavua ne kalema to. Bushuwa, bua ngikadilu ya buntu bukaji ivuaye nayi, uvua mukumbanyine dinanga. Adama pende kavua ne kalema to. Bua ngikadilu ya buntu bulume ivuaye nayi, uvua mukumbanyine kanemu ka bungi. Mbafuke mulume bua mukaji, mukaji bua mulume. Bible udi wamba ne: ‘Bua bualu ebu mulume neashiye tatu wende ne mamu wende, nealamate mukajende; bubidi buabu nebikale mubidi umue.’​—Genese 2:18-24.

Kadi lelu eu, mêku a bungi mmakosoloke. Pankatshi pa mulume ne mukaji padi anu matandu, yonso wa kudibu ukeba anu bidi bimusankisha, kayi utangilaku bia mukuende. Padi mulume ukeba bua kudiatshila mukaji panshi, mukaji pende ne: kabandiatshi, ke tshidi tshikebeshe bilumbu ne matandu bidi munkatshi muabu. Malu onso aa kaena apetangana ne tshidi Nzambi mulongolole bua mulume ne mukaji to. Bakafuka mulume bua kukumbajaye mudimu muimpe mutambe pa buloba. Mukaji uvua ne muaba wa nsongo ku luseke lua mulume bua kuikala umuambuluisha. Bavua ne bua kuenza mudimu pamue mu buobumue. Katshia anu ku ntuadijilu, balume ne bakaji bavua balamate Nzambi bavua benza muabu muonso bua kukumbaja midimu ivua Yehowa mubapeshe, ke biobi kubavudijila disanka ne musangelu. Mmidimu kayi ayi ivuaye mubapeshe ne mmunyi mutudi mua kuyikumbaja petu?

[Tshimfuanyi mu dibeji 3]

Mulume ne mukaji badi ne mudimu munene mu bulongolodi bua Nzambi