“Mfumu, bua tshinyi uvua mushale mupuwe?”

MÊYI aa ngakamba pape Benoît XVI pavuaye mufike muaba uvua buloko bunene bua kale bua ku Auschwitz mu Pologne mu dia 28 ngondo muitanu 2006. Pakafikaye muaba uvua bena tshididi tshia Nazi bashipele bena Yuda ne bantu bakuabu binunu nkama ne nkama, wakamba kabidi ne: “Eu mmuaba udi ujudija makonka mapite bungi! Dikonka didi ditamba kulua ndia se: Nzambi uvua penyi dîba adi? Bua tshinyi uvua mushale mupuwe? Bua tshinyi uvua mulekele bantu batungunuka ne kushipangana nanku, ne bubi bupita bukole nunku? . . . Tudi ne bua kutungunuka ne kudidila Nzambi ne disuminyina ne budipuekeshi ne: Juka! Kupu bantu bebe muoyo, bufuki buebe!”

Mêyi a pape aa avua masake bantu ku diamba malu a bungi. Bamue mbamone ne: uvua mubenge ku bukole bua kutela malu makuabu, bu mudi a bena Yuda bavuabu bakine ne bakengeshe ne tshikisu tshibi mu tshimenga tshia Auschwitz. Bua bakuabu, pavuaye muambe mêyi aa uvua ukeba kupepeja disambila dia pape Jean Paul II uvua ulomba Nzambi dilekela bua mibi ivua ekeleziya wabu muenze. Filippo Gentiloni (kamona-kamba muena Katolike) uvua muambe pende ne: “Tshidibi, mbiumvuike muvua bakamona-kamba ba bungi balekele lukonko luvua lubatatshishe lua kumanya muaba uvua Nzambi (luvua kaluyi ne diandamuna) bua kukeba diandamuna dia lukonko luvua lupepele lua se: kadi Pie XII uvua yeye penyi?” Bakamona-kamba aba bavua bamba pape Pie XII wakashala mupuwe tshikondo tshivua bena Nazi bashipa bena Yuda.

Dishipa dia bena Yuda kudi bena Nazi edi ne malu mabi makuabu onso a dishipa dia bisumbu bia bantu adi menzeke panu katshia ku kale bidi bijadika mudi ‘bantu badi ne bumfumu bakengesha bantu nabu.’ (Muambi 8:9, MMV) Kabidi, Mufuki wa bantu ki mmushale mupuwe padiye umona tshikisu tshikuate buôwa nunku to. Nzambi mmuleje mu Bible tshidiye mulekele malu mabi enzeka pa buloba. Mmutujadikile kabidi ne: ki mmupue bantu muoyo to. Bushuwa, tshikondo tshidi Nzambi muitabile bantu bua kudikokesha tshikadi pa kutua ku ndekelu mu katupa kîpi emu. (Yelemiya 10:23) Udiku musue kumanya malu mavule a tshidi Nzambi mutulongoluele anyi? Bantemu ba Yehowa mbasue kukuambuluisha bua umvue mushindu udi Bible wandamuna nkonko ivua mitatshishe pape Benoît XVI ayi.

[Mêyi a dianyisha bua tshimfuanyi mu dibeji 32]

Oświęcim Museum