Mmupepele, kadi mmulelela anyi?

MU NGONDO wa 9 tshidimu tshia 2005, Ekeleziya wa Anglikane uvua ne disanka dia bungi bua kuanyisha dipatuka dia mukanda wa Bible wa minite 100 (The 100-Minute Bible). Mukanda eu mmupatula bua kuubala anu mu minite 100 patupu. Mu mukanda mupiamupia au mbafunde mu tshikoso malu onso a mu Mifundu ya tshiena Ebelu mu mabeji 17 ne malu yonso a mu Mifundu ya tshiena Greke mu mabeji 33 ne mabeji onso aa mmafunde anu luseke lumue. Muntu mukuabu uvua mubalulule mukanda eu udi wamba ne: mbumusha bitupa bionso bia mu Bible “bitu bikole bua kubiumvua.” Bushuwa, mmupepele bua kuubala, kadi mmulelela anyi?

Mu mukanda emu kuamuena dîna dia Nzambi Yehowa to, ne bantu batu babala Bible bikole nebapetamu malu makuabu kabidi adi kaayi malelela to. (Musambu 83:18) Tshilejilu, mu tshitupa tshia 1 badi bamba ne: Nzambi “wakafuka diulu ne buloba mu matuku asambombo tshianana.” Kadi pabi Genese 1:1 udi wamba ne: “Kale ku tshibangidilu Nzambi wakafuka diulu ne buloba.” Panyima pa bualu ebu, Bible udi wakula bua difuka dia bintu bia pa buloba divua dinenge “matuku” asambombo anyi bikondo bisambombo. Pashishe, Genese 2:4 udi ubikila mu tshikoso tshikondo tshionso tshia bufuki ne: ‘dituku diakenza Yehowa Nzambi buloba ne diulu.’

Bilondeshile Bible wa minite 100 eu, bakakengesha muena lulamatu Yobo kudi “Satana musadidi wa [Nzambi], . . . udi wende mudimu ngua kubanda bantu.” Udiku mumone dibenga kupetangana muaba eu anyi? Muaku “Satana” udi umvuija “Muluishi.” Nunku, Satana kêna mua kuikala musadidi wa Nzambi bu mudibu bamba emu to, kadi mmuluishi munene wa Nzambi ne mmudienze yeye nkayende mubandi wa bantu.​—Buakabuluibua 12:7-10.

Netuambe tshinyi bua tshitupa tshia Mifundu ya mu tshiena Greke tshidi mu Bible wa minite 100? Mukanda eu udi wamba bua lusumuinu lua mbuji ne mikoko ne: Yezu udi wanyisha aba badi bambuluisha “bantu bapuekele bonso,” pabi Yezu wakamba mu bulelela ne: ba disanka ngaba badi bambuluisha “bana” babu tuamba ne: bantu badi balonda mu dikasa diende . (Matayo 25:40) Malu a mu Buakabuluibua adibu bambe mu tshikoso mu mukanda eu adi aleja ne: “Lomo, udi uleja Babulona munene uvua ne bua kubutudibua butubutu.” Pabi, balongi ba Bible mbamanye ne: kakuena nansha tshintu tshimue tshidi mu mikanda ya kele tshidi tshileja “Babulone Munene” mushindu eu to.​—Buakabuluibua 17:15–18:24.

Bua bantu bonso badi basue kumanya Mufuki wabu ne kumvua bimpe malu adiye mulongolole, kakuena tshintu tshidibu mua kupingaja pa muaba wa Bible mujima to. Bushuwa, kubala Bible nekuangate mêba a bungi kupita pa minite 100, kadi kumubala nanku kudi kutupetesha masanka a bungi. (Yone 17:3) Tudi tukulomba bua kuitamba lutatu elu bua wewe kudipetela nkayebe masanka kaayi kuamba.​—2 Timote 3:16, 17.