Mulema, kadi musue kuenzela Nzambi mudimu

WEWE mupetangane ne Leonardo bua musangu wa kumpala, kuena mua kuitaba ne: udi mua kuenza mudimu wa luibaku to. Katshiena ne bianza to, biakamukoseka mu njiwu kampanda ya ku mudimu. Kadi nansha mudi Leonardo ne bulema ebu, wakenza mudimu wa bungi wa luibaku mu tshimenga tshia Acajutla tshia mu ditunga dia El Salvador, anu bu muudi umona mu foto eu.

Bua kumona mua kuenza mudimu wa luibaku eu, Leonardo wakadienzela biende biamu bia mudimu. Udi ubueja diboko diende dia balume mu disoso dia mulonda muasa ku ndekelu kua tshikuatshidi tshia tshikasu ne wela bimpe bimpe lusenga mu nkalu. Bu mudiye kayi mua kukuata ku bikuatshidi bia nkalu, udi wasa bikanu ku bikuatshidi ebi bua kumona mua kupusa bimpe. Ntshinyi tshiakamusaka bua kuenza mudimu wa luibaku eu?

Leonardo uvua musue kuenza pende mudimu wa dibaka Nzubu wa Bukalenge (muaba utu tshisumbu tshia Bantemu ba Yehowa tshidisangishila bua kutendelela). Uvua ne malu a bungi avuaye mua kudibingisha nawu bua kubenga kuenza mudimu eu. Uvua ne mudimu wende wa bianza uvua umuangata dituku dijima, uvua mulema, ne uvua kabidi musadidi wa mudimu mu tshisumbu. Nansha nanku, wakajinga bua kuenza tshivuaye mua kukokesha bua kuenzela Nzambi mudimu muaba uvuabu bibaka.

Udiku pebe ne lungenyi lua muomumue paudi wenzela Nzambi mudimu anyi? Pamutu pa Leonardo kumona bulema buende bu mushindu wa kudibingishaye, wakenza biamu bia mudimu ne meji ende bua kumonaye mua kuenza mudimu uvua mua kumueneka bu ne: yeye kavua mua kuwenza. Wakenzela Nzambi mudimu ‘ne lungenyi luende luonso.’ (Matayo 22:37) Nansha bobu balema anyi kabayi balema, bana betu batu benza mudimu wa kuibaka Nzubu ya Bukalenge ya Bantemu ba Yehowa pa buloba bujima batu ne lungenyi lua budisuile. Bisangilu bia Bantemu bidi bua bantu bonso ne badi bakuakidilamu ne disanka.