Muudi mua kupeta ditekemena pa buloba bua makenga ebu

MU NGONDO muisatu 2006 mu tshisangilu kampanda ku Ottawa, mu ditunga dia Canada, Bill Clinton mfumu wa kale wa mu États-Unis wakamba ne: “Bantu betu ba tshianana aba ke bakadi mpindieu ne bukole bua kuenzelangana malu mimpe ne kujikija ntatu idi ikuatangana kupita muvuabi kale.” Wakalua kuamba kabidi ne: muoyo muimpe wa diambuluishangana wa bukua matunga mmutuadije kumueneka katshia dîba divua mâyi masapalale mu bantu mu 2004 ne kuambaye ne ndambu wa dishindika ne: buloba budi mpindieu “mu tshikondo tshidi matunga atamba kueyemenangana.”

Tudi ne bua kuindila bipupu bua bisake bantu ba miaba yonso bua kukeba nsombelu mulenga anyi? ‘Kutamba kueyemenangana kua matunga’ eku ke kudi mua kupetesha bantu ditekemena dia ditalala dia bushuwa ne bupole bua kashidi mu matuku atshilualua anyi?

Mpokolo wa ditekemena dia bushuwa

Malu a bungi adi bantu batete kuenza mu bidimu bipite pa binunu bisambombo adi aleja ne: bantu mbelangane mâyi ku makasa njila ne njila. Ke bualu kayi Mukanda wa Nzambi udi utubela  ne: “Kanutekemenyi kudi baludiki ba matunga, badi amu bantu, kabena mua kunupandisha.” (Musambu 146:3, MMM) Kutekemena malongolodi a bena panu, mabanji abu ne bipatshila biabu kudi kuelangana mâyi ku makasa. Mbua tshinyi? Bualu “buloba budi bujimina ne lukuka luabu kabidi.”​—1 Yone 2:17.

Kadi kukadi bidimu nkama mivule bidi Nzambi muikale ditekemena dishindame bua bantu bakane. Mu Bible badi babikila Nzambi ne: “ditekemena dia bena Isalele” ne “ditekemena dia batatu” ba bena Isalele, ne mudi miaku ya bungi idi yakula bua kumutekemena ne kumueyemena. (Yelemiya 14:8; 17:13; 50:7) Bushuwa, Bible udi utukankamija bua ‘kutekemena [Yehowa].’​—Musambu 27:14, MMM.

Nsumuinu 3:5, 6 udi utuambila ne: ‘Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe.’ Kuena mutupakane bua kutekemena dilaya edi ne muoyo mujima to, bualu Yehowa Nzambi katu ushintuluka, ngua kueyemena ne utu ukumbaja dîyi diende. (Malaki 3:6; Yakobo 1:17) Udi ukujingila malu malenga; wewe uteleja misangu yonso malu adi Dîyi dia Nzambi diamba, nedikulombole bimpe mu bikondo ebi bia malu adi enza buôwa.​—Yeshaya 48:17, 18.

Muntu udi ulonda ne muoyo mujima mibelu ya Nzambi udi mua kueyemena mulayi eu: ‘Kutshinyi, bualu bua ndi nebe; kukenzakanyi bua buôwa nansha, bualu bua ndi Nzambi webe; nenkukoleshe, bulelela, nenkukuatshishe; bulelela, nenkujadike ne tshianza tshianyi tshia balume tshia buakane buanyi.’ (Yeshaya 41:10) Disambila ne muoyo mujima ne dielangana meji bua mêyi aa bidi bitamba kukolesha bantu bonso badi banange Yehowa Nzambi menemene, bualu bidi bibambuluisha bua kutshimuna ntatu ne tunyinganyinga.

Angata tshilejilu tshia Andrea udi Ntemu wa Yehowa ne mamu wa bana babidi. Udi wamba ne: “Disambila ne dielangana meji bua malu adi Yehowa mulaye ke bidi bimpesha bukole bua kujukuluka bikondo bintu mpeta dielakana. Pandi anu ne Yehowa kumpala kuanyi bidi bitamba kumpepelela bua kushala mushindame.”

Enza bua ditekemena diebe kudi Yehowa dikole

Mufundi wa Misambu mukuabu wakaleja mushinga wa ditekemena Yehowa wamba ne: “Badi bananga mikenji yebe badi ne ditalala dinene; kakuena tshidi mua kubalenduisha.” (Musambu 119:165) Kulonga Dîyi dia Nzambi ne muoyo mujima kudi mua kukuambuluisha bikole bua kuuja lungenyi ne mutshima webe ne malu mimpe adi akolesha mu nyuma, ‘adi malelela, a buneme, makane, a butoke bua mutshima, malengele a dinanga, adi ne lumu luimpe.’ Wewe mudienzeje muebe muonso bua kuteleja malu aa, kualonga, kuitaba ne kuatumikila, ‘Nzambi wa ditalala neikale nebe.’​—Filipoi 4:8, 9.

John udi wamba bua malu adiye mudimuene munkatshi mua bidimu bia bungi ne: “Bua meme kushintulula meji amvua nawu bua matuku atshilualua, biakandomba bua kuanji kumanya ne: bivua bikengela meme kushintulula bumuntu buanyi bujima ne ngelelu wanyi wa meji kumpala kua kudia malanda ne Nzambi mupuangane udi kayi umueneka. Mushindu umuepele umvua mua kudia nende malanda au uvua wa kulua muntu wa mu nyuma. Abi bivua bindomba bua kubanga kumona malu mudi Nzambi uamona pa kubala Dîyi diende ne kuelangana meji a bualu buadi.”

Wewe unua mâyi a muoyo adi akolesha a bulelela bua mu Bible, newikale ne bukole bua kuepuka malu mabi adibu baleja ku tudiomba dituku dionso. Kutumikila malu adi Bible wamba kudi kabidi mua kukolesha malanda enu a mu dîku ne kukuambuluisha bua kukepesha tunyinganyinga. Kabidi, Nzambi mmulaye ne: udi pabuipi bua ‘kuleja bukole buende kudi bantu badi ne mitshima miakane kudiye.’ (2 Kulondolola 16:9) Nealongolole malu mu mushindu wa se: wewe kuakuikala ne bualu nansha bumue bua kutshina to.

Phinehas uvuaku mu bimue bikondo bia mvita ne dishipa dia bantu bapite bungi udi wamba ne: “Ndi mulonge mua kuteka muoyo wanyi mu bianza bia Yehowa mulami wa bantu. Ditumikila mêyi a mu Bible ndingepule ku malu a bungi.” Wewe mueyemene Yehowa Nzambi ne muoyo mujima, udi  mua kukuambuluisha bua kutshimuna lutatu kayi luonso ludi lumueneka bu tshimanu tshile tshidi muntu kayi mua kutumpika. (Musambu 18:29) Muana udi munangangane ne baledi bende bikole utu ufika ku dibeyemena ne muoyo mujima ne udiumvua mukubibue nansha padiye usama anyi muikale mu lutatu lukuabu. Udi mua kumvua pebe bia muomumue biwadienzeja bua kutekemena Yehowa bu mudiye ujinga bua wenze.​—Musambu 37:34.

Tshishimikidi tshishindame tshia ditekemena

Yezu Kristo wakambila bayidi bende ne: ‘Nutendelele Nzambi nunku: Tatu wetu udi mu diulu, banemeke dîna diebe. Bukalenge buebe bulue. Benze pa buloba muudi musue bu mudibu benza mu diulu.’ (Matayo 6:9, 10) Bukalenge bua mu diulu abu budi Yezu Kristo ulombola ke budi Nzambi uleja nabu bumfumu Buende pa buloba bujima.​—Musambu 2:7-12; Danyele 7:13, 14.

Malu a bungi adi enza buôwa mu nsombelu yonso ya bantu lelu adi aleja patoke ne: bidi bikengela bua Nzambi atangile tshilumbu tshiawu. Diakalenga, ukadi pa kutshitangila! Yezu Kristo udi Nzambi muteke mpindieu Mukalenge udi ne bukokeshi bua kubingisha bumfumu bunene bua Yehowa ne kutumbisha dîna Diende. (Matayo 28:18) Mu katupa kîpi emu, Bukalenge ebu nebutangile malu a pa buloba bua kumbushapu bionso bidi bikebela bantu buôwa ne tunyinganyinga. Yeshaya 9:6 udi utela mêyi adi aleja mudi Yezu muikale Mukokeshi mukumbane udi mua kutumushila bintu bionso bidi bituenza buôwa. Tshilejilu, badi bamubikila ne: “Tatu wa Tshiendelele,” “Mubakemeshi,” ne ‘Mukalenge wa ditalala.’

Tuakule bua mêyi malenga a ne: “Tatu wa Tshiendelele.” Bu mudi Yezu muikale Tatu wa Tshiendelele, udi ne bukole ne bukokeshi ne dijinga dia kupesha bantu badi bamutumikila ditekemena dia kuikala ne muoyo wa kashidi pa buloba ku diambuluisha dia mulambu wende udi upikula. Ebi bidi biumvuija ne: neabapikule ndekelu wa bionso ku mpekatu ne ku dipanga bupuangane bidibu bapiane kudi Adama muntu wa kumpala muena bubi. (Matayo 20:28; Lomo 5:12; 6:23) Kristo neakuate kabidi mudimu ne bukokeshi budi Nzambi mumupeshe ebu bua kubisha bantu bavule bakadi bafue.​—Yone 11:25, 26.

Pavua Yezu pa buloba, wakaleja muvuaye mufidi wa mibelu uvua ‘ukemesha bantu.’ Bua dimanya divuaye nadi dia Dîyi dia Nzambi ne ngumvuilu wa pa buende wa ngikadilu wetu wa bumuntu, uvua mumanye mua kujandula malu avua akuata bantu dituku dionso. Katshia bateka Kristo mukalenge mu diulu, udi utungunuka ne kuikala Mufidi wa mibelu ‘udi ukemesha bantu,’ muikale muntu munene udi ufikisha malu a Yehowa kudi bantu. Mibelu ya Yezu mifunda mu Bible itu anu ya meji ne kayiyi ne kalema. Kumanya mibelu eyi ne kuyitaba kudi mua kukufikisha ku dikala kuyi ne dielakana ne buôwa.

Yeshaya 9:6 udi kabidi ubikila Yezu ne: ‘Mukalenge wa Ditalala.’ Bu mudi Kristo muikale ne muanzu au, neangate bukokeshi buende bua kumbusha nabu tunsungansunga tuonso mu malu a tshididi, a mu nsombelu ne a mfranga. Mmunyi muenzaye nanku? Mpa kuteka bukua bantu ku bukokeshi bumuepele bua ditalala bua Bukalenge buende yeye Masiya.​—Danyele 2:44.

Mu Bukalenge abu, ditalala dia kashidi nedikale pa buloba bujima. Ntshinyi tshidi tshikujadikila bualu ebu? Tshijadiki ntshileja mu Yeshaya 11:9 mutudi tubala ne: Bantu [badi bakokela Bukalenge abu] ‘kabena benzela bakuabu bibi, kabena bashipa bakuabu, mu mukuna wanyi wa tshijila wonso; bualu bua buloba nebuikale buule tente ne kumanya kua Yehowa, bu mudi mâyi a mu mâyi manene abuikila miaba yawu yonso.’ Ndekelu wa bionso, muntu yonso pa buloba neikale ne dimanya dijalame dia Nzambi ne neamutumikile. Ditekemena adi didiku dikusankisha anyi? Bikaladi dikusankisha, kujingakanyi bua ‘kumanya Yehowa’ to.

Witabe bua kulonga tshidi Bible ulongesha menemene bua mianda ya matuku etu aa ne bua malu malenga a matuku atshilualua adi Bible ulaya bua upete dimanya didi mua kukufikisha ku dikala ne ditabuja ne kukupetesha muoyo. Ke bualu kayi tudi tukukankamija bua witabe bua kulonga Bible ne Bantemu ba Yehowa kuyi ufuta mfranga. Eu ke mushindu wa kujikija buôwa ne kupeta ditekemena dia bushuwa mu buloba bua makenga.

 [Kazubu/​Bimfuanyi mu dibeji 7]

Tshitudi tutekemenyina Bukalenge bua Kristo

Bu mudi Yezu Kristo Mukalenge wa Bukalenge bua Nzambi, mbamupeshe bukokeshi ne bukenji bua kuikala mfumu mu diulu ne pa buloba. (Matayo 28:18) Neavuije bintu bia pa buloba bidi bitunyunguluke biakanangane bimpe menemene. Udi kabidi ne bukokeshi bua kujikija masama. Bishima bivua Yezu muenze patshivuaye pa buloba bivua bileja masanka manene aluaye kuenzela bantu mu Bukalenge buende bu Mukalenge mulenga mupue wa kueyemena. Ku ngikadilu ya Mukalenge eu idibu batele kuinshi eku, nyepi idi itamba kukusankisha?

▪ Mulunda.​—Mâko 10:13-​16.

▪ Kayi ne malu makole, kayi ne kansungansunga.​—Mâko 10:35-45.

▪ Wa kueyemena ne kayi mudisue anu yeye nkayende.​—Matayo 4:5-7; Luka 6:19.

▪ Muakane.​—Yeshaya 11:3-5; Yone 5:30; 8:16.

▪ Muditeki wa pa muaba wa bakuabu ne mudipuekeshi.​—Yone 13:3-15.

[Tshimfuanyi mu dibeji 4]

Dibala dia Bible ne dielangana meji bidi mua kutusaka bua kutekemena Yehowa