Dikeba dia mibelu mimpe

Mmunyi mmundi mua kulama makanda anyi a mubidi?

Ndi mua kuenza tshinyi bua dîku dianyi kuikaladi ne disanka?

Ndi mua kuenza tshinyi bua kabangipatshi ku mudimu?

UKADIKU mudiele nkonko eyi anyi? Uvua mupete mandamuna mimpe avua makuambuluishe anyi? Tshidimu tshionso etshi, bantu badi bapatula mikanda mishilashilangane mitue ku 2 000 idi ifila mibelu pa malu aa ne makuabu adi ne mushinga. Tshilejilu, mu ditunga dia Grande-Bretagne nkayamu, bantu badi batula pound mipite pa miliyo 80 (anyi dolare mitue ku miliyo 150) ku tshidimu tshionso bua kubala mikanda idi ibaleja mua kupita ne ntatu ya mu nsombelu. Mu États-Unis, dipanyisha dia mikanda idi yambuluisha bantu bua kudijikijila ntatu yabu didi dipetesha dolare mitue ku miliyo 600 tshidimu tshionso. Ki nganu wewe nkayebe udi ukeba mibelu mimpe pa mushindu wa kupita ne nsombelu wa buatshia buila to.

Mufundi kampanda wakamba bua mibelu idi mu mikanda mivule eyi ne: “Mikanda ya bungi idi yambulula anu malu akadibu bafunde.” Bushuwa, mibelu ya bungi idi mu mikanda eyi idi anu yambulula mibelu ya meji idi mu mukanda kampanda wa kale menemene. Mukanda au m’Bible. Wowu ke udi bantu ba bungi nawu pa buloba bujima. Mbaukudimune wonso anyi tshitupa mu miakulu mitue ku 2 400. Bakadi baupatule bungi busanga bupite pa miliyare 4 ne miliyo 600.

Bible muine udi wamba patoke ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi.’ (2 Timote 3:16) Kadi kabavua bafunde Bible bua kuambuluisha bantu bua kumanya mua kupita ne ntatu yabu to. Bavua bamufunde nangananga bua kumanyisha bantu disua dia Nzambi. Nansha nanku, mu Bible mudi malu a bungi adi aleja bantu mushindu udibu mua kupita ne ntatu yabu, ne Nzambi mmulaye ne: bantu bonso badi balonda mibelu idimu nebapete diakalengele. (Yeshaya 48:17, 18) Padi muntu ulonda mibelu idimu, idi imuambuluisha, nansha yeye muikale wa mu tshisamba kayi, ne nsombelu wa mushindu kayi anyi mukolele kuepi. Tudi tukulomba bua ubale tshiena-bualu tshidi tshilonda bua udimuene nkayebe mudi mibelu idi Bible ufila bua makanda a mubidi, dîku ne mudimu mua kukuambuluisha.