Bantemu mbabinge ku tubadi tua ku Mputu tua maneme a bantu

DITUKU dia 11 ngondo wa kumpala 2007, banzuji ba ku Kabadi ka ku Mputu ka maneme a bantu kadi ku Strasbourg mu France bavua buonso buabu basuike dîyi divua dibingishe Bantemu ba Yehowa ba mu Russie, dipishe mbulamatadi wa ditunga edi. Dîyi adi divua dileja patoke mudi Bantemu ba Yehowa ne budikadidi bua kutendelela Nzambi mu ditalala ne mudibu ne bukenji bua kulumbulula ku tubadi kakuyi dibasunguluja. Tuanji tumonabi muakafika tshilumbu etshi.

Bantu bavule badi mu tshimue tshisumbu tshia Bantemu ba Yehowa ba mu tshimenga tshia Chelyabinsk (mu Russie) ntumama. Bavua badisangishila mu tshibambalu tshivuabu bafutshila tshia tulasa kampanda tubandile. Mu Dia lumingu dia 16 ngondo muinayi 2000, shefu wa bena Malu a maneme a bantu ba mu tshimenga atshi ne banene 2 ba bampulushi ne mutentekedi umue muvuale bilamba bidi kabiyi bia bampulushi bakakosesha Bantemu abu bisangilu munkatshi. Nangananga anu bua lukinu lua shefu wa bena malu a maneme a bantu au, bakakosesha bana betu bisangilu munkatshi bua malu a dishima mabalamakajila ne: bavua babueje masangisha mbulamatadi kayi mubanyishilawu. Dituku dia 1 ngondo muitanu 2000, tshipungidi anyi kontra wa difutshila mu tshibambalu tshivua bana betu abu benzela bisangilu wakatua ku ndekelu.

Ke Bantemu ba Yehowa kufikishabu tshilumbu atshi ku tubadi tua ku Chelyabinsk, kadi kakuyi bua nsongo to. Mikenji ya ditunga dia Russie ne Tshipangu tshia dikuba dia maneme a bantu ne budikadidi buabu bitu bishile bantu budikadidi bua kutendelela mudibu basue ne bua kubuela mu tshitendelelu kayi tshionso tshidibu basue. Ke pakaya bana betu ne tshilumbu ku tubadi tua mu distrike diabu ne ku tua mu provense wabu kabidi. Kumpala, pavuabu bakose tshilumbu tshikuabu mu dia 30 ngondo wa 7 mu 1999, bavua bele mukenji ku Kabadi kakulu ka mu Russie ne: “Bilondeshile mikenji ya ditunga dia Russie ya budikadidi bua kondo ka muoyo ka muntu ne bua bitendelelu, dîyi dia ne: ‘kabayi babapangisha’ didi diumvuija ne: kabiena bikengela bua banene kampanda kuanji kufila dianyisha anyi bua bitendelelu kulombabi dianyisha diabu bua kushisha kubueja masangisha abi mu nzubu itubi [biabuejila] nansha.” Nansha mukavuaku mukenji eu, tubadi tua ku distrike ne tua ku provense tuakabenga kutangila tshilumbu tshia bana betu aba.

Nunku, dia 17 ngondo wa 12 mu 2001 bana betu bakafikisha tshilumbu tshiabu ku Tubadi tua ku Mputu tua maneme a bantu. Kadi kulumbululabu mu dia 9 ngondo wa tshitema 2004. Amue a ku mêyi a ndekelu akamba banzuji bua kukosa tshilumbu etshi ngowu aa:

“Tubadi etu ntumone ne: mbapangishe bena tshilumbu etshi bukenji buabu bua kutendelela mu budikadidi, bualu banene ba mbulamatadi bavua babakoseshe masangisha abu munkatshi mu dia 16 ngondo muinayi 2000.”

“Ki nkumueneke mukenji uvuabu mua kukoseshila disangisha dia tshitendelelu munkatshi divua dibuejila mu nzubu ivua mbulamatadi mumanye bimpe ne: bavua bafutshilamu nansha.”

“[Tubadi etu] ntumone mukenji ukavuabu bele pa tshilumbu tshia muomumue kudi Kabadi kakulu ka ditunga dia Russie uvua uleja ne: bitendelelu kabiena ne bua kuanji kulomba dianyisha kudi banene ba mbulamatadi anyi kubamanyisha bua kushisha kubueja masangisha abi nansha.”

“Bua bualu ebu, shefu au ne bantu bende mbashipe Kanungu ka 9 [ka budikadidi bua kutendelela] ka Tshipangu tshia dikuba dia maneme a bantu pavuabu bakoseshe masangisha a bena tshilumbu etshi munkatshi mu dia 16 ngondo muinayi 2000.”

“Tubadi etu ntumone ne: tubadi tua mu Russie ntupangile mudimu watu . . . wa kutuleja bikala bantu bavua bafundangane ne bavuabu bafunde ni mbalumbulule bonso mu buakane kakuyi kansungansunga. Nanku . . . ntushipe Kanungu 6 [ka bukenji bua kulumbulula kakuyi kansungansunga] ka Tshipangu tshia dikuba dia maneme a bantu.”

Bantemu ba Yehowa badi bela Nzambi tuasakidila bua mudiye mubambuluishe babinge ku Tubadi tua ku Mputu tua maneme a bantu. (Musambu 98:1) Dîyi divuabu basuike ku Tubadi etu nedikale ne dikuatshisha kayi? Joseph Grieboski (mulombodi wa Midimu ya malu a bitendelelu ne a mikenji mu bantu) udi wamba ne: “Edi ndîyi dikuabu kabidi dia mushinga mukole diashintulula malu a budikadidi bua kutendelela mu matunga onso a ku Mputu, bualu dîyi edi nedishintulule malu a bukenji bua bantu bua kutendelela mu matunga onso adi Tubadi tua ku Mputu tua maneme a bantu tutangila.”