Udi utshina malu atshilualua anyi?
Udi utshina malu atshilualua anyi?
KUDI malu a bungi adi enza bantu buôwa. Tshilejilu, bamue bantu badi bumvua buôwa bua malu alua kuenzekela buloba ebu. Tshikandakanda tshia Time tshia mu dia 3 Tshisanga 2006 tshidi tshiamba ne: “Malu akadi enzeka bu mudi nguya mikole, mvula ya bipupu, disapalala dia mâyi, dikutuka dia midilu mu metu ne dienguluka dia mabue manenanenayi a mashika, adi aleja ne: mivu mminyanguke bikole.”
Mu ngondo muitanu 2002, tshibambalu tshia Matunga Masanga tshidi tshitangila bintu bidi bitunyunguluke tshiakapatula luapolo luvua ne tshiena-bualu tshia ne: “Muikala bintu bidi bitunyunguluke pa buloba bujima—Tshitupa 3” (Avenir de l’environnement mondial-3). Luapolo elu luvua lulongolola ku diambuluisha dia bamanyi bapite pa 1 000. Bilondeshile tshikandakanda kampanda, luapolo elu luvua luamba ne: “Buloba mbunyanguke bikole menemene bualu malu adi bantu benza lelu adi anyanga metu, mâyi manene, misulu, mikuna, ashipesha nyama ya muitu ne anyanga bintu bikuabu bidi biambuluisha nyama ne bantu badiku lelu ne batshilualua bua kuikala ne muoyo.”
Dinyanguka dia bintu bidi bitunyunguluke lelu pa buloba mbumue patupu bua ku malu adi enza bantu buôwa. Lelu pa buloba bujima bantu badi ne buôwa bua malu a tshinyangu adi bangenzavi mua kuenza. Mutangidi tshindondi wa Tshisumbu tshia Misheshe ya ditunga dia Canada wakamba ne: “Tutu tushala batabale butuku bujima ne buôwa bua njiwu itudi katuyi bamanye dîba ne mushindu waluayi.” Bushuwa, dilonda patupu ngumu ku televizion dilolo didi mua kufikisha muntu ku dipampakana!
Bena mudimu ba bungi badi ne buôwa bua mudi midimu yabu mua kufua. Difua dia midimu, difua dia biapu, difuilakana dia mianzu ku mudimu ne dienzeja dia bena mudimu midimu mipite bukole bidi bisombesha bantu kaseke ku mudimu. Bana badi ne buôwa bua binabu kabalu kubabenga. Bana bakese badi mua kutshina bela meji ne: baledi babu ki mbabanange menemene to. Kadi mmunyi mudibu bamona nsombelu udi nende bantu bakuabu badibu bamanye? Mamu mukuabu udi wamba ne dipampakana ne: “Bua bana ne bakuabu badi kabayi banji kumanya malu mavule, bantu ba kua tshianana mbenze bu badi muaba munene utu imue misangu wenza buôwa.” Kabidi, baledi ba bungi badi ne buôwa bua mushindu udi bikadilu bibi bidi pa buloba bienda binyanga bantu badibu banange, nangananga bana babu balela.
Bakulakaje batu misangu mivule ne buôwa ne: kabalu kudishinda pa bibandilu bia nzubu anyi kabalu kubabunda mu njila. Bulelela, ‘bakadi batshina mikuna; buôwa budi bubakuata mu njila.’ (Muambi 12:5) Bantu badi ne buôwa bua kupeta disama dikole. Ngumu ya tuishi tudi tukebesha gripe mukole ne kansere ne masama makuabu a tshiambu idi mua kutuenza buôwa bua kupeta disama kampanda dipiadipia didi mua kututshibuila panshi anyi kutushipa ne mêku etu. Nanku, patudi tumona bantu badi ne makanda a mubidi batuadija kusama ne bateketa, mbipepele bua tuetu kubanga kupampakana ne: bualu bua muomumue mbufuane kutuenzekela petu ne bananga betu. Bidi bibungamija bikole bua kutangila muntu udi usama ne kumona ne: katshiena kabidi ne ditekemena nansha dikese to!
Bu mudiku malu a bungi nunku adi atuenza buôwa, kudiku bualu budi mua kutusaka bua kutekemena nsombelu muimpe matuku atshilualua anyi? Kudiku tshintu tshidi mua kutuambuluisha bua kushala batekemene malu mimpe anyi? Tshiena-bualu tshidi tshilonda netshiandamune nkonko eyi.
[Mêyi a dianyisha bua tshimfuanyi mu dibeji 3]
© Foto ya Jeroen Oerlemans/Panos