Tshilejilu tshimpe tshia diamba bulelela

NELMA, utu wenza mudimu wa kulengejangana nsuki mu tshimenga tshia Cruzeiro do Sul, mu ditunga dia Brésil. Kadi matuku mashale aa uvua mupete diteta dikole. Pavua mâyi mapasalale muaba udibu basombele, mamu mukuabu utuye ulengeja nsuki wakamupesha bilamba bia kuvuala. Pavuaye ukenketa bilamba ebi, wakasangana dolare 1 000 mu mpaya wa mupanu.

Makuta avua Nelma mupete au avua bungi bua difutu dia ngondo muanda mutekete ku mudimu wende, ne uvua dijinga ne makuta. Mâyi avua manyange nzubu wende, kabidi tatuende ne bana babu bavua bajimije bintu biabu bia bungi. Uvua mua kujikija dilongolola dia nzubu wende ne makuta au ne kushala ne ndambu mukuabu uvuaye mua kuambuluisha nende balela bende. Kadi kondo ka muoyo ka Nelma kalongesha kudi Bible kakabenga bua kulamaye makuta au.​—Ebelu 13:18.

Dituku diakalonda, kumpala kua kuyaye ku mudimu, wakajuka kumpala kua dîba bua kuya kua mamu uvua mumupeshe bilamba. Kumuelaye tuasakidila bua bilamba bivuaye mumupeshe, kadi kumuambilaye ne: kavua mua kulama mfranga ivuaye musangane mu mpaya to. Mamu kutumpika ne disanka bua makuta ende au. Uvua muateke ku luseke bua kufuta bena mudimu bende. Kuambilaye Nelma ne: “Ki mbantu bonso batu bamba bulelela misangu yonso to.”

Bamue bantu badi bamona ne: kuikala muena bulelela, kakuena ne tshidiku kupetesha to. Kadi kuamba bulelela ngikadilu udi ne mushinga wa bungi kudi bantu badi badienzeja bua kusankisha Nzambi mulelela Yehowa. (Efeso 4:25, 28) Nelma udi wamba ne: “Tshivua mua kupeta tulu butuku bu meme tshiyi muye kupingaja makuta au to.”