Monayi butoke bua dikema!

BIWIKALA ukadi muende dimue dituku mu mîdima ububuta bua kumona njila, bivua ne bua kuikala bikutonde bikole. Kadi butoke butu bufila disulakana dia bungi be! Bumue ukadiku pebe mutulukile mu bualu butudi mua kufuanyikija ne mîdima mikole. Bualu abu buvua bukufikile pamuapa dîba diuvua kuyi mua kubujikija to. Pashishe ku kakese ku kakese wewe kubanga kuenda kupeta lungenyi lua mua kubujikija, bienze anu bu butoke buenda bulua ku kakese ku kakese. Kumanya mua kupatuka mu lutatu lua nunku ne kumanya mua kulujikija mbualu buimpe bua dikema anu bu kupatuka mu mîdima kubuela mu butoke.

Mu bidimu lukama bia kumpala, bantu ba bungi bavua mu mîdima mu malu Nzambi. Mupostolo Petelo wakambila bantu bavua balekele malongesha a dishima a kale ne bitabe Buena-Kristo ne: ‘Nzambi wakanubikila bua kunupatula mu mîdima bua kunubueja mu munya wende wa dikema [anyi butoke].’ (1 Petelo 2:9) Bua bantu aba, bualu ebu buvua anu bu kumbuka mu mîdima mikole bua kubuela mu butoke bua dikema. Tudi mua kubufuanyikija ne muntu udi nkayende kayi ne ditekemena ne pashishe udi upeta dîku ne utekemena malu mimpe mu matuku atshilualua.​—Efeso 2:1, 12.

“Wakalekela dinanga diebe dia kumudilu”

Bena Kristo ba kumpala bavua bapete “bulelela” anyi ditabuja dilelela dia bena Kristo. (Yone 18:37) Bakamona butoke bua dikema bua bulelela ne kumbukabu mu mîdima ya mu dîyi dia Nzambi bua kubuela mu butoke. Kadi mu kupita kua matuku, tshisumi ne lukunukunu bia ku ntuadijilu bia bamue bena Kristo biakakepa. Tshilejilu, ku ndekelu kua siekele wa kumpala, bualu bunene buakenzeka mu tshisumbu tshia mu Efeso. Kunyima kua Yezu mumane kubika ku lufu wakamona bualu ebu, e kuamba ne: ‘Kadi ndi nebe bualu ebu ne: wakalekela dinanga diebe dia kumudilu. Nunku, uvuluke kuwakupona, ukudimune mutshima webe, ne enza midimu ya kumudilu.’ (Buakabuluibua 2:4, 5) Bena Kristo ba mu Efeso bavua ne bua kujululula dinanga divuabu nadi bua Nzambi ne bua bulelela.

Bidi munyi buetu tuetu? Tuvua petu ne disanka dia bungi bua mutudi bamone butoke, mutudi bamanye bulelela bua dikema bua mu Dîyi dia Nzambi. Tudi bafike ku dinanga bulelela. Kadi ntatu itu ikuata bantu bonso idi mua kukepesha dinanga ditudi nadi bua bulelela. Nansha malu a ‘matuku a ku nshikidilu’ adi mua kudikepesha kabidi. Tudi basombe mu buloba budi ne “malu makole,” budi buule ne bantu badi ‘badisui, banangi ba biuma, baditumbishi, badileji, bapendi ba Nzambi, kabayi batumikila mêyi a baledi babu, kabayi ne kusakidila, kabayi ne tshijila.’ (2 Timote 3:1, 2) Ngenzelu ya bantu aba idi mua kutekesha tshisumi tshietu ne kutujimijila dinanga ditudi nadi bua Yehowa.

Bituikala bajimije dinanga dituvua nadi kumpala, tudi ne bua ‘kuvuluka kutudi bapone ne kukudimuna mutshima.’ Tudi ne bua kupingana ku nsombelu wetu wa kumpala mu buena Kristo. Tudi kabidi ne bua kutangila bua dinanga dietu dia bulelela kadikepi to. Mbimpe bua yonso wa kutudi kutungunuka ne kumona malu mu mushindu muimpe, kuikalaye ne disanka ne kuenza bua ne: dinanga didiye nadi bua Nzambi ne bulelela buende dikale anu dikole!

‘Bulelela budi butupesha budishikaminyi’

Butoke bua bulelela bua mu mukanda wa Nzambi mbuimpe bualu Bible udi wandamuna  nkonko ikadi misamishe bantu mutu bidimu ne bidimu. Imue ya ku nkonko ayi ngeyi: Bua tshinyi tudi pa buloba? Muoyo udi ne tshipatshila kayi? Bua tshinyi malu mabi adiku? Padi muntu ufua utu ushala ne muoyo anyi? Yehowa mmututokeshile mandamuna a nkonko eyi ku diambuluisha dia malongesha a mu Bible. Katuenaku mua kuikala ne dianyisha dia bungi anyi? Bushuwa, tudi ne bua kuanyisha malu atudi balonge.

Yezu wakambila bayidi bende ne: ‘Nenumanye bualu bulelela, ne bualu bulelela nebunupe budishikaminyi.’ (Yone 8:32) Mulambu wa Yezu mmutunzuluile njila bua kupikudibua ku mpekatu ne ku lufu. Malongesha malelela aa a mushinga mukole mmatupikule kabidi ku dipanga ne ku mpukampuka ya pa buloba ebu bua mîdima. Tuetu tuelangana meji ne dianyisha bua bitukadi balonge nebituambuluishe bua kukolesha dinanga ditudi nadi bua Yehowa ne bua Dîyi diende.

Mupostolo Paulo wakafundila bena Kristo ba mu Tesalonike ne: ‘Panuakangata dîyi dinuakumvua kutudi, dia Nzambi mene, nuakaditabuja ki mbu dîyi dia bantu, kadi bu mudidi bushuwa, dîyi dia Nzambi mene, didi dienzeja munda muenu badi bitabuja.’ (1 Tesalonike 2:13) Bena Tesalonike bakumvua ne ‘kuitabuja dîyi [dia Nzambi] ne disanka.’ Kabavua kabidi mu “mîdima” to. Kadi bavua balue “bana ba butoke.” (1 Tesalonike 1:4-7; 5:4, 5) Bena Kristo abu bavua balonge ne: Yehowa ke Mufuki, Nzambi wa bukole buonso, wa meji, wa dinanga ne wa luse. Anu bu bayidi bakuabu ba Kristo, bena Kristo abu bavua balonge kabidi ne: Yehowa wakalongolola bua kubabuikila mibi yabu ku diambuluisha dia mulambu wa Muanende Yezu Kristo.​—Bienzedi 3:19-21.

Nansha muvua bena Tesalonike kabayi bamanye malu onso kong a bulelela bua mu Bible, bavua bamanye muaba uvuabu mua kupetela dimanya. Bible udi mua kuvuija muntu wa Nzambi ‘mukumbajibue, mulongolola tshishiki bua midimu yonso mimpe.’ (2 Timote 3:16, 17) Bena Kristo ba mu Tesalonike bavua batungunuke ne kulonga, kudimuenabu misangu ne misangu mudi butoke bua kudi Nzambi buikale buimpe bua dikema. Ke bualu kayi bavua ne disanka misangu yonso. (1 Tesalonike 5:16) Tudi petu mua kuenza bia muomumue.

Butoke mu njila wetu

Bua kuleja mudi butoke buikale buimpe, mufundi wa Misambu wakamba ne: ‘Dîyi diebe didi muendu ku makasa anyi ne munya [butoke] muteme mu njila wanyi.’ (Musambu 119:105) Mibelu ya kudi Nzambi itudi tupeta mu Dîyi diende idi mua kutuambuluisha bua kumanya njila muimpe wa kulonda ne kuikala ne nsombelu wa nsongo. Katuena basue kuikala bu mazuwa mapambuke to. Dimanya ne ditumikila bulelela bidi bituambuluisha bua kubenga ‘kutshikishibua eku ne eku ne kutambakajibua ku lupepele luonso lua diyisha.’​—Efeso 4:14.

Bible udi wamba ne: ‘Kanueyemenyi baminyampala, anyi muana wa muntu, unudi kanuyi mua kusangana dikuatshisha kudiye.’ Udi wamba kabidi ne: ‘Disanka didi kudi muntu udi ne dikuatshisha diende kudi Nzambi wa Yakoba, udi ne ditekemena diende mu Yehowa Nzambi wende.’ (Musambu 146:3, 5) Kabidi, dieyemena Yehowa didi dituambuluisha bua kumbusha buôwa ne tunyinganyinga. Mupostolo Paulo wakamba ne: ‘Lekelayi kuditatshisha ku bualu bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu nedilame mitshima yenu ne meji enu mu Kristo Yezu.’ (Filipoi 4:6, 7) Padi butoke bua mu Dîyi dia Nzambi butulombola tudi tupeta masanka a bungi.

 Tukenke bu miendu ya ba pa buloba

Bualu bukuabu budi buenza bua butoke bua mu Dîyi dia Nzambi buikale buimpe bua dikema budi ne: budi bunzuluila bantu ba bungi njila bua kuenzabu mudimu wa mushinga mukole. Yezu wakambila bayidi bende ne: ‘Yayi nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia Nyuma muimpe, nubayishe mua kuenza malu onso angakanuambila; ne monayi, ndi nenu matuku onso too ne ku nshikidilu kua tshikondo etshi.’ Kumpala kua Yezu kubatumina dîyi edi, wakabambila ne: ‘Bakumana kumpa bukokeshi buonso mu diulu ne pa buloba.’​—Matayo 28:18-20.

Tumonayi badi bambuluisha bena Kristo balelela mu mudimu wa kuyisha lumu luimpe ne kulongesha bantu ba mu bisamba bionso bulelela bua mu Bible. Yezu wakalaya bayidi bende ne: uvua ne bua kuikala nabu. Bushuwa, udi ubambuluisha mu mudimu wabu bua ‘munya [butoke] wabu uteme’ bua bantu bakuabu bamone ‘midimu yabu mimpe.’ (Matayo 5:14-16) Banjelu badi pabu baditue mu mudimu eu wa kuyisha. (Buakabuluibua 14:6) Kadi bidi munyi bua Yehowa Nzambi? Mupostolo Paulo wakamba ne: ‘Meme ngakakuna bintu, Apolo wakabimiamina mâyi, kadi Nzambi wakabidiundisha.’ Ndiakalengapu kayi ditudi nabi dia kuikala ‘benzejanganyi ba mudimu ne Nzambi’!​—1 Kolinto 3:6, 9.

Tuelayibi meji kabidi bua masanka atudi tupeta mu dienza mudimu eu udi Nzambi mutupeshe. Kakuena tshintu tshitudi mua kufuanyikija ne diakalenga didi Nzambi mutupeshe dia kuikala ‘bu miendu ya ba pa buloba.’ Tuetu tuleja butoke bua mu Dîyi dia Nzambi mu ngakuilu wetu ne mu bienzedi bietu, tudi tupeta mushindu wa kuambuluisha bantu ba muoyo muakane. (Filipoi 2:15) Ne tudi mua kuikala ne disanka patudi tuyisha ne tulongesha ne tshisumi, ‘bualu bua Nzambi kêna upanga buakane bua kupuaye muoyo wa mudimu wetu ne wa dinanga dituakaleja bua dîna diende.’​—Ebelu 6:10.

‘Sumba buanga bua kulaba ku mêsu ebe’

Yezu wakambila tshisumbu tshia mu Laodikiya ne: ‘Sumba kundi buanga bua kulaba ku mêsu ebe bua wewe umanye mua kutangila. Bua bandi munange, ndi mbabela, ndi mbakengesha.’ (Buakabuluibua 3:18, 19) Malongesha ne mibelu ya Yezu ke ‘buanga bua kulaba ku mêsu’ bua kuondopa bufofo bua mu nyuma. Tuetu basue kushala ne mmuenenu muimpe wa malu a mu nyuma, tudi ne bua kuitaba ne kutumikila mubelu wa Yezu eu ne mibelu mikuabu idi mu Bible. Tudi kabidi ne bua kuikala ne ngelelu wa meji bu wa Kristo ne kuidikija tshilejilu tshiende. (Filipoi 2:5; 1 Petelo 2:21) Buanga bua kulaba ku mêsu kabena babufila tshianana to. Yezu wakamba ne: ‘Busumba kundi.’ Mushinga wa dibusumba nawu ndidienzeja dietu ne dîba dietu.

Patudi tumbuka mu muaba wa mîdima mikole ne tubuela diakamue mu nzubu mudi butoke, bidi mua kuangata ndambu wa dîba kumpala kua mêsu etu kubangawu kumona bimpe. Bia muomumue, bitu bilomba dîba bua kulonga Dîyi dia Nzambi ne kumona butoke bua bulelela. Bidi bilomba dîba bua kuelangana meji bua bitudi tulonga ne bua mushinga udi nawu bulelela. Kadi mushinga wa buanga ebu ki mmukole to. Bua tshinyi? Bualu butoke ebu mbuimpe bua dikema!

[Tshimfuanyi mu dibeji 14]

‘Sumba kundi buanga bua kulaba ku mêsu ebe bua wewe umanye mua kutangila.’