Tudi tuindila Yehowa ne disanka

UKADIKU mudie tshimuma tshitshidi tshibishi anyi? Tshivua mua kuikala tshibi mukana. Bimuma bitu binenga bua kuboba, ne tuetu bindile padibi biboba tudi mua kupeta disanka. Mu nsombelu mikuabu bitu bimpe kuindila. Bible udi wamba ne: ‘Bidi bimpe bua muntu atekemene ne indile biende lupandu lua Yehowa talalaa.’ (Muadi wa Yelemiya 3:26; Tito 2:13) Mmushindu kayi udi bena Kristo mua kuindila Yehowa? Mmunyi mutudi mua kuikala ne disanka patudi tumuindila?

Kuindila Nzambi ntshinyi?

Tuetu bena Kristo tudi ‘batekemena ne tudi tuendesha lukasa dilua dia dituku dia Nzambi.’ Tudi bindile disanka dituapeta pikalaye ne bua ‘kubutula bantu badi babenga Nzambi.’ (2 Petelo 3:7, 12) Yehowa udi ne dijinga dikole dia kujikija malu mabi, kadi udi windila bua kupandisha bena Kristo mu mushindu watumbisha dîna diende. Bible udi wamba ne: ‘Nzambi, pakasuaye kuleja bantu tshiji tshiende, ne kubamanyisha bukole buende, wakatukija ne lutulu lunene bivuadi bitekela tshiji tshiende bilongolodibue bua dibutuka, ne bua kumanyisha bantu bua bubanji bua butumbi buende ku bivuadi bileja luse biakadianjilaye kulongolola ku butumbi.’ (Lomo 9:22, 23) Anu bu mu matuku a Noa, Yehowa mmumanye dîba dimpe didiye mua kusungila bantu bende lelu. (1 Petelo 3:20) Nunku kuindila Yehowa kudi kumvuija kuindila dîba dikalaye ne bua kutusungila.

Patudi tuindila dituku dia Yehowa, tudi imue misangu mua kuteketa ku muoyo patudi tumona mudi bantu benda balekela kulonda bikadilu bilenga mu nsombelu wabu. Tuetu badiumvue batekete nunku, mbimpe tubale mêyi a Mika, muprofete wa Nzambi uvua mufunde ne: ‘Muntu muakane wakujimina pa buloba, kakuena muntu mujalame munkatshi mua bantu kabidi.’ Kufundaye kabidi ne: ‘Kadi meme panyi nentangije mêsu anyi kudi Yehowa; nengidile Nzambi wa lupandu luanyi.’ (Mika 7:2, 7) Kadi, ‘kuindila’ kudibu bambe ntshinyi? Bu mudibi ne: bantu batu batshioka padibu bindila, mmunyi mutudi mua kuikala ne disanka patudi tuindila Nzambi?

Tuindile ne disanka

Tudi ne bua kuidikija mushindu udi Nzambi windila. Katu muanji kulekela kuikala ‘Nzambi wa disanka’ nansha. (1 Timote 1:11, NW) Udi ne disanka padiye wenda windila bualu udi utungunuka ne kuenza mudimu bua kukumbaja disua diende dia kufikisha bantu badi bamunange ku bupuangane buvuaye mubalongoluele pavuaye mubafuke. (Lomo 5:12; 6:23) Udi umona malu mimpe adi mudimu wende mupatule: bantu ba bungi menemene mbalue mu ntendelelu wende mulelela. Yezu wakamba ne: ‘Tatu wanyi udi ukuata mudimu too ne katataka, ne meme kabidi ndi ngukuata.’ (Yone 5:17) Patudi tuindila, mbimpe kuenzela bantu malu mimpe. (Bienzedi 20:35) Bia muomumue, bena Kristo balelela kabena bindila bavunge maboko nansha. Kadi badi bambuluisha bantu bakuabu bua kulonga malu adi Nzambi mulaye.

Bantu ba lulamatu batu misangu yonso ne disanka dia kutumbisha Nzambi padibu bindila dituku diende. Tuangate tshilejilu tshia Davidi. Mukalenge wende wakamukengesha, mulunda wende munene wakamuyila ku tshipangu ne muanende wakajinga kumunyenga bukalenge. Mu nsombelu yonso eyi, Davidi uvuaku mua kuikala ne disanka pavuaye windila bua bamusungile mu tshikondo tshivua Yehowa musungule anyi? Musambu wa 71 uvua pamuapa Davidi  mufunde udi wamba ne: ‘Kadi meme panyi nengikale ne ditekemena misangu yonso, nennanukile kukutumbisha musangu ne musangu. Mukana muanyi nemuambile bantu bua bienzedi bia buakane buebe, nembambile bua malu a lupandu luebe dinda too ne ku dilolo.’ (Musambu 71:14, 15) Davidi wakaleja muvuaye ne lutulu, ne muvuaye windila ne disanka bualu uvua utumbisha Yehowa ne ukolesha bantu bakuabu mu ntendelelu mulelela.​—Musambu 71:23.

Kuindila Yehowa kakuena kutonda bu kuindila mashinyi adi kaayi afika pa dîba. Kadi kudi anu bu mutu baledi bindila ne disanka bua muanabu alue muntu mukole. Padibu benda bindila apu, badi balongesha muana ne bamubela bua akole bimpe. Bia muomumue, tuetu badi bindila Yehowa tudi ne disanka patudi tuambuluisha bakuabu bua kudiabu bulunda ne Nzambi. Tudi basue bua Nzambi atuanyishe petu ne atusungile.

Katujimiji ditekemena dietu

Kuindila Yehowa kudi kumvuija kutungunuka ne kumunanga ne kumuenzela mudimu katuyi tujimija ditekemena dietu. Bidi mua kuikala bikole bualu basadidi ba Nzambi ba bungi mbasombele miaba idi bantu bapepeja muntu yonso udi ne nsombelu udi uleja mudiye muindile milayi ya Nzambi. Kadi tuangate tshilejilu tshia bena Isalele ba lulamatu bavua balame ditekemena diabu munkatshi mua bidimu 70 bia bupika mu Babulona. Ntshinyi tshivua tshibambuluishe bua kudilama? Bidi bimueneka ne: dibala mukanda wa Misambu divua dibakolesha. Umue musambu uvuabu pamuapa bafunde mu tshikondo atshi udi wamba ne: ‘Mu dîyi diende mundi ntekemena. Muoyo wanyi udi windila Yehowa, mutambe dindila dia [bansetedi] badi bindila kutshia kua butuku; bulelela, mutambe dindila dia [bansentedi] badi bindila kutshia kua butuku. Bena Isalele, nuikale ne ditekemena dienu mu Yehowa.’​—Musambu 130:5-7.

Bena Yuda bavua balame ditekemena diabu bualu bavua babala Dîyi dia Nzambi ne bakula bua bualu buadi, bakapeta disanka pavua baluishi bakuate Babulona. Bena Yuda ba bungi ba lulamatu bakapingana mu Yelushalema. Mbafunde bua tshikondo atshi ne: ‘Pakakudimuna Yehowa bupika bua Siona bua kupingajamu bantu bende, mukana muetu muakadi muule tente ne tuseku.’ (Musambu 126:1, 2) Bena Yuda abu kabavua balekele ditabuja diabu to, kadi bavua anu badikoleshe. Kabavua kabidi balekele kutumbisha Yehowa ne misambu nansha.

Bia muomumue, bena Kristo balelela badi bindila Nzambi ‘ku nshikidilu kua tshikondo etshi’ badi benza muabu muonso bua kulama ditabuja diabu dikole. Badi balonga Dîyi dia Nzambi, bakoleshangana ne batungunuka ne kutumbisha Yehowa mu diyisha lumu luimpe lua Bukalenge buende.​—Matayo 24:3, 14.

Tuindile bua dinyoka dituambuluishe

Yelemiya muprofete wa Nzambi wakafunda ne: ‘Bidi bimpe bua muntu atekemene ne indile biende lupandu lua Yehowa talalaa.’ (Muadi wa Yelemiya 3:26) Yelemiya uvua musue kuamba ne: kabivua bimpe bua basadidi ba Yehowa Nzambi badilakane bua muvuaye mubanyoke pavuaye mulekele bua Yelushalema abutudibue. Kadi dinyoka edi divua  ne bua kubambuluisha anu pavuabu ne bua kuela meji bua ditomboka diabu ne kumona ne: bivua bikengela bashintulule lungenyi luabu.​—Muadi wa Yelemiya 3:40, 42.

Tudi mua kufuanyikija mushindu udi dinyoka dia Yehowa dituambuluisha ne mushindu udi bimuma bikola. Bible udi wamba bua dinyoka dia kudi Nzambi ne: ‘Didi dikuamisha bantu badi benzejibua kudidi mamuma a ditalala, mamuma a buakane mene.’ (Ebelu 12:11) Anu mudibi bikengela ne bimuma binenge mutantshi bua kubobabi, ke mudibi bikengela bua tuetu petu tupitshisha mutantshi kampanda bua kushisha kushintulula lungenyi luetu padi Yehowa utunyoka. Tshilejilu, bu tuetu mua kuenza tshilema ne buobu kutumbusha midimu itudi tuenza mu tshisumbu, dijinga dietu dia kuindila Nzambi nedituambuluishe bua katuteketshi ku muoyo ne katulekedi ditabuja dietu. Mu nsombelu wa nunku, mêyi a Davidi aa adi mua kutukolesha: “Tshiji [tshia Nzambi] tshidi tshia katupa, luse luende ndua kashidi, mu dilolo mudi muadi, mu dinda mbila ya disanka.” (Musambu 30:5, MMM) Tuetu tuindila Nzambi ne lutulu ne tutumikila mibelu itudi tupeta mu Dîyi diende ne mu bulongolodi buende, netuikale ne tshikondo tshituela “mbila ya disanka.”

Kukola mu ditabuja kudi kulomba dîba

Wewe muikale nsonga anyi mutambule matuku aa, udi mua kuikala ne dijinga dikole dia kutuadija kuenza imue midimu ya pa buayi mu tshisumbu tshia bena Kristo. Kadi bidi bikengela wikale ne ngikadilu idi ikengedibua bua kuenza midimu eyi, ne udi mua kuyipeta mu bungi bua matuku. Nunku, pautshidi nsonga anyi ufuminaku ku ditambula, udienzeje bua kulua muena Kristo mushindame. Tshilejilu, bunsonga ntshikondo tshimpe tshia kubala Bible mujima, kupeta ngikadilu milenga ya bena Kristo ne kulonga mua kuvuija bantu bayidi ba Kristo. (Muambi 12:1) Wewe muindile ne lutulu ne budipuekeshi, tshikondo tshikala Yehowa mua kukupesha midimu mikuabu ya kuenza mu tshisumbu netshilue.

Mudimu wa kuvuija bantu bayidi udi pawu ulomba lutulu. Anu bu mutu tshidime utungunuka ne kuela mâyi ku bintu bidiye mukune too ne padi Nzambi ubikolesha, ke mudibi kabidi bua mudimu wa kuvuija bantu bayidi eu. (1 Kolinto 3:7; Yakobo 5:7) Kukuna ditabuja ne dinanga dia malu a Yehowa mu mioyo ya bakuabu kudi kuangata ngondo anyi pamuapa bidimu bua kulonga nabu Bible ne lutulu. Kuindila Yehowa kudi kulomba kusuminyina, nansha bikala kumpala balongi kabayi banyisha bidibu balonga. Kadi dîba dialejabu dianyisha nansha dikese, bidi mua kuikala tshimanyinu tshia se: nyuma wa Yehowa mmulenge muoyo wabu. Wewe muikale ne lutulu, udi mua kuikala ne disanka dia kumona Yehowa uvuija mulongi webe muyidi wa Kristo.​—Matayo 28:20.

Tuikale ne dinanga patudi tuindila

Bua kuleja mudi kuindila mua kuikala tshimanyinu tshia dinanga ne dieyemena, tuangate tshilejilu tshia muanetu mukuabu wa bakaji ukadi kaku utu musombele mu tshipela tshia Andes mu Amerike wa ku Sud. Yeye ne muanetu mukuabu wa bakaji badi anu nkayabu Bantemu ba Yehowa mu musoko wabu. Nudiku mua kufuanyikija mutubu bindila ne muoyo kulu kulu dilua dia bena Kristo nabu bakuabu anyi? Dituku kampanda, mutangidi wa tshijengu uvua ulua kubatangila bua musangu wende wa kumpala wakajimina. Wakalukila kuvuaye mufumine bua kulonda njila muimpe ne biakamuangata mêba a bungi. Tukavua mundankulu menemene pakamonaye musoko ku bule. Bu muvua nzembu kayiyi mu musoko amu, wakakema bikole bua kumona mudilu utema. Uvua ne disanka dia bungi pavuaye mufike ku tshibuelelu tshia musoko ne kumona mudilu wa muendu uvua kaku au muteke kuulu. Kaku au uvua mutuishibue ne: mutangidi uvua ne bua kulua ke bualu kayi uvua mumuindile.

Tudi ne disanka dia kuindila Yehowa ne lutulu lua muomumue bualu tudi batuishibue ne: neakumbaje malu adiye mutulaye. Tuetu petu tutu tuanyisha bantu badi batuindila ne dinanga dionso anu bu muvua mutangidi wa tshijengu muanyishe tshienzedi tshia kaku au. Nunku, kabiena bitukemesha bua mudi Nzambi wanyisha bantu badi bamuindila to. Bible udi wamba ne: ‘Yehowa udi usanka bua badi ne ditekemena diabu mu luse luende lujalame.’​—Musambu 147:11.

[Tshimfuanyi mu dibeji 18]

Bantu badi bayisha bikole badi ne disanka padibu bindila Yehowa