Malu a mu nsombelu

Tshintu munangile kuvuija bantu bayidi

Malonda kudi Pamela Moseley

Mu 1941, pavua mvita itua ipela mu ditunga dia Angleterre, tuvua baye ne mamu mu mpungilu wa Bantemu ba Yehowa mu tshimenga tshia Leicester. Tuvua bateleje muyuki wa pa buawu uvua Joseph Rutherford muenze bua bana. Meme ne mamu tuvua batambule mu mpungilu au, ne ngakamona muvua bantu bavua batulongeshe Bible bikale ne disanka. Tshivua muanji kumanya disanka ditu difumina ku divuija bantu bayidi ba Yezu Kristo.

TUVUA batuadije kulonga Bible mu 1940. Ntshidi muvuluke dituku dibi divua Mvita Mibidi ya Buloba bujima mituadije mu ngondo wa tshitema 1939. Mvua mumona mamu upuekesha binsonji ne udikonka ne: “Bua tshinyi katuena mua kupetaku ditalala pa buloba?” Baledi banyi bonso babidi bavua mu busalayi mu Mvita ya Kumpala ya Buloba bujima ne bavua bamone malu mabi avua menzekemu. Mamu wakaya kuela mpasata wa Ekeleziya wa bena Anglikane wa mu tshimenga tshia Bristol lukonko luende. Mpasata kumuandamuna ne: “Mvita itu anuku ne neyitungunuke anu ne kuikalaku.”

Kadi matuku makese panyima, mamu mukuabu mukulakaje wakalua kuetu. Uvua Ntemu wa Yehowa. Mamu wakamuela lukonko luende alu ne: “Bua tshinyi buloba kabuena mua kuikalaku mu ditalala?” Ntemu wakamumvuija ne: mvita idi munkatshi mua malu adi aleja ne: tudi ku nshikidilu kua tshikondo tshibi etshi. (Matayo 24:3-14) Matuku makese panyima, muana wa bakaji wa mamu eu wakatuadija kutulongesha Bible. Yeye ne muanende eu bavua munkatshi mua bantu bavua ne disanka dituku dituvua batambule. Bua tshinyi tudi tupeta disanka patudi tuvuija bantu bayidi? Ngakapeta diandamuna pashishe. Lekelayi ndulondele amue malu andi mulonge mu bidimu bipite pa 65 bia divuija bantu bayidi.

 Ndi mpeta disanka dia kulongesha

Ngakatuadija mudimu wa kuyisha lumu luimpe lua Bukalenge bua Nzambi mu tshimenga tshia Bristol pamvua ne bidimu 11. Muanetu mukuabu wa balume wakampesha tshisanji tshia fono ne karte ka diyisha naku, kungambilaye ne: “Mpindieu, udi uya ku nzubu yonso idi luseke lukuabu lua njila eu.” Ke mungakatuadija kuyisha nanku, nkayanyi. Bushuwa, mvua ne buôwa bua bungi. Mvua ngelela muntu ditadi divua ne muyuki mushindamene mu Bible ne pashishe mvua muleja karte ka diyisha naku kavua kalomba bantu bua kuitaba mikanda ya malu a mu Bible.

Bidimu bikese pashishe, bakatuadija kusaka bamanyishi bua kubadila bantu Bible pavuabu bayisha ku nzubu ne ku nzubu. Bu mumvua muntu wa bundu, biakanji kunkolela bua kuyukila ne bantu bamvua tshiyi mumanye ne kubumvuija mvese ya mu Bible. Kadi ngakalua kukola ku muoyo. Ke dîba diakatuadija mudimu eu kunsankisha. Bamue bantu bavua batumona anu bu bapanyishi ba mikanda, kadi mpindieu patuvua tubabadila mvese ya mu Bible ne tuyumvuija, bavua bamona mutuvua balongeshi ba Dîyi dia Nzambi. Bua mushindu uvua mudimu eu unsankisha, ngakajinga kuuvudija. Ke meme kulua mpanda-njila anyi mumanyishi wa Bukalenge wa ku dîba ne ku dîba mu ngondo wa tshitema mu 1955.

Disuminyina ditu difuta

Bumue bua ku malu a kumpala angakalonga buvua bua se: disuminyina ditu difuta. Dikuabu dituku, mvua mushile mamu mukuabu Tshibumba tshia Nsentedi. Dîna diende uvua Violet Morice. Pangakapingana bua kumonangana nende kabidi, wakunzulula tshiibi, kuvunga maboko ende ne kuteleja ne ntema malu a mu Bible amvua mmuambila. Misangu yonso imvua nya kumutangila, uvua umueneka wanyisha malu amvua mmuambila. Kadi pangakamulomba bua kuikala kulonga nende Bible, wakangambila ne: “Tòo. Nenshishe kulonga pakola bana banyi.” Ngakumvua bibi be! Bible udi wakula bua ‘tshikondo tshia kukeba ne tshikondo tshia kujimija.’ (Muambi 3:6) Ngakabenga kujimija.

Ngondo umue panyima, meme kupingana kabidi bua kukonkonona ne Violet mvese mikuabu. Mutantshi mukese pashishe, tukavua tulonga nende Bible lumingu luonso bimanyine anu ku tshiibi. Ku shoo, yeye kungambila ne: “Ndi mumone ne: udi mua kubuelela mu nzubu.” Violet wakalua muena Kristo nanyi ne mulunda wanyi munene. Eyowa, wakatambula ne kuluaye Ntemu wa Yehowa.

Dimue dituku Violet wakumvua ne: bayende uvua mupanyishe lupangu luabu kayi mumuambile ne uvua mumunyeme. Mutu wakamupandika. Kadi ku diambuluisha dia Ntemu kampanda uvua mulunda wende, wakapeta nzubu mukuabu anu dine dituku adi. Bua dianyisha divuaye nadi kudi Yehowa, wakangata dipangadika dia kuikala mpanda-njila matuku onso a muoyo wende. Pamvua mumone muvua nyuma wa Yehowa mumupeshe tshisumi bua ntendelelu mulelela, ngakamona disanka ditu difumina ku divuija bantu bayidi. Bulelela, ngakangata dipangadika dia kuenza mudimu eu munkatshi mua muoyo wanyi mujima!

Mu 1957 bakatutuma, meme ne Mary Robinson bu bampanda-njila mu Rutherglen muaba uvua bantu ba bungi benzela mudimu mu tshimenga tshia Glasgow mu ditunga dia Écosse. Tuvua tuyisha nansha pavuaku mabungi, tshipepele tshikole, mvula anyi neje; kadi tuakapeta difutu. Dimue dituku ngakapetangana ne Jessie. Mvua musue bikole patuvua tulonga nende Bible. Bayende Wally uvua koministe ne uvua ungepuka kumpala. Pakalongaye Bible ne kumonaye ne: anu Bukalenge bua Nzambi ke buatuadila bantu nsombelu muimpe, wakasanka bikole. Bonso babidi bakatuadija pabu kuvuija bantu bayidi.

Tshimuenekelu tshia kumpala tshidi mua kudinga

Bakatutuma pashishe mu tshimenga tshia Paisley mu Écosse. Dimue dituku pamvua nyisha, mamu mukuabu wakankangila tshiibi ne tshiji tshionso. Kadi mutantshi mukese  pashishe wakalua kunkeba bua kundomba luse. Pangakapingana kuende lumingu luvua lulonde, wakangambila ne: “Mvua mumone anu bu ne: mvua mukangile Nzambi tshiibi. Ke bualu kayi bivua bikengela kunkeba.” Diende uvua Pearl. Wakangambila ne: bua mushindu uvua balunda ne balela bende bamuele mâyi ku makasa, uvua musambile Nzambi bua apete mulunda mulelela. Kungambilaye ne: “Ke dîba diuvua mukokole ku tshiibi adi. Mpindieu ndi mmona ne: udi ne bua kuikala mulunda mulelela au.”

Kulua mulunda wa Pearl kakuvua kupepele to. Uvua musombele kulu kua kakuna kakole, ne mvua ne bua kukabanda ku makasa. Dituku dimvua muye kamuangata bua kuya nende mu bisangilu musangu wa kumpala, tshipepele tshikole ne mvula biakamba kunshindisha. Dikumbi dimvua nadi diakapandika, meme kudimansha. Ngondo anu isambombo panyima pa Pearl mumane kunkangila tshiibi, wakatambula bua kuleja muvuaye mudilambule kudi Nzambi.

Abidi asatu, bayende pende wakitaba bua kulonga Bible ne panyima pa matuku makese, ngakaya kuyisha nende ku nzubu ne ku nzubu. Bu pa tshibidilu, mvula uvua uloka. Wakangambila ne: “Kabikutondi to. Ntu ne tshibidilu tshia kuimana mêba a bungi mu mvula wa nunku bua kumona ndundu. Nunku ndi mua kumana mu mvula bua Yehowa.” Tshisumi tshia bena mu Écosse tshitu tshinkemesha bikole.

Mvua ne disanka dia bungi pamvua mupingane bidimu bivule panyima ne mumone ne: bantu ba bungi bamvua mulonge nabu Bible batshidi anu batantamana mu ditabuja. Edi ke disanka dia kuvuija bantu bayidi. (1 Tesalonike 2:17-20) Mu 1966, panyima pa meme mumane kuenza bumpanda-njila mu ditunga dia Écosse bidimu bipite pa muanda mukulu, bakambikila mu Tshilongelu tshia Bible tshia Gilada bua kulonga mua kuikala misionere.

Kuyisha ku ba bende

Bakantuma mu ditunga dia Bolivie, mu tshimenga tshia Santa Cruz muvua tshisumbu anu tshimue tshia bamanyishi 50. Tshimenga atshi tshivua tshimvuluija tshikisu ne tshinyangu bivua ku Ouest kua États-Unis anu mutubu babileja mu filme amu. Pandi mvuluka mudimu wanyi, ndi mmona ne: tshivua misionere wa pa buende nansha. Ngandu kayitu mianji kungipata bua kunkuata, kakutu tshisumbu tshia bantu ba tshikisu batu bakeba kuntuta; tshitu muanji kujimina mu tshipela anyi mubande mu mazuwa madine mu mâyi to. Tshidibi, buanyi meme, kuvuija bantu bayidi kutu anu bualu bua disanka.

Umue wa ku bamamu bakumpala bamvua mulonge nabu Bible mu Santa Cruz uvua Antonia. Kulongesha Bible mu tshiena-Espagne kuvua kunkolele menemene. Dituku dikuabu, kana ka balume ka Antonia kakamuambila ne: “Mamu, yeye udi wakula ne bilema anu bua kutusekesha anyi?” Panyima pa matuku, Antonia ne muanende wa bakaji Yolanda bakalua bayidi. Yolanda uvua ne mulunda wende Dito uvua ulonga malu a bundumbulula ku iniversite. Dito wakabanga pende kulonga Bible ne kubuela mu bisangilu bietu bia Bantemu ba Yehowa. Ku diambuluisha diende, ngakalonga bualu bukuabu mu dilongeshangana bulelela: Imue misangu bitu bimpe kusakaku bantu kakese.

Pavua Dito mutuadije kunyema dilonga dietu dia Bible, ngakamuambila ne: “Dito, Yehowa kêna ukuenzeja bua utue Bukalenge buende nyama ku mikolo to. Udi ne bua kusungula tshiudi musue.” Yeye kungambila ne: uvua musue kuenzela Nzambi mudimu. Ke meme kumuambila ne: “Mu nzubu muebe emu udi ne bimfuanyi bia mfumu munene udi uluisha mbulamatadi. Muntu yeye mubimone, udiku mua kuamba ne: udi musungule bua kutua Bukalenge bua Nzambi nyama ku mikolo anyi?” Ke disaka dikese divuaye nadi dijinga adi.

Mbingu ibidi pashishe, tshimvundu tshiakajuka, ne bampulushi ne balongi ba mu iniversite kuluanganabu bonso ne bingoma. Dito wakambila mulunda uvuabu nende ne: “Tumbuke muaba eu!” Mulunda wende wakamuandamuna ne: “Tòo! Edi ndituku dietu dinene dituvua bindile.” Kuangataye musangu umue tshingoma kubandaye pa malata a iniversite. Uvua munkatshi mua balunda muanda mukulu ba Dito bavua bafue dituku adi. Nudiku mua kufuanyikija disanka dimvua nadi dia kumona Dito, uvua ne bua kuikala mufue bu yeye kayi muangate dipangadika dia kulua muena Kristo mulelela anyi?

Ndi mmona mudi nyuma wa Yehowa wenzeja malu

Dimue dituku mvua mpitshila kumpala kua lupangu lua mamu mukuabu, ngela meji ne: tukavua  babueleku, ke yeye kutumona ne kutubikilaye. Diende uvua Ignacia. Uvua mumanye amue malu a Bantemu ba Yehowa, kadi bayende Adalberto (uvua mpulushi munene mule) uvua umuluisha bikole ne wakamupangisha bua kuya kumpala. Ignacia kavua umvua malongesha a bungi a nshindamenu to, ke meme kutuadija kulonga nende Bible. Nansha muvua Adalberto mudisuike bua kuimanyika dilonga dietu, mvua nyukila nende mutantshi mule bua malu makuabu. Ke muakatuadija bulunda buetu nanku.

Pangakamona Ignacia ulua muena Kristo muimpe uvua wambuluisha bantu ne ubasamba, ngakapeta disanka dia bungi. Bayende ne bana bende basatu bakalua pabu Bantemu. Pavua Adalberto mumvue bulenga bua lumu luimpe, wakaya ku nzubu wa bampulushi bua kubayisha. Bua mushindu uvuaye muakule ne disanka dia bungi, bampulushi 200 bakadifundisha bua bikale bapeta Tshibumba tshia Nsentedi ne Réveillez-vous! pa tshibidilu.

Yehowa udi udiundisha

Panyima pa meme mumane kuenza mudimu bidimu bisambombo mu Santa Cruz, bakantuma mu La Paz, tshimenga tshinene tshia mu Bolivie; ngakenzamu bidimu 25 biakalonda. Kumbangilu kua bidimu bia 1970, Betele wa Bantemu ba Yehowa uvua mu tshimenga tshia La Paz uvua ne bantu 12. Bu muvua mudimu wa diyisha wenda udiunda, ulomba nzubu minene, bakibaka nzubu mipiamipia ya Betele mu tshimenga tshivua tshidiunda lukasa tshia Santa Cruz. Betele wakapingana mu tshimenga etshi ne bakambikila bua kubuela mu dîku dia betele didi mpindieu ne bantu 50.

Mu tshidimu tshia 1966 kuvua tshisumbu anu tshimue mu Santa Cruz, kadi mpindieu bikadimu bipite pa 50. Bantemu ba mu Bolivie bonso bavua 640, kadi lelu eu mbatue ku 18 000!

Bualu bua disanka, mudimu wanyi mu Bolivie mmupatule bipeta bimpe. Kadi lulamatu lua bena Kristo nanyi ba miaba yonso lutu lunkolesha bikole. Tuetu buonso tudi tusanka bua kumona mudi Yehowa ubenesha mudimu wa kuyisha Bukalenge buende. Kakuyi mpata, kuenza mudimu wa kuvuija bantu bayidi kudi kuenza disanka dinene.​—Matayo 28:19, 20.

[Tshimfuanyi mu dibeji 13]

Pamvua mpanda-njila mu Écosse

[Bimfuanyi mu dibeji 15]

Ndi ngenza mudimu ku betele wa mu Bolivie; (tshimfuanyi tshikese) dituku divua kalasa ka 42 ka Gilada kajike