Mushindu wa kumanya tshitendelelu tshilelela

BITENDELELU pabuipi ne bionso bitu anu biamba ne: bidibu bamba mbifuma kudi Nzambi. Nanku mbimpe bua tuetu kuteleja tshivua Yone, mupostolo wa Yezu mufunde ne: ‘Bananga, kanuitabuji nyuma yonso, kadi nutete nyuma ne: Idi ya Nzambi anyi; bualu bua baprofete ba bungi ba mashimi bakamuangalaka pa buloba.’ (1 Yone 4:1) Mmushindu kayi utudi mua kuteta bikala tshintu kampanda tshifumine kudi Nzambi?

Tshintu tshionso tshidi tshifumina kudi Nzambi tshidi tshileja ngikadilu yende, nangananga ngikadilu wende munene wa dinanga. Tuangata tshilejilu: lununku ndipa dia Nzambi wa dinanga ne ludi lutuambuluisha bua kumvua mupuya muimpe wa mitshi, bilongo anyi muenya muimpe wa diampa patshididi dipatuka mu mfulu. Lumonu palu ndipa dia kudi Nzambi wa dinanga ne ludi lutuambuluisha bua kuanyisha mubuelu mulenga wa dîba, mekala malenga a tshibeyibeyi anyi kutangila muana utusekesha. Bidi kabidi nanku bua lumvu, ludi lutuambuluisha bua kuteleja miadi milenga ya nyunyi, kuteleja musambu muimpe anyi bua kumvua dîyi dia muntu utudi banange. Mushindu udi Nzambi mutufuke udi uleja dinanga diende nansha mutudi ne bubi. Ke bualu kayi tutu tumona misangu ya bungi mudi miaku ya Yezu eyi ya bushuwa: “Disanka dia kupa ndipite dia kupeta.” (Bienzedi 20:35, MMM) Tutu tuenzelangana malu ne dinanga bualu tudi bafukibue mu ‘tshimfuanyikiji tshia Nzambi.’ (Genese 1:27) Nansha mudi Yehowa ne ngikadilu mikuabu milenga ya bungi, dinanga ke ngikadilu wende munene.

Mikanda ya kudi Nzambi idi ne bua kuleja mudiye ne dinanga. Bitendelelu bia bungi lelu bidi ne mikanda yabi ya kale. Mmunyi mudi dinanga dia Nzambi dimuenekela mu mikanda eyi?

Tshidibi, mu mikanda ya bungi ya malu a Nzambi ya kale, badi bakula anu kakese bua mushindu udi Nzambi mutunange anyi utudi tuetu mua kumunanga. Bua bualu ebu, bantu ba bungi kabena ne diandamuna padibu bakonka ne: “Bua tshinyi kudi makenga ne bubi pa buloba pabi bintu bidi Nzambi mufuke bileja mudiye mutunange?” Bible ke mukanda umuepele wa kale wa malu a Nzambi udi umvuija bimpe dinanga dia Nzambi. Udi kabidi utuambila mushindu wa kuikala ne dinanga.

Mukanda udi wakula bua dinanga

Bible udi wamba ne: Yehowa udi “Nzambi wa dinanga.” (2 Kolinto 13:11) Udi kabidi umvuija ne: bua dinanga Yehowa uvua mufuke Adame ne Eva kabayi mua kusama anyi kufua to. Kadi ditombokela Nzambi ke diakabueja makenga mu bantu. (Dutelonome 32:4, 5; Lomo 5:12) Yehowa uvua mulongolole malu bua kuakaja bivua binyanguke. Dîyi diende didi diamba ne: ‘Nzambi wakatamba kusua ba pa buloba, yeye wakabapa Muanende umuepele mulela  bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Bible udi umvuija kabidi bimpe dinanga dia Nzambi padiyi uleja mudi Nzambi mupeshe Yezu bukalenge bupuangane mu bianza bua kumonaye mua kupesha bantu badi bamutumikila ditalala.​—Danyele 7:13, 14; 2 Petelo 3:13.

Bible udi uleja mu tshikoso malu adi muntu yonso ne bua kuenza wamba ne: ‘[Nanga] Mukalenge Nzambi webe ne mutshima webe wonso ne muoyo webe wonso ne lungenyi luebe luonso. Ke mukenji munene, udi wa kumudilu. Muibidi udi mufuanangane nawu ne: [nanga] mukuenu bu muudi [mudinange]. Mikenji yonso idi mikudika ku mikenji eyi ibidi.’ (Matayo 22:37-40) Bible udi wamba mudiyi Dîyi dia Nzambi difundisha ku nyuma wende. Bushuwa, bu mudiyi ne malu adi aleja ngikadilu ya Nzambi, tudi mua kuikala bashindika ne: mmufumine kudi “Nzambi wa dinanga.”​—2 Timote 3:16.

Tuetu balonda tshijadiki tshimuepele etshi, tudi mua kumanya mpala ne nyima mukanda udi mufume kudi Nzambi menemene eu ku mikanda ya malu a Nzambi ya kale idiku. Dinanga didi kabidi dituleja batendeledi balelela, bualu badi bidikija Nzambi padibu benzelangana malu ne dinanga.

Mushindu wa kumanya bantu badi banange Nzambi

Bantu badi banange Nzambi bushuwa badi bamueneka, nangananga mpindieu utudi mu tshikondo eshi tshidi Bible ubikila ne: tshia ‘matuku a ku nshikidilu.’ Bantu badi benda anu balua ‘badisui, banangi ba biuma, banangi ba masanka kabayi banangi ba Nzambi.’​—2 Timote 3:1-4.

Mmunyi mutudi mua kumanya bantu badi banange Nzambi? Bible udi wamba ne: ‘Edi ndinanga dia Nzambi, bua tuetu tutumikile mikenji yende.’ (1 Yone 5:3) Dinanga Nzambi didi difikisha bantu bua kutumikila mikenji idi mu Bible. Tshilejilu: Bible udi ne mikenji idi itangila diangatangana dia mulume ne mukaji ne ya mu dibaka. Anu bantu badi baselangane ke badi ne bua kuangatangana, ne dibaka diabu didi ne bua kushala kashidi. (Matayo 19:9; Ebelu 13:4) Dimue dituku mamu mukuabu wa mu ditunga dia Espagne uvua ulonga teoloji mu iniversite wakabuela mu bisangilu bia Bantemu ba Yehowa. Dituku adi bavua balonga tshidi Bible wamba bua bikadilu bilenga. Kundekelu mamu au uvua muambe ne: “Mvua mupatuke mu bisangilu ebi ne malu a bungi adi mankolesha: muyuki wa mu Bible muimpe uvuabu benze, buobumue budi munkatshi muabu ne bikadilu biabu bilenge.”

Pa kumbusha dinanga didibu banange Nzambi, bena Kristo balelela badi kabidi bamanyika bipepele ku dinanga didibu baleja bantu nabu. Mudimu wabu munene ngua kuyisha bakuabu lumu lua Bukalenge bua Nzambi, budi ditekemena dimuepele bua bantu. (Matayo 24:14) Kakuena tshintu tshidi mua kuambuluisha bantu bikole kupita kumanya Nzambi to. (Yone 17:3) Bena Kristo balelela badi kabidi balejangana dinanga mu mishindu mikuabu. Badi bambuluisha bantu badi mu ntatu. Tshilejilu, pavua tshikumina tshienzeke mu Italie, tshikandakanda kampanda tshivua tshiambe ne: Bantemu ba Yehowa “mbambuluishe bantu bikole, kabayi bakonka tshitendelelu tshiabu to.”

Pa kumbusha dinanga Nzambi ne bantu nabu bonso aba, bena Kristo mbanangangane munkatshi muabu. Yezu uvua muambe ne: ‘Ndi nushila dîyi dipiadipia: nunangangane. Bu mundi mununange meme, nuenu penu nunangangane. Bonso nebanumanye munudi balongi banyi ku dinanga dinuikala banangangane.’​—Yone 13:34, 35, MMM.

Dinanga didi nadi bena Kristo balelela ndishilangane ne dia bakuabu anyi? Ema (mamu utu wenzelangana midimu ya kumbelu) uvua umone ne: bidi nanku. Udi wenza mudimu mu tshimenga tshia La Paz, mu ditunga dia Bolivie, mutu ditapuluka dia bisamba ditapulula babanji ne bapele bikole. Ema udi wamba ne: “Musangu wa kumpala umvua mubuele mu bisangilu bia Bantemu ba Yehowa, mvua mumone tatu mukuabu muvuale bimpe bitambe, musombe ne mamu mukuabu wa bena Inde bayikila nende. Ntshitu muanji kumona bualu bua mushindu eu to. Pamvua mumone bualu ebu, meme kumanya ne: aba ke bantu ba Nzambi menemene.” Miriam (mamu wa mu Brésil) uvua pende mumone bualu bua mushindu umue eu uvua muambe ne: “Ntshituku muanji kuikala ne disanka to, nansha mu dîku dietu mene. Musangu wa kumpala umvua mumone bantu benzelangana malu ne dinanga mmunkatshi mua Bantemu  ba Yehowa.” Mu États-Unis, mulombodi wa bafidi ba ngumu ku televizon mukuabu wakafunda ne: “Bu bantu ba bungi balonda malu a tshitendelelu tshienu, nunku ditunga edi kadivua mua kuikala mu nsombelu udidi nende mpindieu to. Ndi kamona kamba udi mumanye bimpe mudi tshitendelelu tshienu tshimanyine pa dinanga ne ditabuja dikole kudi Mufuki.”

Keba tshitendelelu tshilelela

Dinanga ntshimanyinu tshinene tshia tshitendelelu tshilelela. Yezu uvua mufuanyikije kupeta tshitendelelu tshilelela ne kupeta njila muakane ne kuitaba bua kuendelamu. Njila eu umuepele ke udi ufikisha ku muoyo wa tshiendelele. Yezu uvua muambe ne: ‘Nubuele ku mushiku wa mbelu mubumbakane; bualu bua mushiku wa mbelu udi munene, ne njila wa kabutu udi munene, ne bantu ba bungi badi babuelamu. Mushiku wa mbelu udi mubumbakane ne njila wa ku muoyo udi mubumbakane, ne bantu banya-banya badi bamumona.’ (Matayo 7:13, 14) Kudi anu tshisumbu tshimue tshia bena Kristo balelela badi benda pamue ne Nzambi mu njila eu wa tshitendelelu tshilelela. Nunku tshitendelelu tshiudi musungula tshidi ne bualu menemene. Wewe mupete njila au ne muendelamu, neupete njila mulenga bua muoyo webe bualu udi wendela mu njila wa dinanga.​—Efeso 4:1-4.

Ela meji ku disanka diwikala nadi pawikala wendela mu njila wa tshitendelelu tshilelela! Bulelela newikale anu bu udi wenda ne Nzambi. Kudi Nzambi neulonge meji ne dinanga bua kusomba bimpe ne bantu bakuabu. Kudiye kabidi ke kuudi mua kumanyina bua tshinyi tudi ne muoyo, ne kumvua malu adi Nzambi mulaye ne kuikala ne ditekemena dilelela bua matuku adi kumpala. Kuakunyingalala dituku nansha dimue bua muuvua mukebe tshitendelelu tshilelela.

[Tshimfuanyi mu dibeji 5]

Ku mikanda ya malu a Nzambi ya kale idiku, anu Bible ke udi uleja dinanga dia Nzambi

[Bimfuanyi mu dibeji 7]

Bena Kristo balelela badi bamanyika bua dinanga diabu