Nkonko ya babadi

‘Mvita ya Nzambi wa Bukole Buonso’ ya Armagedone ntshinyi? Ne tshienzeke pashishe ntshinyi?​—Buakabuluibua 16:14, 16.

Mu ngakuilu mupepele, mvita ya Armagedone mmvita ya buloba bujima ikala Mukalenge Yezu Kristo udi Yehowa muteke mua kubutula baluishi bonso ba Nzambi. Bible udi leja mudi baluishi aba, ‘bakalenge ba pa buloba buonso’ benda basangishibua ku mêyi a ‘nyuma ya bademon,’ ne badi babasangisha ‘ku mvita ya dituku dinene dia Nzambi wa Bukole Buonso mu muaba udibu babikila mu muaku wa tshiena-Ebelu ne: Ha-Megido’ anyi Armagedone.​—Buakabuluibua 16:14, 16.

Ki muaba muena dîna wetu eu to. Dîna Ha-Megido anyi Armagedone ndikudimuna kabidi ne: “Harmagedone,” didi diumvuija “Mukuna wa Megido.” (Buakabuluibua 16:16, note kuishi kua dibeji mu MMM) Kakutu kuanji kuikala mukuna muinyika dîna edi to. Kabidi, ‘bakalenge ba pa buloba buonso ne bena mvita babu’ kabena mua kukunguila pa muaba umuepele ne kukumbanabu to. (Buakabuluibua 19:19) Nanku, ‘muaba eu’ udi uleja mmuenenu kampanda anyi nsombelu udibu benda bapesha bamfumu ba tshididi ne bantu badi babatua nyama ku mikolo, muikale ubengangane ne disua dia Yehowa didibu benza kudi ‘bena mvita ba mu diulu’ balombola kudi Yezu Kristo ‘Mfumu wa bamfumu ne Mukalenge wa bakalenge.’​—Buakabuluibua 19:14, 16.

Kadi bualu bua dikema, muaku ‘Armagedone’ udi upetangana ne tshimenga tshia kale tshia mu Isalele tshia Megido. Tshimenga etshi tshivua ku Est kua Mukuna wa Kamela, muvua njila minene ivua bangenda-mushinga ne basalayi ba mu tshikondo atshi bapitshila. Tshivua kabidi muaba uvuabu baluila mvita ya katshi ku dinu, uvua tshisumbu tshimue ne bua kushimuna tshikuabu pa ku kujika. Tshilejilu, pabuipi ne ‘mâyi manene a Megido’ mpavua mulumbuluishi wa Isalele Balaka mutshimuina tshiluilu tshikole tshia bena Kanana tshivua tshilombola kudi jenerale wabu Sisela. (Balumbuluishi 4:12-24; 5:19, 20) Pabuipi ne mukuna eu kabidi, mulumbuluishi Gideona wakatshimuna bena Madiana bibi. (Balumbuluishi 7:1-22) Padi Bible ulamakaja Megido ne dilua dia mvita, udi utushindikila ne: Nzambi neabutule baluishi bende bonso ku diambuluisha dia Muanende Yezu.

Ntshinyi tshienzeka panyima pa mvita ayi? Mvita ya Armagedone neyumbushe buenzavi ne malu mabi pa buloba. Panyima payi nekuikale tshikondo tshimpe tshitambe bua bantu. (Buakabuluibua 21:1-4) Bukalenge bua Nzambi nebuenze ne dinanga dionso bua buloba bulue mparadizu muikala bantu bakane basombela kashidi.​—Musambu 37:29.