Bua tshinyi tudi ne bua kuamba bulelela?

PAVUA Manfred ne bidimu 18 uvua ulonga mudimu mu biro kampanda. * Bakalongolola mu kumpanyi uvua mumuangate ku mudimu bua yeye ne balongi nende bakuabu babuele mu kalasa kampanda matuku abidi ku lumingu. Dimue dituku kalasa kakajika kumpala kua dîba. Bilondeshile mikenji ya mu kumpanyi au, balongi aba bavua ne bua kupingana ku mudimu bua kuenza mudimu mêba avua ashala dituku adi. Pa mutu pa kupingana ku mudimu, bakaya kanaya pa kumbusha Manfred. Ku mpukapuka, shefu uvua utangila balongi kupitshila muaba au. Pakamonaye Manfred, wakamuebeja ne: “Bua tshinyi kuena mu kalasa lelu? Kadi balongi bakuabu badi kuepi?” Manfred uvua mua kuamba tshinyi?

Manfred udi mu nsombelu mukole. Udi ne bua kuamba bulelela anyi kusokokela balongi nende bualu budibu benze? Bu yeye muambe bulelela, balongi bakuabu bavua mua kupeta bilumbu ne bavua mua kumukina. Mbimpe kushima mu nsombelu wa mushindu eu anyi? Wewe uvua mua kuikala muenze tshinyi? Netuakule bua Manfred pashishe, kadi tuanji tumone tshitudi mua kuenza patudi ne bua kusungula bua kuamba bulelela anyi kushima.

Buluishi bunene budi pankatshi pa bulelela ne dishima

Ku ntuadijilu kua malu a bantu, malu onso avua anu malelela. Kakuvua dikonyangaja dia malu anyi dia bulelela to. Mufuki wetu Yehowa udi “Nzambi udi ulamata ku bushuwa.” Dîyi diende didi bulelela; kêna mua kushima, ne katu musue kushima ne nansha bena dishima.​—Musambu 31:5; Yone 17:17; Tito 1:2.

Bikala malu avua nunku, dishima ndifumine kuepi? Yezu Kristo wakandamuna lukonko elu pavuaye wambila bamfumu ba bitendelelu bavua bamuluisha ne bakeba kumushipa ne: ‘Nuenu nudi bana ba Diabolo, tatu wenu, nudi basue kuenza bu mudi nkuka ya tatu wenu. Ku tshibangidilu yeye wakadi mushipianganyi, katu wimana mu bualu bulelela, bua yeye kêna ne bualu bulelela munda muende. Pambaye dîyi dia mashimi, udi wamba malu ende mene; bua yeye udi muena mashimi, ne udi tatu wawu.’ (Yone 8:44) Yezu uvua wakula bua tshivua tshienzeke mu budimu bua Edene pavua Satana musake bantu ba kumpala ku ditombokela  Nzambi ne nenku kuluabu bapika ba bubi ne lufu.​—Genese 3:1-5; Lomo 5:12.

Mêyi a Yezu adi aleja patoke mudi Satana ‘tatu wa mashimi,’ mbuena kuamba ne: yeye ke uvua mutuadije ne dishima ne malu adi kaayi malelela. Satana udi utungunuka ne kuimanyina dishima bikole ne yeye muine udi ‘udinga ba pa buloba bonso.’ Udi ne bujitu bunene bua malu mabi onso adi afumina ku mashimi adi mamuangalake lelu.​—Buakabuluibua 12:9.

Buluishi bunene buvua Satana Diabolo mutuadije budi pankatshi pa bulelela ne dishima, butshidi anu bukole lelu. Budi bulenga bantu ba mishindu yonso ne budi butangila muntu yonso. Nsombelu udi nende muntu udi uleja luseke ludiye mulamate: lua bulelela anyi lua dishima. Nsombelu wa bantu badi ku luseke lua Nzambi mmuashila mu bulelela bua mu Dîyi diende anyi Bible. Muntu yonso udi kayi ulonda bulelela, udi mu bianza bia Satana (nansha yeye mumanye anyi kayi mumanye), bualu “bena panu bonso badi mu bianza bia Muena bubi.”​—1 Yone 5:19, MMM; Matayo 7:13, 14.

Bua tshinyi bantu ba bungi badi batamba kushima?

Bu mudi “bena panu bonso” mu bianza bia Satana, ke bua tshinyi bantu ba bungi batu bashima. Kadi tudi mua kudikonka ne: ‘Bua tshinyi Satana “tatu wa mashimi” uvua mushime?’ Satana uvua mumanye ne: Yehowa ke udi mukumbanyine kuikala Mukalenge wa bintu bionso bivuaye mufuke, too ne wa bantu babidi ba kumpala. Nansha nanku, wakajinga kupeta tshintu tshivua katshiyi tshiende, mbuena kuamba ne: muaba wa pa buawu ne mubandile wa Nzambi. Lukuka ne dijinga dibi ke biakamusaka bua kulongolola malu bua kunyengaye Yehowa muaba wende. Bua kukumbajaye dijinga dibi edi, wakadinga.​—1 Timote 3:6.

Netuambe tshinyi bua matuku etu aa? Kuenaku mumone ne: lukuka ne majinga mabi ke malu manene adi asaka bantu bua kushima anyi? Bena mu bitendelelu bia dishima, bangenda-mushinga ba lukuka, ne bena tshididi badi kabayi ne malu malulame badi bashima bikole, bakonyangaja malu ne bakosangana mishiku. Mbua tshinyi? Bualu misangu ya bungi bantu badi ne lukuka ne mbasue kulua babanji lukasa lukasa, kubanda mianzu, kuikala bamfumu peshi kuikala miaba idi kayiyi mibakanyine. Mukalenge wa meji Solomo wakamba ne: Muntu ‘udi ne lukuluku bua kudivuija mubanji kêna ubinga.’ (Nsumuinu 28:20) Mupostolo Paulo wakafunda pende ne: “Lukuka lua biuma ludi muji wa malu mabi a mishindu yonso.” (1 Timote 6:10) Tudi mua kuamba bia muomumue bua dijinga dipite dia kuikala mfumu anyi dia kubanda mianzu.

Bualu bukuabu budi bufikisha bantu ku dishima mbuôwa; buôwa bua tshidi mua kuenzeka bu bobu bambe bulelela anyi bua tshidi bakuabu mua kuamba. Pa tshibidilu, bantu batu basue bua bakuabu babanange ne babanyishe. Kadi dijinga edi didi mua kubasaka bua kukonyangaja bulelela nansha kakese bua kusokoka bilema biabu, malu kampanda mabi anyi anu bua bakuabu babamone bu bantu bimpe. Ke bualu kayi Solomo wakafunda ne: ‘Patshina muntu bakuabu, bualu ebu budi buteyi kudiye, kadi udi weyemena Yehowa neapanduke.’​—Nsumuinu 29:25.

Tushale balamate Nzambi wa bulelela

Manfred uvua muandamune tshinyi pavua shefu wende wa mudimu mumuele nkonko? Uvua mumuambile bulelela. Uvua muambe ne: “Mulongeshi mmutulekelele lelu kumpala kua dîba, ke bualu kayi ndi mulue ku mudimu. Kadi tshiena mua kuakula pa muaba wa bakuabu to. Udi mua kubakonka bobu nkayabu.”

Manfred uvua mua kuikala mufile diandamuna dia meji kadi dikale dia dishima bua balongi nende bamuanyishe. Kadi uvua ne malu avua mamusake bua kuamba anu bulelela. Manfred udi Ntemu wa Yehowa. Kuamba bulelela kuvua kumuambuluishe bua kulamaye kondo ka muoyo kimpe. Kuvua kufikishe kabidi  mfumuende wa mudimu bua kumueyemena. Mu mudimu uvuabu bamulongesha, bakatuma Manfred mu tshibambalu tshia tshienza bilengejilu bia mabue a mushinga mukole, muaba uvuabu kabayi batuma balongi. Bidimu 15 panyima, pavuabu babandishe Manfred muanzu ku mudimu, shefu wende wa mudimu au wakamubikila ku nshinga bua kumuela kalumbandi ne kumuvuluija musangu uvuaye mulamate ku bulelela.

Bu mudi Yehowa muikale Nzambi wa bulelela, muntu yonso udi musue kuikala mu malanda mimpe nende udi ne bua ‘kulekela mashimi’ ne ‘kuamba mêyi malelela.’ Musadidi wa Nzambi udi ne bua kunanga bulelela. Solomo wakafunda ne: ‘Mumonyi udi mua kueyemenyibua kêna udinga nansha.’ Kadi dishima dine ntshinyi?—Efeso 4:25; Nsumuinu 14:5.

Dishima ntshinyi?

Dishima dionso mbualu budi kabuyi bulelela, kadi bualu buonso budi kabuyi bulelela kabuena anu dishima to. Bua tshinyi tudi tuamba nunku? Mukanda kampanda udi umvuija dishima bu “bualu budi muntu wamba budiye mumanye anyi wela meji ne: ki mbulelela nansha, kadi ubuamba bua kupambuisha bakuabu.” Mu bintu bidi bileja dishima mudi too ne dijinga dia kupambuisha muntu. Kadi kuamba bualu budi kabuyi bulelela kabiyi ku bukole (bu mudi kuleja muntu malu adi kaayi malelela mu dipanga) kakuena diatshimue ne kushima to.

Tudi kabidi ne bua kutangila bikala muntu udi utukonka bualu mukumbanyine bua kumanya malu onso. Tshilejilu, fuanyikijabi ne: shefu wa mu kumpanyi mukuabu ke uvua muele Manfred nkonko. Manfred uvua muenzejibue bua kumuambila malu onso anyi? Tòo. Bu muvua shefu eu kayi mukumbanyine kumanya malu au, Manfred kavua muenzejibue bua kumuandamuna to. Tshidibi, nansha bu biobi bikale nanku, kabivua bimpe bua ashime to.

Ntshilejilu kayi tshivua Yezu Kristo mushiye mu muanda eu? Musangu kampanda, Yezu uvua uyukila ne bamue bantu bavua kabayi bamuitabuja kadi bavua basue kumanya malu a luendu luende. Bakamubela ne: ‘Umuka kuneku, ndaku mu Yudaya.’ Yezu wakabandamuna bishi? ‘Ndayi bienu ku disanka [ku Yelushalema], tshiena nya katataka ku disanka edi, bua dîba dianyi kadiena dianji kukumbana.’ Kadi mutantshi mukese pashishe, Yezu kuyaye ku Yelushalema bua tshibilu tshia disanka atshi. Bua tshinyi uvua mubandamune nanku? Kabavua bakumbanyine kumanya miaba yonso ivuaye uya to. Nunku nansha muvua Yezu kayi mushime, kavua mubambile malu onso bua kabamuenzedi yeye anyi bayidi bende bibi. Yezu kavua mushime to, bualu mupostolo Petelo wakafunda bua bualu buende ne: ‘Yeye kakenza bualu bubi, kabakamusangana ne didinga mukana muende.’​—Yone 7:1-13; 1 Petelo 2:22.

Netuambe tshinyi bua Petelo muine? Mu butuku buvuabu bakuate Yezu, kavuaku mushime misangu isatu mijima, uvila muvuaye kayi mumanye Yezu anyi? Eyowa, Petelo wakatshina bantu  ne kushimaye. Kadi diakamue pashishe “wakadila bikole” ne kunyingalalaye bua bualu abu, ne bakamufuila luse. Kadi Petelo uvua mupete dilongesha ku tshilema tshivuaye muenze. Matuku makese panyima, wakakula bualu bua Yezu kumpala kua bantu ba bungi ne wakabenga ne muoyo mukole bua kupuwa pavua bamfumu ba bena Yuda ba mu Yelushalema bamukandike. Bulelela, butekete bua mutantshi mukese bua Petelo ne dinyingalala diende pa lukasa bidi ne bua kutukankamija tuetu bonso, bualu imue misangu tudi mua kupeta butekete ne kuakula bibi anyi kuenza bualu bubi.​—Matayo 26:69-75; Bienzedi 4:18-20; 5:27-32; Yakobo 3:2.

Bulelela nebushalaku kashidi

Nsumuinu 12:19 udi uleja ne: ‘Muntu udi wamba mêyi malelela neashaleku kashidi, kadi udi wamba mêyi a mashimi udiku anu katupa kîpi.’ Eyowa, mêyi a bulelela atu ashalaku kashidi. Pashishe, padi bantu badienzeja bua kuamba anu bulelela ne kuenza malu adi umvuangana nabu, malanda abu adi alengela ne ashindama. Bushuwa, kuamba bulelela kutu kupetesha muntu masanka diakamue, bu mudi: kondo ka muoyo kimpe, lumu luimpe ne malanda makole pankatshi pa mulume ne mukajende, pa bena mu dîku, pa balunda, too ne pa bena mudimu.

Kadi dishima ditu anu dimanyika. Muena mashimi udi mua kushima bua matuku makese, kadi mu bungi bua matuku batu anu balua kumuvumbula. Pashishe kabidi, Yehowa Nzambi wa bulelela mmumane kulongolola dîba diajika mashimi ne bena dishima. Bible udi wamba ne: Yehowa neumbushe malu onso a Satana Diabolo, tatu wa mashimi udi udinga ba pa buloba bujima. Mu katupa kîpi emu, Yehowa neatuishe dishima ne bena dishima ku tshibungubungu.​—Buakabuluibua 21:8.

Nebikale disanka dia bungi pikala ‘muntu udi wamba mêyi malelela’ ushindama bua kashidi ne tshiendelele!

[Mêyi adi kuinshi]

[Lungenyi lunene lua mu dibeji 5]

Lukuka ne majinga mabi ke malu adi asaka bantu ba bungi bua kushima

[Lungenyi lunene lua mu dibeji 6]

Dishima dionso mbualu budi kabuyi bulelela, kadi bualu buonso budi kabuyi bulelela kabuena anu dishima to

[Tshimfuanyi mu dibeji 6]

Tudi tulongela tshinyi ku mushindu uvua Petelo muvile Kristo?

[Tshimfuanyi mu dibeji 7]

Kuamba bulelela kudi kupetesha bantu malanda mimpe ne mashindame