Dîyi dia Nzambi dikala dikulombola

‘Dîyi diebe didi muendu ku makasa anyi ne munya muteme mu njila wanyi.’​—MUSAMBU 119:105.

1, 2. Bua tshinyi bantu ba bungi ki mbapete ditalala ne disanka dia bushuwa?

UKADIKU dimue dituku muebeje muntu bua kukuleja njila wa kuya muaba uuvua ukeba anyi? Imue misangu ukavua pabuipi ne kuuvua uya, kadi kuvua mumanye kua kubuelela to. Anyi mene ukavua mujimine, muye kua tshianana; bikengela kumuka muaba uukavua bua kuya ku mukuabu. Nansha bu wewe mujimine anyi kuyi mujimine, kuena umona ne: bivua bikengela kukonka muntu uvua mumanye bimpe muaba uuvua ukeba anyi? Muntu eu ke uvua mua kukuleja muaba uuvua ukeba.

² Bantu pa kuamba bonso mbenze bidimu binunu bivule badilombola anu nkayabu, kabayi balomba Nzambi diambuluisha to. Kadi bu mudibu bonso benza bilema, mbajimine menemene. Kabena mua kupeta ditalala ne disanka dia bulelela didibu bakeba to. Kadi bua tshinyi ki mbapete ditalala ne disanka dilelela? Muprofete Yelemiya ukavua muandamune lukonko elu bidimu bipite pa 2 500 kumpala. Uvua muambe ne: ‘Muntu wendenda eu kêna ne bukole bua kuludika makasa ende.’ (Yelemiya 10:23, MMM) Nunku muntu yonso udi kayi musue kukeba muntu udi mukumbane bua kumuludika neakenge. Kakuyi mpata, bidi bikengela muntu kampanda alombole bantu!

3.Yehowa mmukumbane menemene bua kulombola bantu bua tshinyi? Udi utuambila tshinyi?

³ Yehowa ke udi mukumbane menemene bua kuludika bantu. Bua tshinyi? Bualu anu yeye nkayende ke udi mumanye tshidi bantu bimpe menemene. Mmumanye muakatuadija bantu kupambuka ne kujimina. Mmumanye kabidi tshidi tshikengela kuenza bua bantu kupingana mu njila muimpe uvuabu. Bu mudi yeye ke udi mufuke bantu, utu anu mumanye tshidibu natshi dijinga menemene. (Yeshaya 48:17) Nunku, itaba ne muoyo mujima tshidiye ukuambila mu Musambu wa 32:8. Udi wambamu ne: ‘Nenkuyishe lungenyi, nenkuleje njila uudi ne bua kuendela, nenkupe meji patshidi dîsu dianyi kuudi.’ Eyowa, Yehowa udi ulombola bantu bimpe. Mushindu kayi?

4, 5. Leja mudi mêyi a Nzambi mua kutuambuluisha.

⁴ Umue wa ku bafundi ba Misambu wakambila Yehowa ne: ‘Dîyi diebe didi muendu ku makasa anyi ne munya muteme mu njila wanyi.’ (Musambu 119:105) Malu adi Nzambi utuambila adi mu Bible. Adi mua kutuleja tshia kuenza ne ntatu idi itukuata. Nanku paudi ubala Bible, wenza kabidi tshidiye ukuambila, udi udiumvuila tshidi Yeshaya 30:21 wamba etshi: ‘Matshi ebe neumvue dîyi difume kunyima kuebe, diamba ne: Njila nyeye eu, endelamu.’

⁵ Umanye ne: Musambu wa 119:105 udi wakula bua midimu ibidi idi nayi Dîyi dia Nzambi. Mudimu wa kumpala: Dîyi dia Nzambi didi bu muendu ku makasa etu. Patudi tupeta ntatu ku dituku ku dituku, mêyi a mu Bible adi ne bua kuludika makasa etu bua kusungula malu mimpe ne kubenga kukuatshika mu mateyi a bena panu. Mudimu muibidi: malu adi Nzambi utuvuluija adi atutokeshila njila wetu, atuambuluisha bua kusungula malu adi aleja ne: tudi ne ditekemena dia kuikala ne muoyo wa kashidi mu  Mparadizu udi Nzambi mutulaye. Padi njila muikale mutokesha bimpe, tudi tumona bipeta bimpe ne bibi bia bikadilu bia bantu. (Lomo 14:21; 1 Timote 6:9; Buakabuluibua 22:12) Tumonayi mpindieu bimpe mudi mêyi a Nzambi adi mu Bible mikale muendu ku makasa etu, mikale kabidi butoke bua njila wetu.

‘Muendu ku makasa anyi’

6. Ndîba kayi ditu dîyi dia Nzambi mua kuikala bu muendu ku makasa etu?

⁶ Tutu tuangata mapangadika dituku dionso edi. Amue adi mua kumueneka kaayi ne mushinga wa bungi to. Kadi kutu nsombelu mikuabu itu itufikisha ku dienda bundumba, ku dishima anyi ku dibuelakana mu malu a bena panu ne a tshididi. Bua kuangata mapangadika mimpe mu nsombelu eyi, mbimpe tuikale ne ‘meji etu mibidija bua kujingulula nawu tshidi tshimpe ne tshidi tshibi.’ (Ebelu 5:14) Patudi tupeta dimanya dijalame dia Bible ne tudienzeja bua kumvua bimpe mêyi manene adimu, tudi tulongesha kondo ketu ka muoyo mua kuangata mapangadika adi asankisha Yehowa.​—Nsumuinu 3:21.

7. Filabi tshilejilu tshia dîba didi muena Kristo mua kumvua muoyo wa kudia bulunda ne bantu badi kabayi bena Kristo.

⁷ Tuteke tshilejilu ne: udi muntu mukole, kadi utu udienzeja muebe muonso bua kusankisha Yehowa. (Nsumuinu 27:11) Mbualu mbuimpe be! Kadi elabi meji ne: bena mudimu nebe badi bakupesha tike wa kuya kumona nabu dinaya kampanda, bualu mbakusue ne mbasue kukolesha nebe malanda. Udi mua kuikala wela meji ne: ki mbantu babi to, bualu batu pabu ne imue ngikadilu milenga. Newenze tshinyi mpindieu? Kuya kutangila nabu dinaya adi nkubi anyi? Bible udi mua kukuambuluisha munyi bua kuangata dipangadika dimpe mu bualu ebu?

8. Tela mêyi manene a mu Bible adi atuambuluisha mu tshilumbu tshia kudia malanda ne bantu.

⁸ Tuangate mpindieu amue mêyi manene a mu Bible. Dîyi dia kumpala didi mua kuanji kukuluila mu mutu ngedi didi mu 1 Kolinto 15:33. Didi diamba ne: “Malunda mabi adi anyanga malu makane a bantu.” Mubelu eu udi ukulomba bua kuepuka bantu bonso badi kabayi bena Kristo anyi? Tòo. Bualu tudi tumona mupostolo Paulo uleja tshilejilu mudiye munange ‘bantu bonso,’ too ne bantu bavua kabayi bena Kristo. (1 Kolinto 9:22) Buena-Kristo mene budi butulomba bua kunanga bantu netu, nansha badi kabayi bena kuitabuja netu. (Lomo 10:13-15) Tuetu tuepuka bantu badi netu dijinga, katuakulonda mubelu udi wamba bua ‘kuenzela bantu bonso bimpe’ to.​—Galatia 6:10.

9. Mmubelu kayi wa mu Bible udi utuambuluisha bua kuikala ne nkatshinkatshi mu malanda etu ne bena mudimu netu?

⁹ Tshidibi, kudi dishilangana dinene pankatshi pa: kusomba bimpe ne bena mudimu netu, ne kudia nabu bulunda. Mupostolo Paulo udi utela dîyi dinene dikuabu didi mua kutuambuluisha muaba eu. Didi diamba ne: “Kanudisangi ne bantu badi kabayi bena ditaba; kabena banuakanyine to.”  (2 Kolinto 6:14, MMM) Kuamba ne: “kanudisangi” mmumue ne ntshinyi? Imue Bible idi yandamuna mêyi aa ne: ‘lekelayi kulamakajibua,’ “kanukuatshi mudimu pamue,” “kanuenji ditempu dikodiakane,” “lekelayi kudia malanda adi kaayi makanyine.” Tutu tusambuka mikalu dîba kayi? Ndîba kayi didibi bilua kabiyi biakanyine? Mukanda wa Nzambi ke udi mua kukosa tshilumbu etshi.

10. (a) Bantu bavua Yezu usungula bua kulua balunda bende bavua bantu ba mushindu kayi? (b) Diela nkonko idi mua kukuambuluisha bua kusungula mulunda muimpe.

¹⁰ Tuangate tshilejilu tshia Yezu. Yezu uvua munange bantu katshia anu Nzambi wabafuka. (Nsumuinu 8:31) Pakaluaye pa buloba, wakananga bayidi bende bikole. (Yone 13:1) ‘Wakananga’ too ne muntu kampanda uvua kayi utendelela Yehowa mu mushindu muimpe. (Mâko 10:17-22) Kadi uvua mudielele mikalu mu disungula diende dia balunda. Tshilejilu, kavua mudie bulunda ne bantu bavua kabayi basue kuenza disua dia Tatuende to. Umue musangu mene wakamba ne: ‘Nenuikale balunda banyi, binuenza bu mundi nnuambila.’ (Yone 15:14) Bidi mua kuenzeka ne: nuikale numvuangana bimpe ne muena mudimu wenu mukuabu. Kadi anji diebeja ne: ‘Muntu eu utu munange kuenza malu adi Yezu mutuambile bua kuenza anyi? Bu mudi Yezu mutuambile bua kutendelela Yehowa, muntu eu mmusue kulonga bua kumanya Yehowa bimpe anyi? Udi utumikila mikenji yonso indi meme muena Kristo ne bua kulonda anyi?’ (Matayo 4:10) Paudi uyikila nende anyi umuambila bua kulonda malu adi Bible wamba, neupete mandamuna a nkonko eyi.

11. Fila bilejilu bidi bileja mudi Dîyi dia Nzambi mua kuludika makasa ebe.

¹¹ Bible udi mua kuikala bu muendu ku makasa etu mu nsombelu ya bungi. Tutele tshilejilu tshia muena Kristo udi ukeba mudimu ne muoyo umue. Muanetu eu udi mua kupeta mudimu, kadi muikale mukole, umuangata kabidi dîba dionso. Yeye muwitabe, kakuikala ubuela mu bisangilu bionso to; kakuenza midimu mikuabu idi bena Kristo bonso benza nansha. (Musambu 37:25) Muena Kristo mukuabu yeye udi mua kuikala ne dijinga dikole dia kujikija lutetuku mu mushindu udi kawuyi uvuangana ne Dîyi dia Nzambi to. (Efeso 4:17-19) Munga yeye udi mua kuikala didimba kabantengeshi, ufika  munda nansha bua kabualu konso kadi muena Kristo nende umuenzela. (Kolosai 3:13) Mu nsombelu yonso eyi, ulekele Bible ikala bu muendu ku makasa ebe. Kakuyi mpata, wewe ulonda tshidi Bible wamba, neupite bimpe ne ntatu nansha bayamba munyi. Bualu Bible ‘udi ne mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi.’​—2 Timote 3:16.

‘Munya muteme mu njila wanyi’

12. Bible udi mua kuikala bu butoke mu njila wetu mushindu kayi?

¹² Musambu wa 119:105 udi wamba kabidi ne: Bible udi ututokeshila njila wetu bua tuetu kumona kutudi tuya. Tshilejilu, Bible udi utuambila bua tshinyi makenga adiku lelu, ne tshienzeka kumpala eku. Bulelela, tudi bamanye ne: tudi mu ‘matuku a ku nshikidilu’ wa ndongoluelu mubi wa malu eu. (2 Timote 3:1-5) Bu mutudi bamanye tshidi tshituindile kumpala, ngenzelu wetu wa malu udi ne bua kuikala wende mushindu. Mupostolo Petelo wakamba ne: ‘Bualu bua bintu ebi bionso bidi bijimina nunku, bunudi nabu mbua kuikala bantu ba mushindu kayi mu bienzedi bia tshijila ne bia Nzambi, panudi nutekemena ne panudi nuendesha lukasa dilua dia dituku dia Nzambi?’​—2 Petelo 3:11, 12.

13. Bu mutudi mu matuku a ndekelu, ngelelu wetu wa meji ne bienzedi bietu bidi ne bua kuikala bishi?

¹³ Mbimpe ngelelu wetu wa meji ne bienzedi bietu bileje ne: tudi tuitaba ne muoyo mujima ne: “Buloba budi bujimina ne lukuka luabu kabidi.” (1 Yone 2:17) Kutumikila tshidi Bible utuambila nekutuambuluishe bua kuangata mapangadika mimpe bua malu atuenza matuku adi kumpala. Tshilejilu, Yezu wakamba ne: ‘Diambedi kebayi bukalenge buende ne buakane buende, nunku nebanupe bintu ebi bionso.’ (Matayo 6:33) Nanku, bansonga bonso badi balonda mubelu wa Yezu eu, basungula mudimu bu mudi wa bumpanda-njila, mba kuela diboko mulu. Mêku anyi bantu bakuabu ba kuela kalumbandi ngaba batu baya kusombela muaba udi bambi ba lumu luimpe bakese menemene.

14. Dîku dikuabu diakenza tshinyi bua kuyisha bikole?

¹⁴ Tuangate tshilejilu tshia tatu ne mamu ne bana babu babidi bakumuka mu ditunga dia États-Unis bua kuya mu tshimenga tshivua ne bantu batue ku 50 000 mu ditunga dia République Dominicaine. Mu tshimenga amu mudi tshisumbu tshimue tshienza ne bamanyishi ba Bukalenge bua Nzambi  batue ku 130. Pabi bantu batue ku 1 300 bavua babuele mu Tshivulukilu tshia lufu lua Yezu tshivua tshienzeke mu dia matuku 12 a ngondo 4 mu 2006. Mu musoko eu, ‘madimi mmatoke’ tòò. Tshilejilu, ngondo itanu tshianana kunyima, bena dîku edi bakavua balonga Bible ne bantu bapite pa 30. (Yone 4:35) Tatu udi wamba ne: “Mu tshisumbu etshi mudi bana betu 30 badi bafumine mu makuabu matunga. Bantu batue ku 20 mbafumine mu États-Unis, bakuabu mbafumine mu Bahamas, mu Canada, mu Italie, mu Nouvelle-Zélande ne mu Espagne. Badi balua bua kuyisha ne muoyo mujima. Ngikadilu eu mmupeshe bana betu badi mu tshimenga etshi dijinga dikole dia kuyishabu pabu.”

15. Telabi malu mimpe audi mupete anu bua paudi muteke Bukalenge bua Nzambi kumpala kua malu makuabu.

¹⁵ Tudi bamanye bimpe ne: bana betu bakuabu kabena ne mushindu wa kuya miaba kampanda bua kuyisha to. Kadi aba badi ne mushindu anyi badi mua kushintulula amue malu bua kuyabu pabu, nebapete bipeta bimpe be! Kadi nansha wewe muaba kayi, kupu muoyo ne: udi mua kuikala ne disanka dia kukuatshila Yehowa mudimu ne makanda ebe onso to! Yehowa udi wamba ne: wewe muteke malu a Bukalenge buende kumpala kua malu onso, ‘neakulokeshile masanka, kuyi ukengela bintu bikuabu kabidi.’​—Malaki 3:10.

Wewe ulonda dîyi dia Yehowa, neupete bipeta bimpe

16. Netupete tshinyi tuetu tulekela Bible utuludika?

¹⁶ Tudi bamone mudi Bible utulombola mu mishindu ibidi. Bible udi bu muendu ku makasa etu bualu udi utuambuluisha bua kuendela mu njila muimpe, utuambuluisha kabidi patudi tuangata mapangadika. Bible udi kabidi utokesha njila wetu bua tuetu kumona bimpe malu ikala mua kuenzeka kumpala eku. Nenku Bible udi utuambuluisha bua kulonda mubelu wa Petelo eu: ‘Nunku nuele bimono bia meji enu mikaya, nuikale talalaa, nujadike ditekemena dienu tshishiki mu ngasa udibu balua nende kunudi ku dibuluibua dia Yezu Kristo.’​—1 Petelo 1:13.

17. Kulonga kua Bible kudi mua kutuambuluisha munyi bua kulonda tshidi Nzambi utuambila?

¹⁷ Kakuyi mpata, Yehowa udi utulombola. Mpindieu lukonko luudi mua kudiela ludi ne: Nendonde tshidi Nzambi ungambila anyi? Kadi bua wewe kuenza mudi Yehowa ukulomba, wangate dipangadika dia kubala tshitupa tshia Bible dituku dionso diakafuka Nzambi edi. Ikala wela meji bua biudi ubala abi; uteta kumona tshidi Yehowa musue bua wenze; wela meji bua kumona mishindu iudi mua kutumikila malu audi mubale au. (1 Timote 4:15) Wenze pashishe mudimu ne ‘meji’ ebe paudi wangata mapangadika.​—Lomo 12:1.

18. Paudi wenza anu tshidi Bible ukuambila, neupete malu kayi mimpe?

¹⁸ Mêyi manene adi mu Bible adi mua kukuambuluisha bua kuenza malu mimpe anu wewe mualekele akuludika. Ikala mutuishibue ne: Bible udi mua ‘kuvuija muntu udi mutatakane muena meji.’ (Musambu 19:7) Paudi ulekela Bible ukuleja tshia kuenza, udi ushala ne kondo ka muoyo kimpe, umvua kabidi disanka bualu udi wenza malu adi asankisha Yehowa. (1 Timote 1:18, 19) Wewe ulonda dituku ku dituku tshidi Bible ukuambila, Yehowa neakupe tshintu tshinene tshitambe, tuamba ne: neakupe muoyo wa tshiendelele.​—Yone 17:3.

Utshidi muvuluke anyi?

• Mbimpe kulekela Yehowa atulombole bua tshinyi?

• Bible utu ulua bu muendu ku makasa etu dîba kayi?

• Mmunyi mudi Bible mua kulua bu munya anyi butoke mu njila wetu?

• Kulonga Bible kudi mua kutuambuluisha munyi bua kulonda dîyi dia Nzambi?

[Nkonko ya dilonga]

[Tshimfuanyi mu dibeji 15]

Malanda etu ne muntu udi kayi muena Kristo atu alua mabi dîba kayi?

[Tshimfuanyi mu dibeji 16]

Bantu bavua benza disua dia Yehowa ke bavua balunda ba Yezu

[Bimfuanyi mu dibeji 17]

Nsombelu wetu udiku uleja ne: tudi bateke Bukalenge bua Nzambi kumpala kua bionso anyi?