Amosa uvua musangishi anyi mutubudi wa tumuma?

MU BIDIMU bia 800 kumpala kua bikondo bietu ebi, Amasaya muakuidi wa tshitendelelu tshia kana ka ngombe wakakandika muprofete Amosa bua kumanyisha dîyi dia Yehowa mu Isalele. Kadi Amosa wakamuambila ne: ‘Ndi mulami wa bimuna ne [mutubudi, NW] wa tumuma tua mitshi ya sycomore. Yehowa wakangangata pangakadi ndama bimuna, ne Yehowa wakangambila ne: Ya biebe, ambila bantu banyi bena Isalele dîyi diebe dia buprofete.’ (Amosa 7:14, 15) Yehowa ke uvua mutume Amosa bu muprofete; kavua mudiyile nansha. Kadi Amosa uvua musue kuamba tshinyi pavuaye muambe ne: uvua ‘mutubudi’ wa tutuma tua mfingi ya sycomore?

Muaku wa mu tshiena-Ebelu udibu bakudimune ne: mutubudi udi anu musangu umue mu Bible wa Traduction du monde nouveau. Mu Bible mikuabu badi bakula bua “musangishi,” ‘tshidima’ anyi “mukami” wa tumuma tua mitshi ya sycomore. Kadi tshikandakanda kampanda tshidi tshiamba ne: dikudimuna dimpe dia muaku au divua ne bua kuikala “mutubudi” bualu muaku eu udi uleja mudimu wa pa buawu uvua muntu uvua udima tumuma tua mitshi ya sycomore wenza.​—Economic Botany.

Ditubula dia tumuma tua mitshi ya sycomore divua dimanyike bikole mu Ejipitu ne mu Chypre katshia ku kale. Lelu’eu kabatshitu batubula tumuma tua mfigi mu Isalele bualu kabatshiena badimamu mfingi ya sycomore to. Tshidibi, bena Isalele bavua batubula tumuma tua mfigi mu tshikondo tshia Amosa, bualu mitshi ya sycomore ivuamu ivua ifumina mu Ejipitu.

Bidi bimueneka ne: ditubula tumuma tua mitshi ya sycomore didi dienza bua tumuma tumine mâyi ne bua mâyi atu pawu avule. Didi kabidi divudija lupepele lua etilene udi utubobesha lukasa, ne tumuma tudi tulua tunene ne tushême bikole. Kabidi biishi kabiena binyanga tumuma bualu tudi tuboba lukasa.

Nansha muvua Amosa mulami wa mikoko wa tshianana ne mutubudi wa tumuma tua mitshi ya sycomore, kavua utshina baluishi nansha. Kadi uvua umanyisha dilumbuluisha divua Yehowa mufundile bena Isalele ne dikima dionso. Udi tshilejilu tshimpe menemene bua Bantemu ba Nzambi ba lelu badi pabu ne bua kumanyisha mukenji udi kauyi usankisha bantu.​—Matayo 5:11, 12; 10:22.