Ntshinyi tshitudi mua kulongela kudi bana?
Ntshinyi tshitudi mua kulongela kudi bana?
BOBU batuambe ne: “Udi wenza malu anu bu muana” netumvue bibi be! Nansha mutu bana ne ngikadilu milenga, kabatu ne meji, ne dimanya dia malu anyi lungenyi lushindame bitu muntu upeta anu padiye ukola.—Yobo 12:12.
Nansha nanku, dimue dituku Yezu wakambila bayidi bende ne: ‘Bulelela, ndi nuambila ne: Binuikala kanuyi nukudimuna mitshima yenu, binuikala kanuyi nulua bu bana bakese, kanuena nubuela mu bukalenge bua mu diulu.’ (Matayo 18:3) Yezu uvua musue kuamba tshinyi? Bana batu ne ngikadilu kayi idi bantu bakulumpe ne bua kuidikija?
Tuikala tudipuekesha anu bu bana
Tumone tshivua tshisake Yezu bua kuakula nanku. Panyima pa yeye ne bayidi bende bamane kuenza luendu lule bua kufika ku Kapênuma, wakabebeja ne: ‘Panuakadi mu njila, nuakuelangana mpata ya tshinyi?’ Bayidi bakashala bapuwe bua bundu, bualu bavua bakokangane mu njila bua kumanya uvua munene munkatshi muabu. Kadi bakapeta muoyo mukole wa kukonka Yezu ne: ‘Mu bukalenge bua mu diulu udi mutambe bakuabu nganyi?’—Mâko 9:33, 34; Matayo 18:1.
Bidi mua kukemesha bua kumona muvua bayidi bakokangana bua mianzu panyima pa bamane kusomba ne Yezu bidimu bitue ku bisatu bijima. Tshia tuetu kumanya ntshia se: bavua bakolele mu tshitendelelu tshia bena Yuda tshivua tshiangata malu aa ne mushinga wa bungi. Bidi bimueneka ne: tshitendelelu
etshi ne dipanga bupuangane biakanyanga lungenyi lua bayidi.Yezu wakasomba, kubikila bayidi bende ne kubambila ne: “Pikala muntu musue kuikala wa kumpala, ikale wa ndekelu ku bonso, ne musadidi wa bonso.” (Mâko 9:35) Mêyi aa avua mua kuikala mabakemeshe bikole. Ngelelu wa meji wa Yezu uvua mushilangane ne wa bena Yuda pa bidi bitangila kuikala muntu munene! Ke Yezu kubikila muana mutekete. Kumuelaye diboko ku nshingu ne disanka ne kushindikaye dilongesha diende edi: ‘Bulelela, ndi nuambila ne: Binuikala kanuyi nukudimuna mitshima yenu, binuikala kanuyi nulua bu bana bakese, kanuena nubuela mu bukalenge bua mu diulu bulelela. Wadipuekesha bu muana eu mukese, yeye udi mutambe bakuabu mu bukalenge bua mu diulu.’—Matayo 18:3, 4.
Ndilongeshapu kayi dinene dia budipuekeshi! Anji fuanyikija tshisumbu tshia bantu bakulumpe tshinyunguluke muana mukese, bonso bashale bamutangile. Muana uvua ne bundu kadi kayi ne buôwa bua ne: bavua mua kumuenzela bibi to. Kavua ne lungenyi lua ditembangana anyi meji mabi. Uvua ne lungenyi lua kutumikila ne kudipuekesha. Bulelela, muana mukese au uvua tshilejilu tshia ngikadilu udi Nzambi ulomba wa budipuekeshi.
Dilongesha dia Yezu nditoke bimpe. Tuetu bonso tudi ne bua kuikala tudipuekesha tuetu basue kupiana Bukalenge bua Nzambi. Munkatshi mua bena Kristo balelela, kamuena muaba wa ditembangana anyi didibandisha to. (Galatia 5:26) Ngikadilu mibi eyi ke ivua mitambe kusaka Satana Diabolo bua kutombokela Nzambi. Kabiena bikemesha bua mudi Yehowa muyikine!—Nsumuinu 8:13.
Bena Kristo balelela batu bakeba kukuatshila bakuabu mudimu, ki nkubakokesha to. Kudipuekesha kulelela kudi kusaka muntu bua kukuatshila bakuabu mudimu nansha bobu bashadile kudiye anyi mudimu au kauyi umusankisha. Midimu mipuekele eyi itu itupetesha masanka. Yezu wakamba ne: ‘Witabuja muana mukese nunku mu dîna dianyi udi ungitabuja meme; wangitabuja meme, kêna ungitabuja meme nkayanyi, udi witabuja udi muntume.’ (Mâko 9:37) Tuetu bikale ne kalolo ne tudipuekesha bu bana, netuikale mu buobumue ne Muntu mutambe bunene wa mu diulu ne pa buloba ne Muanende kabidi. (Yone 17:20, 21; 1 Petelo 5:5) Netuikale ne disanka didi difumina ku dipeshangana bintu. (Bienzedi 20:35) Netuikale kabidi ne diakalenga dia kuenza bua ne: ditalala ne buobumue bikale munkatshi mua bena Kristo balelela.—Efeso 4:1-3.
Mbasue kulonga ne badi beyemena bakuabu
Yezu udi uleja bualu bukuabu budi bantu bakulumpe mua kulongela kudi bana. Udi wamba ne: ‘Muntu yonso udi kayi witabuja bukalenge bua Nzambi bu muana mukese, kêna ubuelamu.’ (Mâko 10:15) Bana kabatu anu badipuekesha; batu bitaba bua babalongeshe kabidi. Mamu mukuabu udi wamba ne: “Batu bamina dimanya anu bu mutu tshivar tshimina mâyi.”
Nunku, bua tuetu kupiana Bukalenge bua Nzambi, tudi ne bua kuitaba mukenji wa Bukalenge ne kuutumikila. (1 Tesalonike 2:13) Anu bu bana ba mu maboko, tudi ne bua ‘kujinga mabele a meji adi kaayi ne kudinga, bua tuetu tudiunde too ne ku lupandu.’ (1 Petelo 2:2) Kadi netuenze tshinyi bituikala katuyi tumvua dilongesha kampanda dia mu Bible? Muntu mukuabu utu ulama bana udi wamba ne: “Bana batu batungunuka ne kuebeja ‘Bua tshinyi, bua tshinyi’ too ne padibu bapeta mandamuna mimpe ku nkonko yabu.” Tudi ne bua kubidikija. Nunku, tutungunukayi ne kulonga. Tuikalayi tuyukila ne bena Kristo bakadi bamonemone malu. Tulombe Yehowa bua atupeshe meji. (Yakobo 1:5) Kakuyi mpata, masambila atudi tuenza ne disuminyina neapete mandamuna mu tshikondo tshiawu.—Matayo 7:7-11.
Kadi bamue bantu badi mua kudiebeja ne: ‘Ki mbipepele bua kupambuisha bantu batu basue kulonga anyi?’ Kabiena mua kuenzeka bikalabu ne muntu wa kueyemena udi ubalombola. Tshilejilu, bana batu bakeba bua baledi babu babalombole. Tatu mukuabu udi wamba ne: “Baledi mbaleje bua tshinyi bana babu badi ne bua kubeyemena bualu badi babalama ne babakumbajila majinga abu dituku dionso.” Bia muomumue, tudi ne bua kueyemena Tatu wetu wa mu diulu Yehowa. (Yakobo 1:17; 1 Yone 4:9, 10) Yehowa udi utulombola bimpe menemene ku diambuluisha dia Dîyi diende didiye mufundishe. Nyuma wende ne bulongolodi buende bidi bitusamba ne bituambuluisha. (Matayo 24:45-47; Yone 14:26) Tuetu tukeba diambuluisha edi, malanda etu ne Nzambi kaakunyanguka nansha.—Musambu 91:1-16.
Tuetu tueyemena Nzambi anu mutu bana beyemena baledi babu, netuikale ne ditalala dia mu Yeshaya 41:10.
lungenyi. Mumanyi kampanda wa malu a mu Bible udi wamba ne: “Patutshivua bana, tuvua tuenza luendu katuyi ne makuta a kufuta njila ne katuyi bamanye mushindu wa kufika kutuvua tuya to. Kadi kabivua bianji kutufikila bua kuela mpata ne: baledi betu nebatufikishe kutuvua tuya.” Ke mutudi petu tueyemena Yehowa mu nsombelu wetu anyi?—Dieyemena Nzambi didi dituambuluisha bua kubenga kuikala ne lungenyi lubi anyi kuenza malu adi mua kunyanga malanda etu nende. Kadi tudi tuitaba ne muoyo umue mêyi a Yezu adi aleja mudi Tatu wetu wa mu diulu mumanye bienzedi bietu ne neatungunuke ne kutulama tuetu bikale tukeba kumpala Bukalenge buende ne buakane buende. Dieyemena edi nedituambuluishe bua kukandamena diteta dia kushindamena pa majinga etu a ku mubidi, eku tulengulula midimu yetu ya bena Kristo.—Matayo 6:19-34.
“Tuana tukese mu malu mabi”
Nansha mudi bana baledibua bapange bupuangane, badi ne muoyo mutoke ne meji mimpe. Ke bualu kayi Bible udi ubela bena Kristo ne: “Nuikale tuana tukese mu malu mabi.”—1 Kolinto 14:20.
Tuangate tshilejilu tshia Monique, muana wa bidimu bitanu, uvua muambile mamuende ne disanka dionso ne: “Sarah mulunda wanyi mupiamupia udi ne nsuki mienza mvuangala anu bu yanyi!” Kavua muleje muvua mubidi wa Sarah mushilangane ne wende ne muvuaye wa mu tshisamba tshikuabu to. Mamu mukuabu udi wamba ne: “Bana batekete kabatu batangila bikala mubidi wa bakuabu mufike anyi mutoke to. Kabatu bamanye dishilangana dia mibidi anyi kansungansunga.” Mu muanda eu, bana badi baleja bimpe menemene lungenyi lua Nzambi wetu udi kayi ne kansungansunga ne udi munange bantu ba mu bisamba bionso.—Bienzedi 10:34, 35.
Bana batu kabidi bafuilangana luse bikole. Tatu mukuabu udi wamba ne: “Pavua Jack ne Levi bapuekele bavua baluangana, kadi tuvua tubambila bua kufuilangana luse, ne mutantshi mukese pashishe badi batuadija kunaya kabidi ne disanka. Kabatu bela meji anyi bavuluka malu akadi mapite, peshi kabatu bindila bua babalombe luse bua kushisha kufuilanganabu pabu luse to. Badi batungunuka ne bulunda buabu kakuyi bualu.” Bushuwa, etshi ntshilejilu tshimpe tshidi bakulumpe mua kuidikija!—Kolosai 3:13.
Bualu bukuabu, bana batekete batu bitaba ne muoyo umue mudi Nzambi muikaleku. (Ebelu 11:6) Bu mutubu bakula malu onso patoke, bitu bibasaka misangu ya bungi bua kuyisha bakuabu ne dikima. (2 Bakelenge 5:2, 3) Masambila adibu benza ne muoyo mujima mu mêyi mapepele adi mua kulenga nansha bantu batu ne mioyo mubi anyi kabayi luse. Ne padibu kumpala kua diteta, badi mua kuleja bukole bua dikema bua kudikandamena. Bana badi dipa dimpe menemene!—Musambu 127:3, 4.
Bulenga budi bupingana
Nudi mua kudiebeja ne: ‘Bantu bakulumpe badiku mua kupetulula ngikadilu ya ku buana anyi?’ Eyowa! Mubelu wa Yezu wa ‘kulua bu bana bakese’ udi uleja ne: bidi mua kuenzeka.—Matayo 18:3.
Tuangate tshilejilu: Bantu kampanda badi balongolola tshintu tshia mushinga mukole. Mu dilongolola diabu, badi bumbusha butshiafu buonso buvua bulamatepu ne balongolola kabidi bintu bivua bantu bakuabu balongolole bibi. Panyima pa mudimu muenza ne lutulu kudi bantu aba, tshintu tshidibu balongolole tshidi tshimueneka tshimpe ku mêsu kua bantu bonso. Bia muomumue, bua diambuluisha dia nyuma wa Yehowa ne dia bena Kristo netu, ne bituikala tudienzeja tuetu bine bikole tudi mua kupetulula ngikadilu milenga ituvua nayi ku buana.—Efeso 5:1.
[Tshimfuanyi mu dibeji 9]
Bana batu badipuekesha
[Tshimfuanyi mu dibeji 10]
Bana kabatu ne kansungansunga, ne batu bafuilangana luse lukasa ne bapua muoyo