Anu bakuabu ke badi ne bua kuamba bulelela anyi?

NSONGAKAJI mukuabu wa bidimu 16 uvua wamba ne: “Tshitu musue dishima ne tshitu musue banshime to.” Ba bungi ba kutudi kabatu basue pabu dishima. Tutu basue bua malu adibu batuambila anyi batufundila ikala malelela. Kadi tuetu, tutu tuambila bakuabu bulelela anyi?

Bakela bantu nkonko pa tshilumbu etshi mu ditunga dia Allemagne. Bantu ba bungi bavua bamona ne: “Kudinga mu tumalu tukese bua kudiepula anyi kuepula bantu bakuabu ku malu mabi nkuimpe ne kudi ne mushinga bua bantu batungunuke ne kumvuangana.” Kamona-kamba mukuabu wakafunda ne: “Kuamba anu bulelela misangu yonso nkuimpe, kadi kutu kutonda be!”

Bidiku mua kuikala bimpe bua bantu bakuabu bikale batuambila tuetu bulelela, kadi tuetu tumona ne: imue misangu tudi ne bua kubashima bua bualu kampanda buimpe anyi? Kudiku tshilumbu tuetu bambe bulelela peshi dishima anyi? Ntshinyi tshidi mua kuenzeka patudi tuamba malu adi kaayi malelela?

Njiwu ya dishima

Tangila malu mabi adi dishima mua kukebesha. Didi difikisha mulume ne mukajende anyi bena mu bena mu dîku ku dibenga kueyemenangana. Kushiminyina muntu bualu kudi mua kumunyangila lumu. Padi bena mudimu biba mfumu wa mudimu, udi utula mfranga ya bungi ne bualu eu budi bubandishisha bintu mushinga. Padi bantu bafunda bintu bia dishima ku mikanda ya kufuta nayi bitadi, mbulamatadi udi ujimija mfranga idi ikengela bua kukumbaja imue midimu. Padi bakebuludi bashima pa malu adibu bapeta, badi badinyangila mudimu ne banyanga lumu lua bulongolodi anyi tshilongelu tshidi tshibangate ku mudimu. Kujinga kupeta biuma lukasa mu njila mibi kudi kujimijila bantu mfranga idibu basombeshangana anyi kudi mua kufikisha ku njiwu mibi menemene. Nunku kabiena bitukemesha padi Bible utela, “ludimi ludi lushima” ne ‘mumanyi wa malu udi wamba mêyi a kudinga’ munkatshi mua malu adi anyingalaja Yehowa!​—Nsumuinu 6:16-19.

Kumuangalaja mashimi kudi mua kunyanga nsombelu wa muntu umue anyi wa bantu ba bungi. Muntu nansha umue kêna mua kuelesha bualu ebu mpata. Kadi bua tshinyi bantu batu bashima ku bukole? Tudiku mua kuamba kabidi ne: malu onso adi kaayi malelela nga dishima anyi? Netuandamune nkonko eyi ne mikuabu mu tshiena-bualu tshidi tshilonda.

[Tshimfuanyi mu dibeji 3]

Dishima didi difikisha mulume ne mukajende ku dibenga kueyemenangana