Ditabuja milayi ya mu Bible didi disungila bantu

YEZU udi upatuka mu ntempelo wa mu Yelushalema bua musangu wa ndekelu padi umue wa ku bayidi bende wamba ne: ‘Muyishi, mona mabue aa manene ne bunene bua nzubu wa ntempelo.’ Bena Yuda badi baditumbisha bikole bua ntempelo wabu. Kadi Yezu udi wandamuna ne: ‘Udi umona nzubu eyi minene anyi? Kabena bashiya dibue dimue pa mutu pa dikuabu, nebaasasule buonso buawu.’​—Mâko 13:1, 2.

Bualu ebu budi bukemesha bikole be! Amue mabue adibu bibaka nawu ntempelo manene be! Pashishe, bualu budi Yezu wamba bua ntempelo (udi muikale muaba munene wa ntendelelu wa bena Yuda) budi butangila kabidi dibutuka dia Yelushalema ne pamuapa bua tshisamba tshia bena Yuda. Nunku bayidi ba Yezu badi bamulomba ne: ‘Utuambile bualu, malu aa nealue dituku kayi? Tshimanyinu tshia malu aa ne: akadi pa kulua ntshinyi?’​—Mâko 13:3, 4.

Yezu udi ubadimuija ne: ‘Nshikidilu kêna muanji kulua.’ Tshia kumpala, bayidi nebumvue ngumu ya mvita, bikumina, biyole bia nzala ne bipupu bia masama mu miaba mishilashilangane. Pashishe, malu adi akuatshisha buôwa neabueje bena Yuda mu “dikenga dinene.” Kadi Nzambi nealue kupandisha bantu badiye ‘musungule,’ anyi bena Kristo ba lulamatu. Mmushindu kayi?​—Mâko 13:7; Matayo 24:7, 21, 22; Luka 21:10, 11.

Badi batombokela bena Lomo

Bidimu 28 bidi bipita kadi bena Kristo badi mu Yelushalema batshidi anu bindile nshikidilu. Mu bukalenge bua bena Lomo mudi mvita, bikumina, biyole bia nzala ne bipupu bia masama. (Bala kazubu kadi mu dibeji dia 9.) Yudaya mmusunsula kudi mvita ya bena mu ditunga nkayabu. Tshidibi, munda mua bimanu bia Yelushalema mudi mumueneka bu mudi ditalala. Bantu badi badia, benza mudimu, baselangana ne balela anu bu pa tshibidilu. Padibu bamona nzubu munene wa ntempelo, badi bela meji ne: neashaleku kashidi ne badi badimona mu bukubi.

Pabuipi ne tshidimu tshia 61, bena Kristo ba mu Yelushalema badi bapeta mukanda wa kudi mupostolo Paulo. Udi ubela kalumbandi bua dinanukila diabu, kadi udi umvua bibi bualu bamue ba kudibu kabena bamona mushinga wa kuikala ne mitalu. Badi bateketa mu ditabuja anyi kabayi bashindamamu. (Ebelu 2:1; 5:11, 12)  Paulo udi ubabela ne: ‘Nunku, kanuimanshi dikima dienu. Bualu bua palepa musangu muipi, Yeye udi ulua nealue, kêna unenga. Kadi muakane wanyi neikale ne muoyo bua ditabuja; ne bialukaye tshia nyima, muoyo wanyi kawena usanka mu bualu buende.’ (Ebelu 10:35-38) Mubelu eu mmufike pa dîba menemene! Kadi bena Kristo nebashale ne ditabuja ne nebikale ne ntema ku dikumbana dia milayi ya Yezu anyi? Nshikidilu wa Yelushalema muine ukadi pabuipi anyi?

Mu bidimu bitanu bidi bilonda, nsombelu wa mu Yelushalema udi unyanguka ku kakese ku kakese. Ndekelu wa bionso mu 66, ngovena wa bena Lomo Florus udi musue makuta bikole udi wangata ntalanta 17 mu “bitadi bivuabu kabayi bafuta pa dîba” bia mu tshibutshilu tshia mu ntempelo. Bena Yuda badi bumvua tshiji ne batomboka. Bantomboji bena Yuda (badibu babikila ne: ba-Zelote) badi badisangisha mu Yelushalema ne bashipa basalayi ba bena Lomo badimu. Pashishe, ne dikima dionso badi bamba mudibu kabatshiyi ku bukokeshi bua bena Lomo. Bena Yuda ne bena Lomo badi batuadija kuluishangana!

Mu ngondo isatu, ngovena wa bena Lomo wa mu Sulia Cestius Gallus ne basalayi 30 000, badi baya batangile ku Sud bua kujikija buntomboji bua bena Yuda. Udi ufika ne basalayi bende ku Yelushalema munkatshi mua Tshibilu tshia Bitandatanda ne babuela ne lukasa ku mikalu ya tshimenga. Bu mudi bantomboji bakese, badi banyemena mu nzubu munene wa ntempelo. Basalayi bena Lomo badi batuadija kunyanga bimanu bia ntempelo. Bena Yuda badi bumvua bibi menemene bualu bampangano aba badi banyanga muaba munsantu wa tshitendelelu tshiabu. Kadi bena Kristo badi mu tshimenga badi bavuluka bobu mêyi a Yezu aa: ‘Panuamona tshinyangu tshia dibutuka, tshimane mu muaba wa tshijila, ku tshikondo atshi badi mu Yudaya banyemena ku mikuna.’ (Matayo 24:15, 16) Bavuaku ne bua kuleja muvuabu bitabe milayi ya Yezu ne kunyema bu muvuaye muambe anyi? Bua mushindu uvua malu menzeke, bivua bikengela banyeme bua kupanduka. Kadi nebanyeme bishi?

Diakamue, bua bualu budi kabuyi bumanyike, Cestius Gallus udi umbuka ne basalayi bende mutangile ku muelelu wa mbuu. Bantomboji badi babalondakaja. Mu mushindu wa dikema, dikenga divua mu tshimenga didi dimana. Bena Kristo badi balonda didimuija dia Yezu bua kuleja ditabuja diabu ne banyemena mu Pella tshimenga tshivua katshiyi tshibuelakane mu mvita tshivua mu mikuna dinsambu dia musulu wa Yadene. Badi benza bimpe padibu banyema, bualu padi bantomboji bapingana mu Yelushalema badi benzeja bantu bonso badimu bua kudisangisha nabu mu buntomboji buabu. * Bu mukadi bena  Kristo mu bukubi mu Pella, mbashale anu bindile bua kumona mudi malu enda aya.

Bimvundu bidi bikola

Panyima pa ngondo mikese, tshiluilu tshikuabu tshia bena Lomo tshidi tshiya tshitangile ku Yelushalema. Mu 67, Jenerale Vespasien ne muanende Titus badi basangisha tshiluilu tshia basalayi 60 000. Mu bidimu bibidi bidi bilonda, tshiluilu tshia bukole etshi tshidi tshisemena pabuipi ne Yelushalema, tshienda tshibutula bantu bonso badi babaluisha mu njila. Pine apu, munda mua Yelushalema, bisumbu bia bena Yuda bidi biluishangana nkayabi! Badi banyangakaja bibutshilu bia biakudia bidi mu tshimenga, badi balandakaja tshitupa tshidi tshinyunguluke ntempelo ne badi bashipa bena Yuda bapite pa 20 000. Vespasien udi wimanyika disemena diende dia ku Yelushalema, wamba ne: ‘Nzambi wanyi udi wenza malu bu jenerale wa bena Lomo udi mmupite meme; baluishi betu badi bashipangana bobu nkayabu.’

Padi Mukalenge wa bena Lomo Néron ufua, Vespasien udi walukila ku Lomo bua kulama bukalenge ne udi ushila Titus mudimu wa kujikijangana ne bena Yuda. Titus udi ufika ku Yelushalema pabuipi ne tshibilu tshia Kupita kua Yehowa tshia mu 70, ujingila bena Yuda ne benyi bavua balue bua kutendelela munda mua tshimenga. Basalayi bende badi bakosa mitshi yonso idi mu tshisuku tshia mu Yudaya bua kuenza lupangu lua mitshi misonga lua bule bua kilometre 7 lunyunguluke Yelushalema. Malu adi enzeka anu muvua Yezu muambe ne: ‘Badi nebe lukuna nebakuelele lupangu, nebakunyunguluke, nebakutshintshimike ku nseke yonso.’​—Luka 19:43.

Mu matuku makese nzala idi ibuela mu tshimenga. Bisumbu bia bantu badi ne bingoma bidi bibuela mu nzubu ya bantu badi bafue ne ya bakadi pa kukula muoyo bua kupawula bidimu. Kuvua nansha mamu umue uvua mushikile uvua musaye muanende bua kumudia bua kukumbaja tshikavua tshiamba ne: ‘Nuenu nenudie bana banuakalela, munyinyi wa bana benu balume ne wa bana benu bakaji bualu bua kanyinganyinga kadi kanukuata bua ditshintshimika dia misoko yenu ne bua makenga adi bena lukuna benu banunkengesha nawu.’​—Dutelonome 28:53-57.

Ndekelu wa bionso, panyima pa ditshintshimika dia ngondo itanu, Yelushalema udi upona. Bena Lomo badi bapawula tshimenga ne ntempelo  munene udimu, babiosha ne pashishe basasulula mabue onso. (Danyele 9:26) Bantu batue ku 1 100 000 badi bafua; bakuabu 97 000 badi baya mu bupika. * (Dutelonome 28:68) Ditunga dia Yudaya didi dishala anu ne bantu babala ku minu. Bulelela, ndikenga dinene ditu kadiyi dianji kukuata tshisamba atshi, dishintuluka dinene mu malu a tshididi, a ntendelelu ne mu bilele bia bena Yuda. *

Padi malu aa enzeka mu Yelushalema, bena Kristo badi mu Pella badi basakidila Nzambi ne muoyo mujima bua mudiye mubasungile. Ditabuja diabu mu milayi ya mu Bible ndisungile mioyo yabu!

Patudi tuela meji ku malu aa, mbimpe yonso wa kutudi adiebeje ne: ‘Ndiku ne ditabuja diangambuluisha bua kupandisha muoyo wanyi mu dikenga dinene didi dienda disemena anyi? Ndiku “munkatshi mua badi ne ditabuja too ne ku dipeta dia muoyo” anyi?’​—Ebelu 10:39; Buakabuluibua 7:14.

[Mêyi adi kuinshi]

[Tablo mu dibeji 9]

Malu a mu tshimanyinu tshia Yezu avua makumbane mu bidimu lukama bia kumpala

MVITA:

Gaule (mu 39 too ne mu 40)

Nord wa Afrike (mu 41)

Bretagne (mu 43 ne mu 60)

Arménie (mu 58 too ne mu 62)

Mvita ya bena Yuda bobu nkayabu (mu 50 too ne mu 66)

BIKUMINA:

Lomo (mu 54)

Pompei (mu 62)

Asia Mukese (mu 53 ne mu 62)

Kuleta (mu 62)

BIYOLE BIA NZALA:

Lomo, Gelika, Ejipitu (bu mu 42)

Yudeya (bu mu 46)

BIPUPU BIA MASAMA:

Babulona (mu 40)

Lomo (mu 60 ne mu 65)

BAPROFETE BA MASHIMI:

Yudeya (bu mu 56)

[Karte/​Tshimfuanyi mu dibeji 10]

(Bua kumona malu bimpe, tangila mu mukanda)

Mvita ya bena Lomo mu Palestine, mu 67 too ne mu 70

Tolemai

Dijiba dia Ngalela

Pella

PÉRÉE

SAMALEA

Yelushalema

Mbuu wa mukela

YUDAYA

Kaisalia

[Mêyi a dianyisha]

Karte nkayaku: Based on maps copyrighted by Pictorial Archive (Near Eastern History) Est. and Survey of Israel

[Tshimfuanyi mu dibeji 11]

‘Baluishi betu badi bashipangana bobu nkayabu.’​—Vespasien

[Bimfuanyi mu dibeji 11]

Mu 70, biluilu bia bena Lomo biakabutula Yelushalema

[Mêyi a dianyisha bua bimfuanyi mu dibeji 11]

Relief: Soprintendenza Archeologica di Roma; Vespasien: Bildarchiv Preussischer Kulturbesitz/​Art Resource, NY