Udi muvuluke anyi?
Udi muvuluke anyi?
Dibala dia nimero ya ndekelu ya Tshibumba tshia Nsentedi divua dikusankishe anyi? Nanku, anji tangila ni udi mua kuandamuna nkonko idi ilonda eyi:
• Ndilongesha kayi ditudi tupeta mu mufuanu wa Yezu wa muntu muena disuminyina uvua muakidile muenyi? (Luka 11:5-10)
Mufuanu eu udi uleja lungenyi lutudi ne bua kuikala nalu patudi tusambila. Tudi ne bua kulomba ne disuminyina anyi kutungunuka ne kulomba nangananga nyuma muimpe wa Nzambi. (Luka 11:11-13)—15/12, dibeji dia 20-22.
• Mufuanu wa Yezu wa mukaji wa mu lufuila ne nzuji udi utulongesha tshinyi? (Luka 18:1-8)
Udi uleja mushinga wa kusambila. Yehowa mmushilangane ne nzuji eu bualu yeye udi muakane ne mmusue kutuambuluisha. Kabidi, tudi ne bua kuikala ne ditabuja bu dia mukaji wa mu lufuila wa mu mufuanu eu.—15/12, dibeji dia 26-8.
• Bua tshinyi mupostolo Paulo uvua muambile bena Kristo ba mu Kolinto bua ‘badiundishibue’? (2 Kolinto 6:11-13)
Bidi bimueneka ne: bamue bena mu Kolinto kabavua bangata bena kuitabuja nabu ne mushinga to, bualu bavua ne dinanga dikese mu mitshima yabu. Tudi ne bua kuenza muetu muonso bua kuikala kuangata bena kuitabuja netu ne mushinga ne kudienzeja bua kupeta balunda bapiabapia.—1/1, dibeji dia 9-11.
• Ntshimanyishilu kayi tshidibu bakuile mu Buakabuluibua 7:3?
Padi Nzambi wela bena Kristo manyi a nyuma muimpe, ntshimanyishilu tshia kumpala tshidibu bapeta. Kadi Buakabuluibua 7:3 udi wakula bua tshimanyishilu tshia ndekelu tshidi bena Kristo bela manyi bapeta bua kuleja mudibu bashale ne lulamatu.—1/1, dibeji dia 30-31.
• Ndilongesha kayi didi baledi mua kupeta mu muyuki wa mu Bible udi wakula bua Samuele?
Tshilejilu, badi ne bua kulongesha bana babu Dîyi dia Nzambi bu muvua baledi ba Samuele bamulongeshe. Kabidi, badi ne bua kukankamija bana babu bua bangate mudimu wa Yehowa bu wabu mudimu wa kuenza.—15/1, dibeji dia 16.
• Mmunyi mutudi mua kuleja ne: tudi bindile Yehowa ne disanka?
Tudi ‘batekemene dituku dia Nzambi’ ne bindile disulakana pabutulaye bantu babi bonso badi bamubenga. (2 Petelo 3:7, 12) Kadi nansha mudi Yehowa ne dijinga dikole dia kujikija malu mabi, udi windila bua kumona mua kupandisha bena Kristo mu mushindu watumbisha dîna diende. Tudi batuishibue ne: Yehowa mmumanye dîba dimpe dia kuenza bualu ebu, ne mu dindila dîba adi tudi ne bua kumutumbisha bikole. (Musambu 71:14, 15)—1/3, dibeji dia 17-18.
• Noa wakabuela mu buatu ne nyama mimpe 7 ku nyama ne nyama yonso anyi wakabuela ne nyama milume 7 ne mikaji 7 ku nyama ne nyama yonso?
Bavua bambile Noa bua ‘kubuela ne nyama muanda mutekete’ ya ku nyama yonso idi mimpe. (Genese 7:1, 2) Mu tshiena Ebelu, “muanda mutekete” udibu batele muaba eu badi baubala ne: “muanda mutekete muanda mutekete.” Ngakuilu eu kêna umvuija nyama milume 7 ne nyama mikaji 7 to, anu bu mudi mvese mikuabu ya mu Bible ileja. Bidi bimueneka ne: Noa wakangata nyama mimpe 7 ku nyama ne nyama yonso, mmumue ne: nyama isatu milume ne isatu mikaji ne wa muanda muteke uvuaye ne bua kulua kufila bu mulambu. (Genese 8:20)—15/3, dibeji dia 31.
• Bua tshinyi bena Kristo badi ne bua ‘kuela meji’ a mushidu udi ditabuja dia bakulu badi babalombola difika ku nshikidilu?
Mupostolo Paulo udi utubela bua ‘kuela meji’ anyi kutangila ne lubatshi tshikadilu tshimpe tshia bakulu bua kuidikija ditabuja diabu. (Ebelu 13:7) Tudi tuenza muanda eu bualu Bible udi utuambila bua kuenza nanku. Tudi kabidi batuishibue ne: bakulu badi baditatshisha bua malu a Bukalenge bua Nzambi ne bua diakalenga dietu.—1/4, dibeji dia 28.