Samuele wakayisha ntendelelu wa Yehowa kumpala

MUPROFETE SAMUELE wakatandisha dimue dituku bena Isalele nende bualu bavua bakeba muntu uvua mua kuikala mukalenge wabu; kadi wakabalomba bua kutumikila Nzambi. Bua kubalejaye ne: uvua muprofete wa Nzambi, wakalomba Yehowa bua alokeshe mvula mukole mu tshikondo tshivuabu batula blé, tshitu mvula mikole kayiyi iloka to. Nzambi wakadidisha makubakuba, kulokesha mvula. Ke bualu kayi bantu bakatshina Yehowa ne Samuele bikole.​—1 Samuele 12:11-19.

Muprofete Samuele uvua kabidi mufundi wa mikanda. Mikanda ivuaye mufunde idi ilonda malu avua menzeke munkatshi mua bidimu bitue ku 330. Mikanda eyi idi kabidi ne malu manene akenza Balumbuluishi ba mu Isalele. Tshilejilu, muyuki wa Shimishona, muntu wa makanda a bungi menemene, mmupeshe bantu ngenyi ya mua kufunda tusala ne manaya ne filme. (Balumbuluishi, nshapita 13–16) Samuele wakafunda kabidi bualu bua Luta ne mamuende muenu Naomi, bonso babidi bavua bakaji bakamba ne bikale kabidi bapele. Muyuki wa Luta ne Naomi eu udi ujika bimpe be! Udi pawu mulenga anu bu wa Shimishona.​—Mukanda wa Luta.

Tudi mua kupeta malongesha kayi mu nsombelu wa Samuele ne mu mikanda yakafundaye? Wakayisha ntendelelu mulelela kumpala mushindu kayi?

Patshivuaye muana

Elekana tatuende wa Samuele uvua utendelela Yehowa. Uvua munange mukajende Hana. Mukaji eu uvua munange malu a Nzambi bikole, kadi kavua ne muana to. Ke bualu kayi wakaditshipa kudi Nzambi pavuaye muye ku nzubu wa Yehowa uvua ku Shilo, wamba ne: ‘Yehowa, biwatangila kunyingalala kua muntu webe mukaji, biwamvuluka, biwikala kuyi upua muntu webe mukaji muoyo, kadi biwapa muntu webe mukaji muana mulume, meme nemmufile kudi Yehowa matuku ende onso a muoyo wende; kapaya kakêna kabeya ku mutu wende.’ (1 Samuele 1:1-11) Mutshipu eu uvua umvuija ne: uvua ne bua kufila muana au bua kuenzela Yehowa mudimu matuku ende onso a muoyo.

Hana wakenza mutshipu eu munda munda. Bible udi wamba ne: ‘Anu mishiku yende yakadi inyunga.’ Muakuidi munene Eli wakela meji ne: Hana uvua mukuatshike maluvu, ke yeye kubanga kumutandisha. Kadi Hana wakamumvuija ne kanemu konso tshivua tshimutonde. Ke Eli kumuambila ne: ‘Ya biebe talalaa, Nzambi wa Isalele umvue kulomba kuwakumulomba.’ Yehowa wakumvua kulomba kua Hana, bualu Bible udi wamba ne: ‘Hana wakimita difu, ne pakakumbana ngondo yende, wakalela muana wa balume, wakamuidika dîna ne: Samuele, wakamba ne: Bualu bua ngakumulomba kudi Yehowa.’​—1 Samuele 1:12-20.

Bavua bakoleshe Samuele mu ‘dibela ne didimuija bia Mukalenge’ bimpe. (Efeso 6:4) Pakalekela Samuele mabele, mamuende wakaya nende ku nzubu wa Nzambi mu Shilo bua kumushilaye Eli, muakuidi munene. Eli wakambuluisha Samuele bua ‘kukuatshila Yehowa mudimu.’ Hana wakumvua disanka dia bungi be! Samuele wakafunda mêyi akambaye bua kuleja disanka edi.​—1 Samuele 2:1-11.

Biwikala muledi, utuku usaka bana bebe bua wabu mudimu wa kuenza wikale anu mudimu wa Yehowa anyi? Kuyisha ntendelelu mulelela kumpala ke mushindu mutambe buimpe udi muntu mua kukuata mudimu ne makanda adiye nawu.

Samuele wakibidilangana bimpe ne nsombelu wa ku nzubu wa Nzambi. ‘Wakadiunda ku mêsu kua Yehowa’ ne wakapeta “diakalengele kudi Yehowa ne kudi bantu kabidi.” Bantu bavua bamuanyisha bua ngikadilu milenga ivuaye nayi.​—1 Samuele 2:21, 26.

Kadi bana ba Eli (Hofeni ne Pinehasa) kabavua bana bimpe bu Samuele to. Bavua bantu tshianana, ‘kabayi bamanye Yehowa.’ Bavua banyanga bana ba bakaji ba bende ne bangata minyinyi mimpe ya mafuta ivua bantu balua kufila ku nzubu wa Nzambi. Nzambi ukavua mutume muprofete mukuabu bua kumanyisha Eli dinyoka divua dimuindile.  Muprofete wakamuambila kabidi ne: Hofeni ne Pinehasa bavua ne tshia kufua. (1 Samuele 2:12, 15-17, 22-25, 27, 30-34) Yehowa wakalua kutuma Samuele bua kumanyisha dinyoka dikuabu.

Samuele udi ulua muprofete

Nzambi wakambila Samuele ne: ‘Umanyishe Eli ne: ndi munyoke nzubu wende bua kashidi, bualu uvua mumanye muvua bana bende bakine Nzambi yeye kayi ubakanyina.’ Kauvua mukenji mupepele wa kumanyisha to. Kadi Eli wakamulomba bikole bua kamusokoki bualu nansha bumue. Ke Samuele kumuambila malu onso avua Yehowa muambe. Bivua bilomba dikima!​—1 Samuele 3:10-18, MMM.

Pakakola Samuele, bena Isalele bonso bakalua kuitaba ne: uvua muprofete mulelela wa Nzambi. (1 Samuele 3:19, 20) Bualu buvua Samuele muambe buakabanga kukumbana pakalua bena Peleshete kutekela bena Isalele panshi. Kushipabu Hofeni ne Pinehasa, kunyenga ne Mushete wa tshipungidi. Pakumvua Eli amu ne: mbashipe bana bende, ne mbanyenge Mushete wa tshipungidi, wakadishinda tshianyima mu nkuasa, kutshibuka nshingu, e kufuaye.​—1 Samuele 4:1-18.

Kunyima kua bidimu 20, Samuele wakabela bena Isalele bua balekele nzambi ya dishima. Bakitaba mubelu eu bualu bakimansha mpingu yabu, kujilabu biakudia ne kutondabu mibi yabu. Samuele wakabasambidila ne kufila mulambu wa kuosha mu dîna diabu. Ntshinyi tshiakenzeka? Pakalua bena Peleshete kubunda kabidi bena Isalele, bena Isalele bakabatuisha binu bibidi panshi, bualu Yehowa uvua nabu. Yehowa wakambuluisha bena Isalele, malu abu kulengela bikole, bobu kunyenga bitupa bia buloba buabu bikavua bena Peleshete banyenge.​—1 Samuele 7:3-14.

Kakuyi mpata, Samuele wakayisha ntendelelu mulelela kumpala. Tshilejilu, wakalomba bua bimue bia ku bintu bivuabu bapeta mu mvita bikale babifila bua kulongolola nzubu wa Nzambi. Uvua wenzeja difesto dia Kupita kua Yehowa anyi Pasaka tshidimu tshionso ne uvua wenza bua mudimu wa bena Lewi balami ba ku biibi wikale wenzeka. (1 Kulondolola 9:22; 26:27, 28; 2 Kulondolola 35:18) Samuele uvua musombele ku Lama. Uvua wenza ngendu tshidimu tshionso bua kuya kukosa bilumbu mu misoko mikuabu ya mu Isalele. Uvua muena malu malulame ne kavua ne kansungasunga to. Bu muvua bantu banemeka Samuele, Samuele wakabambuluisha. (1 Samuele 7:15-17; 9:6-14; 12:2-5) Kakuyi mpata, malu ende mimpe ne dinanga diende dia malu a Nzambi biakasaka bantu ba bungi bua kulonda tshilejilu tshiende. Nsombelu wa Samuele udiku ukusaka pebe bua kumuidikija anyi?

Bena Isalele badi balomba bua babatekele mukalenge

Samuele wakateka bana bende ba balume babidi (Yoele ne Abiya) balumbuluishi pakavuaye mukulakaje. Kadi bana bende aba bobu ‘kabakamulonda mu makasa ende, kadi bakasesuka bualu bua lukuka lua biuma, ne bakangata bintu bia mbuejilu, bakakudimuna kulumbulula kuakane.’ Nsombelu wabu mubi wakafikisha bakulu ba mu Isalele bua kulomba bua babatekele mfumu anyi mukokeshi. (1 Samuele 8:1-5) Samuele kakanji kuitaba to. Kadi pakalejaye Yehowa bualu ebu, Yehowa wakamuambila ne: ‘Bobu kabakakupidia wewe, bakampidia meme bua meme tshikadi mukokeshi wabu.’ (1 Samuele 8:6, 7) Pashishe Nzambi wakambila Samuele bua kubatekela mukokeshi, kadi wakabadimuija ne: bavua ne bua kujimija ndambu wa budikadidi buabu. Pakatungunuka bantu amu ne kulomba bua babatekele mfumu, Yehowa wakambila Samuele bua kuela nsonga kampanda manyi bua kuikalaye mfumu. Nsonga au uvua Shaula.​—1 Samuele 8:6–22; 9:15-17; 10:1.

Samuele wakenza muvua Yehowa mumuambile nansha muvuaye kayi musue. Wakasangisha bena Isalele ku Gilegala bua kujadika  bumfumu bua Shaula, panyima pa bobu bamane kutshimuna bena Amona mu mvita. (1 Samuele 10:17-24; 11:11-15) Samuele wakalondela bena Isalele malu a tshisamba tshiabu, kulombaye mfumu ne bantu bonso bua batumikile Yehowa. Samuele wakasambila Nzambi, Nzambi kulokesha mvula wa makubakuba utukadi bakule bualu buende anu bua kuandamuna disambila dia Samuele. Pabi katshivua tshikondo tshia mvula to. Mvula au wakafikisha bantu ku ditaba ne: bavua benze tshilema pavuabu babenge Yehowa. Pakambila bantu Samuele bua abalombele kudi Nzambi, Samuele wakamba ne: ‘Buanyi meme, tshiena ngitabuja bua kuenzela Yehowa bibi bua kulekela kunulombela Nzambi; kadi meme nennuleje njila muimpe ne muakane.’ Tshilejilu etshi tshilenga tshidi tshileja mutudi ne bua kunanga Yehowa ne bantu bende. (1 Samuele 12:6-24) Udiku pebe musue kutungunuka ne malu a ntendelelu ne kusambila bua bena kuitabuja nebe bakuabu anyi?

Bakalenge babidi ba kumpala bakatekabu mu Isalele

Shaula uvua muntu uvua mumanye kudipuekesha. Ke bualu kayi Nzambi uvua mumunange. (1 Samuele 9:21; 11:6) Kadi pakapita matuku, wakalekela kulonda Nzambi. Tshilejilu, umue musangu wakapanga lutulu, kulambulaye mulambu pamutu pa kuindila Samuele bu muvuaye mumuambile; ke Samuele kumutandishaye. (1 Samuele 13:10-14) Mukuabu musangu Shaula pamutu pa kushipa Mukalenge Agaga bu muvuabu bamuambile, wakabenga kumushipa; ke Samuele kumuambila ne: ‘Yehowa wakapanda bukalenge bua Isalele buakadi kuudi lelu, wakabupa mukuenu udi ukupita buakane.’ Samuele wakadishipela Agaga. Pashishe Samuele kuyaye kudila bikole bua malu avua Shaula muenze.​—1 Samuele 15:1-35.

Pashishe, Yehowa wakambila Samuele ne: ‘Wewe neudile muadi bua Shaula musangu bule munyi bualu bua meme ngakamupidia mu bukalenge bua Isalele?’ Ke Yehowa kutuma Samuele ku Beteleheme bua kuela muana wa Yishai manyi bua alue mukalenge. Pakafika Samuele kua Yishai, wakabanga kutangila bana bonso ba Yishai umue ku umue too ne pakamuambila Yehowa bua kuela Davidi manyi pa mutu. Davidi eu uvua muana wa mukala. Dituku adi, Samuele wakalonga bualu bupiabupia ebu: ‘Yehowa kêna utangila bu mudi bantu batangila, bualu bua bantu badi batangila anu mubidi, kadi Yehowa udi utangila mu mutshima.’​—1 Samuele 16:1-13.

Bu muvua Samuele mubungame pavua Shaula mubenge kutumikila Nzambi, uvua ne bua kuikala mubungame bikole pakalua Shaula kukeba bua kushipa Davidi. Kadi nansha nanku, Samuele wakashala anu wenzela Nzambi mudimu ne bukole buende buonso nansha mukavuaye mukulakaje.​—1 Samuele 19:18-20.

Bumpianyi bua Samuele

Bena Isalele bakadila Samuele bikole pakafuaye, bualu uvua muprofete uvua udipuekesha ne muikale ne dikima; ne kabidi bualu uvua muambuluishe bantu ba bungi. (1 Samuele 25:1) Tshibi, Samuele uvua muenze pende bilema mu dilumbuluisha. Kadi nansha nanku, wakalamata anu Yehowa ne muoyo umue, kuenza mudimu kayi utshioka bua kuambuluisha bakuabu bua balamate pabu Yehowa.

Tshikondo tshia Samuele ntshishilangane ne tshietu etshi bikole. Kadi nsombelu wende udi mua kutuambuluisha bikole be! Kadi tshidi ne mushinga mukole ntshia ne: uvua ulonda ntendelelu wa Yehowa ne umuyisha kumpala. Ke tshiudi wenza pebe anyi?

[Kazubu mu dibeji 16]

TANGILA NSOMBELU WA SAMUELE

• Anu muvua baledi ba Samuele bamulongeshe dîyi dia Nzambi, kolesha bana bebe bimpe ‘ne dibela ne didimuija bia Mukalenge.’​—Efeso 6:4.

• Ambuluisha bana bebe bua bangate mudimu wa Nzambi bu wabu mudimu wa kuenza anu bu Samuele.

• Bantu bakajinga Samuele bua ngikadilu yende milenga. Tulondayi tshilejilu tshiende.

• Samuele wakenza muende muonso bua kuyisha ntendelelu wa Yehowa kumpala. Tumuidikijayi petu.

[Tshimfuanyi mu dibeji 15]

Samuele wakadifila mu malu a ntendelelu wa Yehowa. Wakambuluisha bakuabu bua kuenza pabu nunku