Nkonko ya babadi

Paulo uvua musue kuamba tshinyi pavuaye muambe ne: mbimpe mukaji wa mu lufuila ‘ikale mukaji wa muntu anu umue’ bua tshisumbu tshiambule bujitu buende?​—1 Timote 5:9.

Bu muvua Paulo wakula bua mukaji mukamba, tshiambilu ‘mukaji wa muntu anu umue’ tshidi ne bua kuikala tshileja nsombelu uvuaye nende kumpala kua bayende kufuaye. Bidi bisua kumvuija ne: mukamba eu uvua ne bua kuikala muye ku dibaka anu dimue patupu anyi? Peshi, Paulo uvua usua kumvuija tshintu tshikuabu mu miaku eyi? *

Bamue bantu badi bamba ne: Paulo uvua wakula bua bakaji bakamba bavua baye ku dibaka anu musangu umue. Mu imue miaba, bavua bangata mukaji mukamba uvua ubenga bua kuya ku dibaka dikuabu ne mushinga wa bungi. Kadi lungenyi elu ndubengangane ne tshidi Paulo wamba mu mikanda mikuabu. Tshilejilu, mu mukanda uvuaye mutumine tshisumbu tshia mu Kolinto, uvua muleje patoke ne: nansha muvuaye wela meji muvua mukaji mukamba mua kuikala bimpe bu yeye mua kushala kayi ku dibaka dikuabu, ‘yeye udi mumanye mua kuya ku dibaka kudiye musue, kadi anu mu Mukalenge.’ (1 Kolinto 7:39, 40; Lomo 7:2, 3) Kabidi, mu mukanda uvuaye mutumine Timote uvua muambe ne: ‘Ndi musue bansongakaji ba mu lufuila baye ku dibaka.’ (1 Timote 5:14) Malu aa adi aleja ne: kabavua ne bua kuangata bibi mukaji wa mu lufuila uvua mua kuitaba bua kuya ku dibaka dikuabu to.

Nanku mmunyi mutudi mua kumvua tshivua Paulo muambile Timote? Tshiambilu etshi: ‘mukaji wa muntu anu umue’ tshidi anu mu mvese eu. Bualu bukuabu butudi ne bua kumanya mbua ne: Paulo uvua muenze mudimu ne tshiambilu tshia mushindu umue mu mikanda mikuabu ivuaye mufunde. Tshilejilu, wakakula bua ‘mulume muena mukaji umue’ anyi bua ‘muntu udi ne mukaji umue.’ (1 Timote 3:2, 12; Tito 1:6) Paulo uvua mutele tshiambilu tshia kumpala pavuaye wakula bua ngikadilu idi batangidi bena Kristo ne basadidi ba mudimu ne bua kukumbaja. Mu nsombelu eu, tshiambilu etshi tshidi tshiumvuija ne: bua muntu ukadi musele kukumbana bua kuenza midimu ya pa buayi mu tshisumbu tshia bena Kristo, udi ne bua kulamata anu mukajende ne kuikala kabidi ne ngikadilu milenga. * Bu mudi malu mikale nanku, tshiambilu tshidi mu 1 Timote 5:9 tshidi mua kuikala ne diumvuija dia muomumue dia ne: Bua mukaji mukamba kukumbanaye bua tshisumbu kuambulatshi bujitu buende, uvua ne bua kuikala anu mulamate bayende patshivuaye ne muoyo ne kuikala ne bienzedi bilenga. Mu mvese udi ulonda Paulo udi utela malu makuabu adi ne mushinga bua tshisumbu kushisha kuambula bujitu bua mukaji mukamba wa nenku.​—1 Timote 5:10.

[Mêyi adi kuinshi]